នាយករងវិទ្យាស្ថានទ័ពជើងគោក ដឹកនាំនិស្សិតជំនាន់ទី១២ ចុះកម្មសិក្សា ដកពិសោធន៍បញ្ចប់វគ្គ ក្នុងភូមិសាស្រ្តកងការពារព្រំដែនលេខ៥០២ នៅស្រុកសំឡូត

ភ្នំពេញ៖ លោកឧត្តមសេនីយ៍ទោ ម៉ា សិទ្ធ នាយករងវិទ្យាស្ថានទ័ពជើងគោក នាថ្ងៃទី១០ ខែធ្នូ ឆ្នាំ២០២៣ បានដឹកនាំក្រុមនិស្សិតនាយទាហានទ័ពជើងគោកជំនាន់ទី១២ ចំនួន ១០២នាក់ ចុះធ្វើកម្មសិក្សាដើម្បីដកពិសោធន៍បញ្ចប់វគ្គសិក្សា នៅក្នុងភូមិសាស្រ្តកងការពារព្រំដែនលេខ៥០២ រយៈពេល ៣២ថ្ងៃ។

ក្នុងដំណើរបេសសកម្មនេះ គោលបំណង ដើម្បីធ្វើការស្វែងយល់ វាស់ស្ទង់សមត្ថភាព និងចំណេះដឹងរបស់និស្សិតដែលបានសិក្សានៅក្នុងថ្នាក់កន្លងមក ប្រៀបធៀបជាមួយនឹងស្ថានភាពជាក់ស្តែង ដើម្បីសម្រេចគោលដៅរបស់ក្រុមនិស្សិតក្នុងការសរសេរបញ្ចប់និក្ខេបបទរបស់ខ្លួន ក្នុងភូមិសាស្រ្តទិសទី៣ សំឡូតនេះ។

លោកវរសេនីយ៍ទោ សៀម ប៊ុនស៊ីម មេបញ្ជាការកងការពារព្រំដែនលេខ៥០២ បានលើកឡើងថានេះជាលើកទី១ ដែលអង្គភាព បានទទួលការចុះធ្វើកម្មសិក្សា របស់និស្សិតនាយទាហានទ័ពជើងគោកជំនាន់ទី១២ ហើយក៏ជាលើកទី២ បន្ទាប់ពីនិស្សិតនាយទាហានសកម្មជំនាន់ទី១៧ ជំនាន់តេជោសន្តិភាព ក៏ធ្លាប់បានចុះធ្វើកម្មសិក្សានៅក្នុងអង្គភាពរបស់ខ្ញុំបាទកាលពីឆ្នាំ២០១៧ ផងដែរ។ ក្រោយពីមានមតិស្វាគមន៍ និងរបាយការណ៍សង្ខេបរួច លោកមេបញ្ជាការបានបញ្ជាក់ជូន អធិបតី និងប្អូនៗក្រុមនិស្សិតក្នុងអង្គពិធីថាបន្ទាប់ពីការបែងចែកទៅតាមគោលដៅចុះកម្មសិក្សា រូបលោកក៏ដូចជានាយទាហានផ្សេងទៀតក្នុងអង្គភាពទាំងមូល នឹងខិតខំរួមចំណែកសម្របសម្រួល ដោះស្រាយបញ្ហា បង្កភាពងាយស្រួលដល់ប្អូនៗ និស្សិតរាល់ចំណេះដឹង បទពិសោធន៍ ឯកសារនានា ដែលមានសារៈសំខាន់ក្នុងការងារចុះបេសកកម្មនេះ អោយបានរលូនពេញលេញតាមតម្រូវការ។

ឆ្លៀតក្នុងឱកាសនោះ លោកឧត្តមសេនីយ៍ទោ ម៉ា សិទ្ធ នាយករងវិទ្យាស្ថានទ័ពជើងគោក បានថ្លែងអំណរគុណចំពោះអង្គភាព ដែលបានយកចិត្តទុកដាក់ ចំពោះក្រុមការងារ ក្រុមនិស្សិត ដែលបានចំណាយពេលវេលា និងការធ្វើដំណើរដ៏វែងឆ្ងាយ ដើម្បីមកសម្រេចគោលដៅរបស់ខ្លួន ហើយដំណើរចុះមកនេះនឹងបង្កើនជាចំណេះដឹង បទពិសោធន៍ល្អសម្រាប់ដោះស្រាយ នឹងសម្រេចការងារ ដើម្បីក្លាយជានាយទាហាន ប្រកបដោយសមត្ថភាពដឹកនាំបញ្ជា ប្រសិទ្ធភាពក្នុងការអនុវត្ត និងគុណភាពជាទីមោទនៈសម្រាប់ខ្លួនឯង ព្រមទាំងអង្គភាព នាពេលខាងមុខ មុននឹងចេញទៅបម្រើការងារ នៅតាមអង្គភាពនានា គឺនិស្សិតរបស់យើងមានភាពស៊ាំជាមួយភូមិសាស្រ្តលំបាក ចេះដឹកនាំបញ្ជាដល់កងកម្លាំងចំណុះសិទ្ធរបស់ខ្លួន ចេះកសាងសេចក្តីសម្រេចចិត្ត ក្នុងការអនុវត្តការងារប្រយុទ្ធ និងត្រៀមប្រយុទ្ធតាមបទបញ្ជារបស់ថ្នាក់លើដែលបានប្រគល់ជូនក្នុងកិច្ចការពារ កសាងប្រទេសជាតិ ក្រោមកងយោធពលខេមរភូមិន្ទតែមួយ។

ក្រោយពេលបញ្ចប់ការសំណេះសំណាល និងការបង្ហាញចំណាប់អារម្មណ៍របស់ក្រុមនិស្សិត ជាមួយអតីតនិស្សិតនាយទាហានសកម្ម និងនាយទាហានទ័ពជើងគោក ដែលបានមកបំពេញការងារក្នុងអង្គភាពនេះកន្លងមករួច លោកឧត្តមសេនីយ៍ទោ នាយករងវិទ្យាស្ថានទ័ពជើងគោក និងលោកមេបញ្ជាការកងការពារព្រំដែនលេខ៥០២ បានលើកទឹកចិត្ត និងផ្តាំផ្ញើរដល់ប្អូនៗជានិស្សិតទាំងអស់ ត្រូវស្តាប់ការណែនាំរបស់ថ្នាក់ដឹកនាំ គ្រូយោធាចារ្យ រៀមច្បងដែលបានចេញមកបម្រើការងារក្នុងអង្គភាពមុនៗ តាមប្រសាសន៍របស់សម្តេចមហាបវរធិបតី ហ៊ុន ម៉ាណែត ថា រក្សាចាស់ ពង្រឹងថ្មី ដើម្បីសាមគ្គីភាពរួមគ្នាពុះពារ ជំនះរាល់ការលំបាកទាំងឡាយ នៅពេលចុះធ្វើកម្មសិក្សាក្នុងភូមិសាស្រ្តនេះ អោយសម្រេចបានលទ្ធផលល្អមុនពេលពេលវិលត្រឡប់ទៅវិញ ៕