មនុស្សម្នាក់ស្លាប់ និងពីរនាក់ទៀតរងរបួសបន្ទាប់ពីបុរសម្នាក់វាយប្រហារអ្នកទេសចរនៅជិតប៉ម Eiffel ទីក្រុងប៉ារីស
ក្រុងប៉ារីស៖ រដ្ឋមន្ត្រីមហាផ្ទៃលោក Gerald Darmanin បានឲ្យដឹងនៅថ្ងៃសៅរ៍ ទី២ ខែធ្នូថា មនុស្សម្នាក់បានស្លាប់ និងពីរនាក់ផ្សេងទៀតបានរងរបួស បន្ទាប់ពីបុរសម្នាក់បានវាយប្រហារអ្នកទេសចរនៅកណ្តាលក្រុងប៉ារីស ក្បែរប៉ម Eiffel។
លោក Darmanin បានប្រាប់អ្នកយកព័ត៌មានថា ប៉ូលីសបានចាប់ខ្លួនបុរសអាយុ ២៦ ឆ្នាំ ជាជនជាតិបារាំង ដោយបានប្រើកាំភ្លើង Taser Stun ។
រដ្ឋមន្ត្រីមហាផ្ទៃបានបន្ថែមថា ជនសង្ស័យត្រូវបានកាត់ទោសឱ្យជាប់ពន្ធនាគាររយៈពេល ៤ ឆ្នាំក្នុងឆ្នាំ ២០១៦ ពីបទរៀបចំផែនការវាយប្រហារមួយផ្សេងទៀត និងស្ថិតក្នុងបញ្ជីឃ្លាំមើលរបស់សេវាសន្តិសុខបារាំង ហើយត្រូវបានគេស្គាល់ផងដែរសម្រាប់ការមានជំងឺវិកលចរិក។
ការវាយប្រហារនេះបានកើតឡើងនៅម៉ោងប្រហែល ៧ យប់ GMT (ថ្ងៃអាទិត្យ ម៉ោង ៣ ទៀបភ្លឺ ម៉ោងនៅប្រទេសសិង្ហបុរី) នៅពេលដែលបុរសនោះបានវាយប្រហារគូស្នេហ៍ទេសចរណ៍មួយនឹងកាំបិតនៅលើ Quai de Grenelle ដែលមានចម្ងាយប៉ុន្មានហ្វីតពីប៉ម Eiffel ធ្វើឱ្យជនជាតិអាល្លឺម៉ង់ម្នាក់រងរបួសយ៉ាងធ្ងន់ធ្ងរ។ បន្ទាប់មកគាត់ត្រូវបានប៉ូលីសដេញតាម និងបានវាយប្រហារមនុស្សពីរនាក់ទៀតដោយញញួរ មុនពេលត្រូវបានចាប់ខ្លួន។
លោក Darmanin បានលើកឡើងថា ជនសង្ស័យបានស្រែកថា Allahu Akbar (ព្រះជាម្ចាស់គឺអស្ចារ្យបំផុត) ហើយបានប្រាប់ប៉ូលីសថា គាត់មានការខកចិត្តដោយសារតែ ប្រជាជនម៉ូស្លីមជាច្រើនកំពុងស្លាប់នៅក្នុងប្រទេសអាហ្វហ្គានីស្ថាន និងនៅប៉ាឡេស្ទីន ហើយក៏មានការខកចិត្តផងដែរចំពោះស្ថានភាព Gaza ។
ការិយាល័យរដ្ឋអាជ្ញាប្រឆាំងភេរវកម្មបានបញ្ជាក់ថាខ្លួនទទួលបន្ទុកលើការស៊ើបអង្កេត។
ប្រភព៖ CNA
ប្រែសម្រួលដោយ៖ ហៃ ឆៃមុីនាង
