អនុរដ្ឋលេខាធិការក្រសួងការបរទេស អនុញ្ញាតជូនតំណាងសភាយុវពាណិជ្ជករអន្តរជាតិ ពីបណ្តាប្រទេសអាស៊ីប៉ាស៊ីហ្វិក ចូលពិភាក្សាការងារ

ភ្នំពេញ៖ នៅថ្ងៃទី១១ ខែធ្នូ ឆ្នាំ២០២៣ តាមការចាត់តាំងរបស់ ឯកឧត្តម សុខ ចិន្តាសោភា ឧបនាយករដ្ឋមន្រ្តី និងជារដ្ឋមន្រ្តីការបរទេស និងសហប្រតិបត្តិការអន្តរជាតិ ឯកឧត្តម ទី នីតូរ្យ អនុរដ្ឋលេខាធិការ នៃក្រសួងការបរទេស និងសហប្រតិបត្តិការអន្តរជាតិ បានអនុញ្ញាតជូនតំណាងសភាយុវពាណិជ្ជករអន្តរជាតិ (JCI) ពីបណ្តាប្រទេសអាស៊ីប៉ាស៊ីហ្វិក ដែលដឹកនាំដោយ លោក លី ឧត្ដម ប្រធាន JCI ប្រចាំកម្ពុជា ឆ្នាំ២០២៤ ជួបសម្តែងការគួរសម និងពិភាក្សាការងារ។

ភាគីទាំងពីរបានពិភាក្សាប្រកបដោយផ្លែផ្កា អំពីសារៈសំខាន់នៃការងារការទូតសេដ្ឋកិច្ច និងប្តេជ្ញាពង្រឹងកិច្ចសហប្រតិបត្តិការរវាងក្រុមការងារសម្របសម្រួលការទូតសេដ្ឋកិច្ច ជាមួយសភាយុវពាណិជ្ជករអន្តរជាតិកម្ពុជា សំដៅជំរុញទាក់ទាញការវិនិយោគ ពាណិជ្ជកម្ម ទេសចរណ៍ និងផ្លាស់ប្តូរវប្បធម៌។

ឯកឧត្តមអនុរដ្ឋលេខាធិការ ក៏បានបង្ហាញការគាំទ្រយ៉ាងមុតមាំដល់សភាយុវពាណិជ្ជករអន្តរជាតិកម្ពុជា ក្នុងឱកាសធ្វើជាម្ចាស់ផ្ទះរៀបចំមហាសន្និបាទតំបន់អាស៊ី-ប៉ាស៊ីហ្វិក (2024 JCI ASPAC Angkor) ក្នុងឆ្នាំ២០២៤ នៅខេត្តសៀមរាប។

ស្របជាមួយយុទ្ធនាការ «ទស្សនាខេត្តសៀមរាប ឆ្នាំ២០២៤» ដាក់ចេញដោយរាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតីនាយករដ្ឋមន្រ្តី ហ៊ុន ម៉ាណែត ព្រឹត្តិការណ៍នេះនឹងបង្កើតជាឱកាសដ៏សំខាន់ដើម្បីបង្ហាញទៅដល់ពិភពលោក ពីបរិយាកាសអំណោយផលនៃសក្តានុពលសេដ្ឋកិច្ចកម្ពុជា ភាពសម្បូរបែបនៃសម្បត្តិវប្បធម៌ និងជាទិសដៅប្រកបដោយភាពទាក់ទាញដល់ការវិនិយោគពីបរទេសនៅក្នុងតំបន់ ៕