អ្នកនេសាទម្នាក់ ប្រគល់ត្រីរាជមួយក្បាលទម្ងន់ ៧៥គីឡូក្រាម ជូនមន្ត្រីជំនាញជលផល លែងចូលទន្លេវិញ
ភ្នំពេញ៖ អ្នកនេសាទបានប្រគល់ត្រីរាជមួយក្បាលទម្ងន់ជាង៧០គីឡូក្រាមប្រវែងជាង១ម៉ែត្រកន្លះ ដែលនេសាទបានជូនមន្ត្រីជំនាញ ជលផលលែងចូលទន្លេវិញ។
ពិធីលេងត្រីដ៍ធំនេះ បានធ្វើឡើង នៅរសៀលថ្ងៃទី១ ខែធ្នូ ឆ្នាំ២០២៣ បន្ទាប់ពីទទួលបានពីប្រជានេសាទមួយរូប នៅភូមិគៀនឃ្លាំង ឃុំអំពិលទឹក ស្រុកកំពង់ត្រឡាច ខេត្តកំពង់ឆ្នាំង ដែលគាត់បានយល់ ដឹងពីការអភិរក្សពូជត្រីដ៏កម្រនេះ។
លោក លី ឡា នាយខណ្ឌជលផល ខេត្តកំពង់ឆ្នាំងបានឲ្យដឹងថា ត្រីរាជមួយក្បាលដែលត្រូវបានប្រជានេសាទ គឺលោក ហ្វា លី មានទីលំនៅភូមិគៀនឃ្លាំងឃុំអំពិលទឹក ស្រុកកំពង់ត្រឡាចនេសាទបានមានទម្ងន់ ៧៥ គីឡូក្រាម មានប្រវែង ១,៦០ម៉ែត្រ និងបានប្រគល់ជូនមន្ត្រីជំនាញជលផល ហើយបានរៀប ចំលែង ចូលទន្លេសាបវិញ នៅរសៀលថ្ងៃទី១ធ្នូ ឆនំ២០២៣នេះ ។
លោកនាយខណ្ឌជលផល ថ្លែងនូវការកោតសរសើរ និងអរគុណ ចំពោះលោក ហ្វា លី ដែលបានប្រគល់ត្រីយ៉ាងធំនិងដ៏កម្រ ដែលត្រូវការពារនិងអភិរក្ស ព្រោះជាប្រភេទត្រីដែលជិតផុតពូជ នេះពិតជាគំរូដ៏ល្អនិងមានតម្លៃមិនអាចកាត់ថ្លៃបាន។ ជាមួយគ្នានេះរដ្ឋបាលជលផលនៃក្រសួងកសិកម្មរុក្ខាប្រមាញ់និងនេសាទ សូមអំពាវនាវដល់បងប្អូនប្រជារាស្ត្រសូមចូលរួមថែរក្សានិងការពារប្រភេទត្រីដែលជិតផុតពូជដោយលែងចូលក្នុងដែនធម្មជាតិវិញនៅពេលនេសាទបានដើម្បីថែរក្សាវត្តមានរបស់ត្រីប្រភេទទាំងនោះសម្រាប់កូនចៅជំនាន់ក្រោយៗទៀត ៕
