សម្តេចធិបតី៖ ទោះបីវិបត្តិថាមពលលើពិភពលោក តម្រូវឲ្យប្រទេសជាច្រើន ដំឡើងថ្លៃអគ្គិសនី តែសម្រាប់កម្ពុជាមានលទ្ធភាព ថែរក្សាលំនឹងថ្លៃភ្លើង
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា ទោះបីជាពិភពលោក ជួបនូវវិបត្តិថាមពល ដែលតម្រូវឱ្យប្រទេសជាច្រើនដំឡើងថ្លៃអគ្គិសនីក្តី ក៏កម្ពុជាមិនដំឡើងថ្លៃអគ្គិសនីដែរ បើទោះរដ្ឋត្រូវខាតបង់ប្រាក់រាប់រយលានដុល្លារក្នុង ១ឆ្នាំក៏ដោយ។
ក្នុងឱកាសអញ្ជើញសម្ពោធដាក់ឱ្យប្រើប្រាស់ជាផ្លូវការ អាកាសយានដ្ឋានអន្តរជាតិសៀមរាបអង្គរ នាថ្ងៃទី១៦ វិច្ឆិកា សម្តេចធិបតី បញ្ជាក់ថា «ថ្ងៃនេះខ្ញុំបញ្ជាក់អគ្គិសនីកម្ពុជា ទោះបីជាវិបត្តិថាមពល នៅលើពិភពលោក ដែលតម្រូវឱ្យប្រទេសជាច្រើន នៅក្នុងតំបន់ និងលើពិភពលោក ត្រូវដំឡើងថ្លៃអគ្គិសនីដែលធ្វើឱ្យប៉ះពាល់ដល់ប្រជាពលរដ្ឋ តែសម្រាប់កម្ពុជាយើងឆ្នាំនេះ មានលទ្ធភាពក្នុងការថែរក្សាលំនឹងថ្លៃភ្លើង ទោះបីជារដ្ឋត្រូវការខាតបង់មួយចំនួន ក៏ដោយប៉ុន្តែយើងបានខិតខំធ្វើយ៉ាងឱ្យថ្លៃអគ្គិសនីនៅកម្ពុជា បានថែរក្សាពេញមួយឆ្នាំ នេះគឺជាការខិតខំប្រឹងប្រែងរបស់យើង»។
សម្តេចថ្លែងថា ក្នុងរយៈពេល៣ខែ ក្នុងរដូវកាល High Season នេះ អគ្គិសនីកម្ពុជា បានគិតគូរក្នុងការជួយលើកទឹកចិត្ត តាមរយៈការបញ្ចុះតម្លៃ ១៥ភាគរយ នៃការប្រើប្រាស់អគ្គិស នីដែលលើសពីមធ្យមនៃការប្រើប្រាស់ ជួយដល់ប្រតិបត្តិករទេសចរណ៍ ដូចជាសណ្ឋាគារ ផ្ទះសំណាក់ ផ្សារទំនើប ភោជនីយដ្ឋានធំៗ មិនមែនតែក្នុងខេត្តសៀមរាបទេ គឺក្នុងព្រះរាជាណាចក្រកម្ពុជាទាំងមូល ។
សម្តេចថ្លែងទៀតថា ការជួយបញ្ចុះថ្លៃអគ្គិសនី សម្រាប់ប្រតិបត្តិករទេសចរណ៍នេះ ទោះបីមិនច្រើនក្តី ប៉ុន្តែជាការជួយរបស់រាជរដ្ឋាភិបាល បន្ថែមពីការលើកទឹកចិត្តផ្នែកពន្ធ ៕
