សមត្ថកិច្ច បានឃាត់ខ្លួនបុរសសង្ស័យម្នាក់ដែលគេបានចោទថាជាឃាតករសម្លាប់មិត្តភក្តិ និងប្លន់យកម៉ូតូដោយសារតែខ្វះលុយដណ្តឹងប្រពន្ធ

ភ្នំពេញ៖ ជនសង្ស័យជាឃាតករត្រូវគេបញ្ចេញ អត្តសញ្ញាណឈ្មោះ ពេជ្រ រ៉ាវី អាយុ២០ឆ្នាំ មានមុខរបរជាកម្មកររោងចក្រ។ បុរសរងគ្រោះអាយុ២២ឆ្នាំឈ្មោះ ណយ ចាន់ ត្រូវបានគេប្រទះឃើញស្លាប់នៅក្នុងថ្លុកទឹក មួយកន្លែងក្បែររោងម៉ាស៊ីនកិនស្រូវ ក្នុងភូមិស្រះកែវ សង្កាត់វាំងចាស់ ក្រុងឧត្តុងម៉ែជ័យ ខេត្តកំពង់ស្ពឺ។

ជនរងគ្រោះ ត្រូវគេសម្លាប់ដោយប្រើកាំបិតខ្លួនអារក, ចាក់គល់ក, ចាក់ចំឆ្អឹងជំនីខាងឆ្វេង ៥កាំបិត, ចាក់លើកំភួនដៃឆ្វេង ១កាំបិត និងចាក់ចំខ្នងដៃឆ្វេង១កាំបិតថែមទៀត បណ្តាលឱ្យជនរងគ្រោះបានស្លាប់ក្នុងថ្លុកឈាម។ សមត្ថកិច្ចនគរបាលខេត្តបានថ្លែងថាជន សង្ស័យជាឃាតករ ត្រូវបានគេចាប់ខ្លួននៅថ្ងៃទី១៤វិច្ឆិកា។

ជនសង្ស័យរូបនោះបានឆ្លើយសារភាពថា រូបគេពិតជាបានសម្លាប់ជនជនរងគ្រោះយកម៉ូតូ ពិតមែនក្នុងគោលបំណងលក់យកលុយទៅដណ្តឹងប្រពន្ធនៅខេត្តតាកែវ។

ឃាតករសង្ស័យរូបនេះបានបញ្ជាក់ថា ចំណែកម៉ូតូរបស់ជនរងគ្រោះត្រូវបាននាំយក ទៅលក់នៅភ្នំពេញ ប៉ុន្តែពុំមានអ្នកទិញ ដូច្នេះក៏បានសម្រេចចិត្តទុកចោលនៅផ្សារនាគមាស។

សមត្ថកិច្ចបានបញ្ជូនខ្លួនជនសង្ស័យ រួមទាំងវត្ថុតាងទៅការិយាល័យនគរបាលព្រហ្មទណ្ឌ កម្រិតធ្ងន់ដើម្បីកសាងសំណុំរឿងនិងបញ្ជូនខ្លួនបន្ដតាមនីតិវិធីច្បាប់ ៕