នាយករដ្ឋមន្ត្រី ហ៊ុន ម៉ាណែត ប្តេជ្ញាបន្តនូវប្រពៃណី និងគោលនយោបាយ រដ្ឋាភិបាលអាណត្តិមុន គឺថែរក្សាសុខសន្តិភាព និងលុបបំបាត់ឲ្យអស់ នូវគោលនយោបាយ ឬទស្សនៈជ្រុលនិយម
ភ្នំពេញ៖ រាជរដ្ឋាភិបាលអណត្តិទី៧ នៃរដ្ឋសភា ដែលមានសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជាប្រមុខដឹកនាំ បានប្តេជ្ញាចិត្តបន្តនូវប្រពៃណី និងគោលនយោបាយ របស់រាជរដ្ឋាភិបាលអាណត្តិមុន គឺថែរក្សាសុខសន្តិភាព និងលុបបំបាត់ឲ្យអស់ នូវគោលនយោបាយ ឬទស្សនៈជ្រុលនិយម។
ក្នុងឱកាសអញ្ជើញស្រោចស្រព ព្រះសុគន្ធវារីប្រគេនព្រះមន្ត្រីសង្ឃជាន់ខ្ពស់១១អង្គ នាថ្ងៃទី១៧ វិច្ឆិកានេះ សម្តេចធិបតី ហ៊ុន ម៉ាណែត បញ្ជាក់ថា «ខ្ញុំមានភាពសប្បាយរីករាយ ដោយសារនៅក្នុងប្រទេសយើង មិនមានជម្លោះសាសនា ដែលជាកត្តាមួយ នៅក្នុងជម្លោះសហគមន៍ ហេតុនេះហើយ រាជរដ្ឋាភិបាលនៅអាណត្តិទី៧ នឹងបន្តនូវប្រពៃណី និងគោលនយោបាយ ដែលរាជរដ្ឋាភិបាលអាណត្តិមុន ៤០ឆ្នាំមកនេះ ដែលបានបន្ត គឺការគោរពប្រតិបត្តិ ការជំរុញ និងបើកសិទ្ធិសេរីភាព នៅក្នុងការធានាសិទ្ធិសេរីភាពសាសនា គ្រប់សាសនាទាំងអស់ និងការព្យាយាម ដើម្បីថែរក្សានូវសុខដុមរមណីយកម្មសាសនា ដែលជាធាតុមួយសំខាន់ នៅក្នុងការថែរក្សាសុខសន្តិភាព និងលុបបំបាត់ឲ្យអស់ នូវគោលនយោបាយ ឬទស្សនៈជ្រុលនិយមណាមួយ ដែលប៉ុនប៉ងបំផ្លាញសុខសន្តិភាព នេះជាការប្តេជ្ញាចិត្តរបស់រាជរដ្ឋាភិបាលអាណត្តិទី៧»។
សម្តេចធិបតីបន្តថា នយោបាយឈ្នះ-ឈ្នះ បានផ្តល់នូវការយោគយល់ បានធ្វើឲ្យជឿទុកចិត្ត និងធានានូវសន្តិភាពមួយ ដែលមានចីរភាព។ នៅក្នុងតំបន់ខ្លះ ដូចឃើញនៅក្នុងទូរទស្សន៍ គឺសព្វថ្ងៃនេះ តំបន់ខ្លះព្យាយាមដោះស្រាយជម្លោះ ៣០ ឬ៤០ឆ្នាំហើយ មិនទាន់បញ្ចប់ ដោយសារការបង្កើតរូបមន្តមួយ ក្នុងការទុកចិត្តគ្នាមិនបាន ជាពិសេសជម្លោះនៅក្នុងសាសនា ៕
