ភ្នំពេញ៖ ឯកឧត្តម ឧត្តមសេនីយ៍ឯក ប្រាក់ សុវណ្ណា មេបញ្ជាការកងទ័ពជើគោក នៅព្រឹកថ្ងៃទី២៥ ខែវិច្ឆិកា ឆ្នាំ២០២៣ បានអញ្ជើញជាអធិបតីក្នុងពិធីសំណេះសំណាល បំពាក់ឋានន្តរសក្តិ និងគ្រឿងឥស្សរិយយសជូនយោធិនចូលនិវត្តន៍ យោធិនពិការ ត្រូវផ្ទេរចេញពីក្របខ័ណ្ឌកងយោធពលខេមរភូមិន្ទ ឆ្នាំ២០២៣ ដែលពិធីនេះបានធ្វើឡើងនៅកងពលតូចលេខ១៤ កងទ័ពជើងគោក ខេត្តពោធិ៍សាត់ ។
ក្នុងនាម ឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក ឧត្តមសេនីយ៍ឯក ប្រាក់ សុវណ្ណា បានថ្លែងនូវការដឹងគុណ ចំពោះយោធិនចូលនិវត្តន៍ យោធិនពិការគ្រប់រូប ដែលបានចំណាយពេលវេលាដ៏មានតម្លៃ ហើយស្ទើរពេញមួយជីវិត បានធ្វើពលិកម្មគ្រប់យ៉ាង ដើម្បីបុព្វហេតុបម្រើជាតិមាតុភូមិ។
ក្នុងន័យនេះ ឧត្តមសេនីយ៍ឯក ប្រាក់ សុវណ្ណា បាន បញ្ជាក់ថា ពលិកម្មប្រកបដោយវីរភាព និងស្មារតីស្នេហាជាតិនៅគ្រប់ដំណាក់កាលប្រវត្តិសាស្ត្រនេះ បានរួមចំណែកយ៉ាងសំខាន់ក្នុងកិច្ចការពារបូរណភាពទឹកដី ការកសាងនិងការពារសន្តិភាព ស្ថិរភាពសង្គម ដែលជាមូលដ្ឋានគ្រឹះនៃការអភិវឌ្ឍសង្គមជាតិឱ្យមានការរីកចម្រើន ។ ទោះបី បង ប្អូន បានសម្រាកពីការងារក៍ពិតមែន តែការរួមចំណែកដល់សង្គមជាតិនាពេលកន្លងមក បានចូលរួមការកសាង និងអភិវឌ្ឍន៍ ការថែរក្សាសន្តិភាព ស្ថិរភាព និងការកែទម្រង់កងយោធពលខេមរភូមិន្ទ ពិសេសការចូលរួមចំណែកកសាងជាតិជាមួយរាជរដ្ឋាភិបាលគ្រប់តំណាក់កាល ។
ឧត្តមសេនីយ៍ឯក ប្រាក់ សុវណ្ណា បានផ្ដាំផ្ញើដល់ យោធិនចូលនិវត្តន៍ ទាំងអស់ពេលវិលត្រឡប់ទៅរួមរស់ជាជនស៊ីវិលត្រូវបន្តថែរក្សានូវតំលៃថ្លៃថ្នូររបស់កងទ័ព និងចូលរួមសហការជាមួយអជ្ញាធរដែនដី បន្ថែតរក្សាសុខសន្តិភាពឲ្យបានដាច់ខាត។
តាមសេចក្តីរាយការណ៍អនុវត្តតាមច្បាប់ស្តីពីរបបសោធននិវត្តន៍ និងសោធនបាត់បង់សមត្ថភាពការងា ឆ្នាំ២០២៣នេះ យោធិនចំនួន ១៩នាក់ ចំណុះកងពលតូចអន្តរាគមន៍លេខ១៤ កងទ័ពជើងគោក ត្រូវបានផ្ទេរចេញពីក្របខ័ណ្ឌនៃកងយោធពលខេមរភូមិន្ទ ក្នុងនោះយោធិនសោធននិវត្តន៍មានចំនួន ១១នាក់, យោធិនពិការចំនួន ៨នាក់ ។ ចំពោះឋានន្តរសក្តិថ្នាក់ឧត្តមសេនីយ៍ទោ ១នាក់ ,ឧត្តមសេនីយ៍ត្រី ១នាក់, វរសេនីយ៍ឯក ២នាក់, អនុសេនីយ៍ឯក ២នាក់, អនុសេនីយ៍ទោ ១នាក់ ។
នៅក្នុឱកាសនោះដែរ ឯកឧត្តម ប្រាក់ សុវណ្ណា បានប្រគល់ថវិកាជូនយោធិនសោធន៍និវត្តន៍ទាំង ១៩នាក់ ក្នុង១ម្នាក់ៗ ទទួលបានថវិកាចំនួន ៤០ម៉ឺនរៀន ក្នុងនោះ ថវិកាសម្តេចធិបតី ហ៊ុន ម៉ាណែត និងលោកជំទាវ ពេជ ចាន់មុន្នី ចំនួន ២០ម៉ឺនរៀល ថវិកាកងពល ១០ម៉ឺនរៀល និងសប្បុរសជនចំនួន ១០ម៉ឺនរៀល ៕
