ភ្នំពេញ៖ ជនជាតិចិនម្នាក់ត្រូវចិនដូចគ្នាយកកូនកាំបិតចាក់បណ្ដាលឱ្យស្លាប់ពេលបញ្ជូនដល់មន្ទីរពេទ្យ ខណៈហេតុការណ៍នេះ បានបង្កការភ្ញាក់ផ្អើលនៅភូមិ៤ សង្កាត់លេខ៤ ក្រុងព្រះសីហនុ កាលពីយប់ថ្ងៃទី២៣ ខែវិច្ឆិកា ឆ្នាំ២០២៣..។
សមត្ថកិច្ចបានឱ្យដឹងថា កម្លាំងការិយាល័យនគរបាលព្រហ្មទណ្ឌម្រិតធ្ងន់ កាលពីយប់ថ្ងៃទី២៣ម្សិលមិញ បានទទួលព័ត៌មានពីប្រជាពលរដ្ឋថា នៅចំណុចមុខកាស៊ីណូយ៉ាឌូលី ស្ថិតនៅភូមិ៤ សង្កាត់លេខ៤ ក្រុងព្រះសីហនុ មានជនសង្ស័យ២នាក់ ជាជនជាតិចិន (មិនស្គាល់អត្តសញ្ញាណ) បានយកកូនកាំបិត ធ្វើសកម្មភាពចាក់ទៅលើជនរងគ្រោះ បណ្តាលឱ្យរងរបួសរួចជិះម៉ូតូគេចខ្លួនបាត់។
ក្រោយពីទទួលបានដំណឹងខាងលើ កម្លាំងការិយាល័យនគរបាលព្រហ្មទណ្ឌកម្រិតធ្ងន់ បានចុះទៅទីតាំងកើតហេតុ សួរនាំអ្នកនៅជុំវិញកន្លែងកើតហេតុ ពិនិត្យកាមេរ៉ាសុវត្ថិភាព ទើបដឹងថា មានជនរងគ្រោះ និងមិត្តភក្តិ៣នាក់ទៀត បានអង្គុយហូបស៊ុបនៅហាងសាច់អាំងតុងប៉ី បន្ទាប់ពីហូបរួចជនរងគ្រោះ និងមិត្តភក្តិទាំង៣នាក់ បានដើរសំដៅទៅរករថយន្តរបស់ពួកគេ ស្រាប់តែពេលនោះមានជនសង្ស័យចំនួន២នាក់ ដោយក្នុងនោះមានជនសង្ស័យម្នាក់ឈរនៅខាងក្រោយ Pass App (មុខហាងសាច់អាំងតុងបុី) ត្រៀមធ្វើសកម្មភាពចំណែកម្នាក់ទៀតអង្គុយនៅលើម៉ូតូ ចំណុចក្រោមដើមឈើត្រៀមដឹកគ្នារត់គេច។
លុះក្រុមជនរងគ្រោះដើរជិតដល់រថយន្ត ជនសង្ស័យឈរនៅក្រោយផាសអេប (Pass App) បានធ្វើសកម្មភាពរត់មកចាក់ជនរងគ្រោះឈ្មោះ ម៉ី ចាស៊ុន MEI JASON ជនជាតិចិន សញ្ជាតិអាម៉េរិក ចំនួន១កាំបិតបណ្តាលឱ្យរងរបួសកំភ្លៅខាងឆ្វេងផ្នែកពីក្រោយ បន្ទាប់ពីធ្វើសកម្មភាពរួចជនសង្ស័យ បានរត់ឡើងជិះម៉ូតូម៉ាក Honda Click ពណ៌ស គេចខ្លួនទៅបាត់ទាំងពីរនាក់តែម្ដង។
ក្រោយកើតហេតុជនរងគ្រោះត្រូវបានសមត្ថកិច្ចបញ្ចូនទៅសង្រ្គោះ នៅមន្ទីរពេទ្យតែជាអកុសលរបួសមានសភាពធ្ងន់ធ្ងរខ្លាំងពេកបណ្ដាលឱ្យជនរងគ្រោះស្លាប់។ បច្ចុប្បន្នកម្លាំងជំនាញកំពុងធ្វើការស្រាវជ្រាវតាមនីតិវិធីច្បាប់ ដើម្បីស្វែងរកចាប់ជនដៃដល់៕
