សម្តេចធិបតី៖ គោលដៅរបស់រាជរដ្ឋាភិបាលគ្រប់ជំនាន់ គឺធ្វើម្ដេចឲ្យពលរដ្ឋខ្មែរ កាន់តែរឹងមាំ ឈ្លៀសវៃ និងសមត្ថភាពកាន់តែខ្ពស់ ដើម្បីជំរុញប្រទេសយើង កាន់តែលឿន
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងថា គោលដៅរបស់រាជរដ្ឋាភិបាលគ្រប់ជំនាន់ គឺថាធ្វើម្ដេចឲ្យប្រជាពលរដ្ឋខ្មែរ ពីមួយជំនាន់ទៅមួយជំនាន់ កាន់តែល្អប្រសើរ កាន់តែមានឱកាស កាន់តែរឹងមាំ និងកាន់តែឈ្លៀសវៃ និងសមត្ថភាពកាន់តែខ្ពស់ ដើម្បីជំរុញប្រទេសយើង កាន់តែលឿន
ក្នុងឱកាសអញ្ជើញជាអធិបតីប្រកាសដាក់ឲ្យអនុវត្តន៍ជាផ្លូវការ កម្មវិធីនយោបាយចំនួនពីរ ក្នុងវិស័យការងារ ដើម្បីជាឧត្តមប្រយោជន៍ សម្រាប់កម្មករ និយោជិត នាថ្ងៃទី១៤ ខែវិច្ឆិកា ឆ្នាំ២០២៣ សម្តេចធិបតី ហ៊ុន ម៉ាណែត បញ្ជាក់ថា «គោលដៅរបស់រាជរដ្ឋាភិបាលគ្រប់ជំនាន់ គឺថាធ្វើម្ដេចឲ្យប្រជាពលរដ្ឋខ្មែរ ពីមួយជំនាន់ទៅមួយជំនាន់ កាន់តែល្អប្រសើរ កាន់តែមានឱកាស កាន់តែរឹងមាំ និងកាន់តែឈ្លៀសវៃ និងសមត្ថភាពកាន់តែខ្ពស់ ដើម្បីជំរុញប្រទេសយើង កាន់តែលឿន»។
សម្តេចធិបតីថ្លែងថា កម្ពុជារងគ្រោះ ដោយសារសង្គ្រាមគ្មានឱកាស ប៉ុន្ដែជំនាន់បច្ចុប្បន្នមានឱកាស ដែលយើងកសាងមូលដ្ឋាន ប៉ុន្ដែអ្វីដែលសំខាន់ គឺត្រូវជំរុញឲ្យជំនាន់កូនចៅយើង កាន់តែរឹងមាំ ដោយគិតគូរសុខភាព និងគិតគូរពីចំណេះដឹងសមត្ថភាព និងឱកាស ដើម្បីអាចរកការងារ និងធានានូវសមត្ថភាព។
សម្តេចធិបតីមានប្រសាសន៍ថា តាមរយៈកម្មវិធីសមធម៌សុខាភិបាល និងការដាក់ឲ្យអនុវត្តន៍កម្មវិធីរបបសន្តិសុខសង្គមផ្នែកថែទាំសុខភាព នឹងពង្រីកវិសាលភាពអ្នកទទួលបាន ការគាំពារផ្នែកសុខភាពរហូតដល់ទៅប្រមាណ ៩លាននាក់។
សម្តេចធិបតីគូសបញ្ជាក់ថា អ្វីដែលជាក្ដីសង្ឃឹម របស់បងប្អូននិយោជិត ដែលកំពុងខិតខំធ្វើការចំពោះមុខនេះ គឺអាចទ្រទ្រង់ជីវភាពគ្រួសារ ក៏ដូចជាខ្លួនឯង ក៏ប៉ុន្ដែការផ្ដល់ក្ដីសង្ឃឹម និងអនាគតភ្លឺស្វាងកូនចៅ ដែលជាក្ដីប្រាថ្នារបស់បងប្អូន។ សម្តេចថា រាជរដ្ឋាភិបាល បានយកចិត្តទុកដាក់ទៅលើសុខុមាលភាព របស់ប្រជាពលរដ្ឋតាំងពីមុនពេលកើត រហូតដល់ពេលកើត ៕
