អភិបាលខេត្តស្ទឹងត្រែង ឧបត្ថម្ភការហូបចុក និងស្នាក់នៅ ដល់សិស្សក្រីក្រពុំមានលទ្ធភាព ៨០នាក់ ក្នុងពេលប្រឡងបាក់ឌុប

ភ្នំពេញ៖ លោក ស៊ី សួន អភិបាលខេត្តស្តីទី តំណាងឯកឧត្ដម ស្វាយ សំអ៊ាង អភិបាលខេត្តស្ទឹងត្រែង នាថ្ងៃទី៥ ខែវិច្ឆិកា បានអញ្ជើញជួបសំណេះសំណាល និងនាំយកការឧបត្ថម្ភជាថវិកា សម្រាប់ការហូបចុក និងស្នាក់នៅ របស់ឯកឧត្ដមអភិបាលខេត្ត ផ្ដល់ជូនសិស្សក្រីក្រពុំមានលទ្ធភាពចំនួន ៨០នាក់ ក្នុងពេលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០២៣ ។

ពិធីសំណេះសំណាលនេះ ធ្វើឡើងនៅមន្ទីរអប់រំ យុវជន និងកីឡាខេត្តស្ទឹងត្រែង ដោយមានការចូលរួមពី លោកប្រធានមន្ទីរអប់រំ យុវជន និងកីឡា និងលោកអភិបាលក្រុងស្រុកទាំង៦ផងដែរ ។

គួរឲ្យដឹងផងដែរថា អភិបាលខេត្តស្ទឹងត្រែង ជួយឧបត្ថម្ភសម្រាប់ការស្នាក់នៅរយៈពេល ៣យប់ អាហារប្រចាំថ្ងៃរយៈពេលបីថ្ងៃ (សរុបចំណាយ ១៨ម៉ឺនរៀលក្នុងម្នាក់ៗ) ហើយជួយសម្រួលដល់ការផ្ញើកង់ម៉ូតូ និងផ្តល់ជូនទឹកសុទ្ធឥតគិតថ្លៃផងដែរ ។

សូមបញ្ជាក់ថា ខេត្តស្ទឹងត្រែង មានមណ្ឌលប្រឡងចំនួន ២មណ្ឌល មានសិស្សប្រឡងសរុបចំនួន ១០៥៦ នាក់ ស្រី ៥៤៧នាក់ ក្នុងនោះផ្នែកវិទ្យាសាស្រ្តសង្គម មានសិស្ស ៨១៨នាក់ ស្រី ៤០៩នាក់ សិស្សផ្នែកវិទ្យាសា្រស្ត ១៥៩នាក់ ស្រី ៩៦នាក់ ៕