អភិបាលខេត្តបាត់ដំបង ដឹកនាំកិច្ចប្រជុំពិភាក្សាការងារចាំបាច់របស់រដ្ឋបាលខេត្ត រួមមានការបូកសរុបការងារបុណ្យអុំទូកខេត្ត និងការត្រៀមរៀបចំបុណ្យេផេ្សងៗជាច្រើនទៀត នៅមុនដំណាច់ឆ្នាំ២០២៣

ភ្នំពេញ៖ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង នៅរសៀលថ្ងៃអង្គារ ២រោច ខែអស្សុជ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី៣១ ខែតុលា ឆ្នាំ២០២៣ បានអញ្ជើញដឹកនាំកិច្ចប្រជុំពិភាក្សាការងារចាំបាច់របស់រដ្ឋបាលខេត្តបាត់ដំបង រួមមានការបូកសរុបការងារបុណ្យអុំទូកខេត្ត និងការត្រៀមរៀបចំបុណ្យផេ្សងៗជាច្រើនទៀត នៅមុនដំណាច់ឆ្នាំ២០២៣នេះ នៅសាលប្រជុំអគារE នៃសាលាខេត្ត។

ឯកឧត្តម សុខ លូ អភិបាលខេត្ត បានមានប្រសាសន៍សំណេះសំណាល និងថ្លែងអំណរគុណដល់ឯកឧត្តម លោកជំទាវ លោក លោកស្រី មន្ត្រីរាជការ កងកម្លាំងប្រដាប់អាវុធគ្រប់អង្គភាព ដែលបានចូលរួមយ៉ាងពេញទំហឹង ជួយដល់ដំណើរការក្នុងការរៀបចំពិធីបុណ្យអុំទូកខេត្តបាត់ដំបងឱ្យមានដំណើរការរលូន ពោពេញដោយភាពសប្បាយរីករាយ អធិកអធម និងទទួលនូវភាពជោគជ័យគួរជាទីមោទនៈ បើទោះបីជាមានកង្វះខាតខ្លះៗក៏ដោយ ប៉ុន្តែសង្ឃឹមថាឆ្នាំក្រោយនឹងកែប្រែ និងបំពេញនូវការខ្វះចន្លោះដើម្បីឱ្យពិធីនេះកាន់តែមានភាពប្រសើរឡើង។

បន្ទាប់ពីពិភាក្សាលទ្ធផលក្រោយរៀបចំពិធីបុណ្យអុំទូករួចមក ឯកឧត្តមអភិបាលខេត្ត បានមានប្រសាសន៍បន្តថា រដ្ឋបាលខេត្តនឹងរៀបចំបុណ្យឯករាជ្យជាតិ នៅនៅថ្ងៃទី១១ ខែវិច្ឆិកា ឆ្នាំ២០២៣ ដូច្នេះស្នើឲ្យមន្ត្រីរាជការតាមមន្ទីរ អង្គភាព កងកម្លាំងនិមួយៗត្រៀមខ្លួន និងឯកសណ្ឋានក្នុងការចូលរួមក្នុងកម្មវិធីនេះផងដែរ។

ឯកឧត្តមអភិបាលខេត្ត ក៏បានបន្តបញ្ជាក់ថា រដ្ឋបាលខេត្តបាត់ដំបងនឹងរៀបចំពិធីដាល់អំបុក និងអកអំបុកដែលប្រារព្ធធ្វើនៅក្នុងក្រុងបាត់ដំបង ដើម្បីត្រៀមទទួលភ្ញៀវទេសចរណ៍ជាតិ និងអន្តរជាតិឲ្យមកចូលរួមទស្សនាស្វែងយល់ពី ប្រពៃណី វប្បធម៌ និងដំណើរការក្នុងការដាល់អំបុករបស់ប្រជាជនខ្មែរយើងតាំងពីបុរាណកាល និងដើម្បីស្រស់ស្រូបព្រមទាំងភ្លក់រសជាតិនៃអំបុកស្រូវថ្មីក្នុងខេត្តបាត់ដំបងផងដែរ ៕