សម្តេចធិបតី៖ ការខិតខំពង្រីកសាលាមត្តេយ្យសិក្សា គឺជាកិច្ចការងារសំខាន់ណាស់
ភ្នំពេញ៖ សម្តេចមហាបវរធិបតី ហ៊ុន ម៉ាណែត បានថ្លែងថា រាជរដ្ឋាភិបាលបាននិងកំពុង ខិតខំយកចិត្តទុកដាក់ទៅលើសុខុមាលភាព និងការអប់រំរបស់ប្រជាពលរដ្ឋគ្រប់រូប ដោយត្រូវគិតគូរតាំងពីដើមទី។ ដូច្នេះការខិតខំពង្រីកសាលាមត្តេយ្យសិក្សា គឺជាកិច្ចការងារសំខាន់ណាស់ បានន័យថា «រៀន គឺរៀនតាំងពីដំបូងតែម្តង» ។
ក្នុងឱកាសអញ្ជើញប្រកាសឱ្យអនុវត្តជាផ្លូវការស្តីពីកម្មវិធីនយោបាយចំនួន ២ ក្នុងវិស័យការងារ នៅថ្ងៃទី១៤ ខែវិច្ឆិកា ឆ្នាំ២០២៣ សម្តេចធិបតី ហ៊ុន ម៉ាណែត បានមានប្រសាសន៍ថា ការសិក្សារបស់កុមារតូចៗនាពេលកន្លងទៅ ដែលទទួលបានការវាយតម្លៃតាមរយៈក្រសួងអប់រំយុវជននិងកីឡា បានបង្ហាញឱ្យដឹងថា សិស្សដែលបានចូលរៀននៅបឋមសិក្សា បើសិនជាបានឆ្លងកាត់ការសិក្សានៅមត្តេយ្យសិក្សាមួយជំហានមុន នោះកុមារទាំងនោះនឹងមានភាពងាយស្រួល និងរៀនសូត្រងាយចាប់បាន។ ដូចនេះ ការខិតខំពង្រីកសាលាមត្តេយ្យសិក្សា គឺជាកិច្ចការងារសំខាន់ណាស់ បានន័យថា «រៀន គឺរៀនតាំងពីដំបូងតែម្តង»។
សម្តេចធិបតី ថ្លែងថា ការបង្កើតទារកដ្ឋាននិងមត្តេយ្យសហគមន៍ឱ្យបានច្រើន គឺជាការចូលរួមចំណែកយកចិត្តទុកដាក់ ទៅលើការថែទាំសុខុមាលភាពកុមារនិងទារក ដែលរួមមានដូចជា ការជួយបំប៉នផ្នែកស្មារតី និងការហូបចុកដែលមានអាហារូបត្ថម្ភ ព្រមទាំងការបង្ហាត់បង្រៀនចំណេះដឹងផ្សេងៗជាច្រើនទៀត ៕