អគ្គនាយកពន្ធនាគារ បញ្ជាឲ្យឆែកជាប្រចាំរកវត្ថុហាមឃាត់ និងសម្ភារៈមិនចាំបាច់មួយចំនួន នៅពន្ធនាគារខេត្តកំពង់ស្ពឺ
ភ្នំពេញ៖ ឯកឧត្ដម ឧត្តមអគ្គានុរក្សថ្នាក់លេខ១ ឈន សាណាត អគ្គនាយកនៃអគ្គនាយកដ្ឋានពន្ធនាគារ បានណែនាំឱ្យមន្រ្តីពន្ធនាគារខេត្តកំពង់ស្ពឺ ត្រូវឆែកឆេរជាប្រចាំរកវត្ថុហាមឃាត់ និងប្រមូលសម្ភារៈមិនចាំបាច់មួយចំនួនចេញពីបន្ទប់ឃុំ ដើម្បីកាត់បន្ថយភាពចង្អៀតណែនក្នុងបន្ទប់ និងត្រូវសហការជាមួយនាយកដ្ឋានប្រតិបត្តិ ដើម្បីដោះស្រាយភាពភាពចង្អៀតណែន។
ក្នុងឱកាសដែលរូបលោក ចុះពិនិត្យវឌ្ឍនភាពការងារ ពង្រឹងការងារគ្រប់គ្រងពន្ធនាគារខេត្តកំពង់ស្ពឺ និងឆែកឆេររកវត្ថុហាមឃាត់ នៅថ្ងៃទី១៨ ខែតុលា ឆ្នាំ២០២៣ អគ្គនាយកពន្ធនាគារ ក៏បានណែនាំដល់ថ្នាក់ដឹកនាំ និងមន្រ្តីពន្ធនាគារខេត្តកំពង់ស្ពឺនូវវិធានការយ៉ាងម៉ឺងម៉ាត់មួយចំនួនដូចជា៖ ត្រូវធ្វើរបាយការណ៍ និងស្នើទៅនាយកដ្ឋានអប់រំកែប្រែ ជំនាញផ្នែកសុខាភិបាល ដើម្បីសហការទទួលការណែនាំអំពីការព្យាបាលជំងឺផ្សេងៗ ជាពិសេសជំងឺកមរមាស់ក្នុងពន្ធនាគារ។ ត្រូវយកចិត្តទុកដាក់ខ្ពស់លើការងារសន្តិសុខសុវត្ថិភាព សុខមាលភាព និងមនុស្សធម៌។ លើសពីនេះ ត្រូវធ្វើអនាម័យសម្អាតជាប្រចាំក្នុងបន្ទប់ឃុំ អគារឃុំ និងបរិវេនពន្ធនាគារ ជាពិសេសបញ្ហាសំរាមក្នុងពន្ធនាគារ និងត្រូវរាយការណ៍ជាប្រចាំរាល់សភាពការណ៍កើតឡើងក្នុងពន្ធនាគារមកអគ្គនាយកដ្ឋានគ្រប់ពេលវេលា ហើយត្រូវអនុវត្តរបបប្រជុំជាប្រចាំ៕
