ថ្នាក់ដឹកនាំរដ្ឋបាលខេត្តតាកែវ រៀបចំពិធីបើកព្រះនេត្រ លោកតាកែវ លោកយាយកែវ ដើម្បីសុំសេចក្ដីសុខសប្បាយ និងពរជ័យ សម្រាប់ប្រជាពលរដ្ឋទូទាំងខេត្ត

ភ្នំពេញ៖ ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ និងលោកជំទាវ ស្រី ប៉ុណ្ណាដាវី ព្រមជាមួយ លោក លោកស្រី អភិបាលរងខេត្ត លោក លោកស្រី ប្រធានមន្ទីរអង្គភាពជុំវិញខេត្ត នាព្រឹកថ្ងៃព្រហស្បតិ៍ ទី១៦ ខែវិច្ឆិកា ឆ្នាំ២០២៣ បានអញ្ជើញប្រារព្ធពិធីបើកព្រះនេត្រ លោកតាកែវ លោកយាយកែវ នៅរូបសំណាក់ ស្ថិតនៅខាងលិចផ្សារធំតាកែវ ភូមិថ្នល់បែក សង្កាត់រកាក្រៅ ក្រុងដូនកែវ ខេត្តតាកែវ។

ពិធីនេះក៏មានការនិមន្ត ដោយ ព្រះមហាវីរៈវង្សាចារ្យ ជ្រិន សិទ្ធ ព្រះមេគណគណៈធម្មយុត្តិកនិកាយខេត្ត និងជាចៅអធិការវត្តលឹមពូលសាមគ្យារាម ព្រមទាំងគណម្ចាស់គ្រប់អង្គ ពុទ្ធបរិស័ទ្ធ និងប្រជាពលរដ្ឋជាច្រើនកុះករផងដែរ។

ក្នុងឱកាសនោះដែរ ថ្នាក់ដឹកនាំរដ្ឋបាលខេត្ត ក៏បានបួងសួងដល់គុណបុណ្យព្រះរតនត្រ័យ វត្ថុ ស័ក្តិ សិទ្ធិក្នុងលោក សូមឲបារមីដ៏ស័ក្តសិទ្ធិ នៅលើទឹកដីប្រវត្តិសាស្ត្រខេត្តតាកែវ ដែលមានលោកតាកែវ យាយកែវ សូមតាមជួយថែរក្សាការពារដល់ថ្នាក់ដឹកនាំ នៃរាជរដ្ឋាភិបាលគ្រប់ជាន់ថ្នាក់ សំខាន់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងលោកជំទាវបណ្ឌិត ក្នុងការដឹកនាំប្រទេសឲមានការអភិវឌ្ឍន៍រីកចម្រើននៅគ្រប់មូលដ្ឋាន ទទួលបានជោគជ័យនៅឆ្នាំថ្មី ព្រមទាំងប្រទានពរជ័យសិរីមង្គល បវរមហាប្រសើរដល់ ថ្នាក់ដឹកនាំ មន្រ្តីរាជការ និង ប្រជាពលរដ្ឋក្នុង ក្រុង ស្រុក ខេត្តតាកែវទាំងអស់ សូមមានសុខភាពល្អដើម្បី បន្តអភិវឌ្ឍន៍ភូមិ ឃុំ ស្រុក ខេត្ត ឱ្យកាន់តែទទួលបានសមិទ្ធផលថ្មីៗបន្ថែមទៀត ៕