មានករណីគ្រោះថ្នាក់ចរាចរណ៍មួយកើតឡើងរវាង ម៉ូតូ និងរថយន្ត ទិសដៅ បញ្ច្រាសគ្នា ក្នុងស្រុកបាទី
ភ្នំពេញ៖ នៅវេលាម៉ោង ២១ និង៣៥នាទីថ្ងៃទី៩ ខែធ្នូ ឆ្នាំ២០២៣ នៅលើផ្លូវជាតិលេខ២ ចន្លោះគីឡូម៉ែត្រលេខ៣០-៣១ ស្ថិតនៅក្នុងភូមិឃ្លាំងសម្បត្តិ ឃុំពត់សរ ស្រុកបាទី ខេត្តតាកែវ មានករណីគ្រោះថ្នាក់ចរាចរណ៍មួយកើតឡើងរវាង ម៉ូតូ និងរថយន្ត ទិសដៅ បញ្ច្រាសគ្នា ពីជើងទៅត្បូង។
ម៉ូតូម៉ាកហុងដាសេ១២៥ ពណ៌ខ្មៅ ពាក់ផ្លាកលេខ កណ្តាល 1X-4036 បើកមកពីទិសខាងជើង ទៅត្បូង ដោយឈ្មោះ វ៉ន ពាញ ភេទប្រុស អាយុ ៦១ឆ្នាំ មុខរបរមេភូមិ (ពាក់មួកសុវត្ថិភាព) មានទីលំនៅភូមិទួលស្ពឺ ឃុំតាលន់ ស្រុកស្អាង ខេត្តកណ្ដាល បានស្លាប់នៅកន្លែងកើតហេតុ។
បានបុកជាមួយនឹងរថយន្តម៉ាកហ៊ីយ៉ាន់ដាយ ពណ៌លឿង ពាក់ផ្លាកលេខ ភ្នំពេញ 3C-6489 បើកមកពីទិសខាងត្បូងទៅជើង ដោយអ្នកបើកបរមិនស្គាល់អត្តសញ្ញាណ ព្រោះរត់គេចខ្លួនពីកន្លែងកើតហេតុបាត់។
មូលហេតុ៖ ដោយអ្នកបើកបរម៉ូតូ ពីជើងទៅត្បូងមានល្បឿនលឿន បានរ៉េចង្កូតមកចំណែកផ្លូវខាងកើត ស្របពេលនោះក៏មានរថយន្តបើកមកពីទិសខាងត្បូងទៅជើងមានល្បឿនលឿន គេចមិនផុតក៏បុកតែម្ដងទៅ។
ចំណែកសពបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី រីឯវត្ថុតាង (ម៉ូតូ និងរថយន្ត) បានដកហូតយកមករក្សាទុកនៅអធិការដ្ឋាននគរបាលស្រុកបាទី ដើម្បីស្រាវជ្រាវ និងបំពេញបែបបទបន្តតាមនីតិវិធី ៕
