ឧត្តមសេនីយ៍ឯក សៀក សុជាតិ ដឹកនាំប្រជុំត្រួតពិនិត្យដំណើរ ចេញចូលរបស់ពលករខ្មែរ នៅតាមបណ្តោយព្រំដែនកម្ពុជា ថៃ ក្នុងខេត្តបន្ទាយមានជ័យ ឧត្តរមានជ័យ និងព្រះវិហារ 

ភ្នំពេញ៖ ក្រុមការងារទី២គណៈកម្មាការចំពោះកិច្ចត្រួតពិនិត្យ និង ដោះស្រាយបញ្ហាដំណើរចេញចូលរបស់ពលករខ្មែរតាមព្រំដែន នៃព្រះរាជាណាចក្រកម្ពុជាបានបើកកិច្ច

ប្រជុំនៅសាលាខេត្តបន្ទាយមានជ័យ កាលពីថ្ងៃទី១១ ខែតុលា ឆ្នាំ២០២៣ ដើម្បីត្រួតពិនិត្យមើល ដំណើរចេញចូលរបស់ពលករខ្មែរនៅតាមបណ្តោយព្រំដែនកម្ពុជា ថៃ ក្នុងខេត្តបន្ទាយមានជ័យ ឧត្តរមានជ័យ និង ខេត្តព្រះវិហារ ដែលកិច្ចប្រជុំនេះ បានប្រព្រឹត្តទៅក្រោមអធិបតីភាព ឧត្តមសេនីយ៍ឯក សៀក សុជាតិ រដ្ឋលេខាធិការក្រសួងការពារជាតិ និងជាអនុប្រធានគណៈកម្មាការចំពោះកិច្ចត្រួតពិនិត្យនិងដោះស្រាយ

បញ្ហាដំណើរចេញចូលរបស់ពលករខ្មែរតាមព្រំដែន នៃព្រះរាជាណាចក្រកម្ពុជា ជាប្រធានក្រុមការងារទី២ ព្រមទាំងមានការចូលរួមពី អជ្ញាធរខេត្ត និង កម្លាំងសមត្ថកិច្ចតាមព្រំដែនដែលមានការពាក់ព័ន្ធជាច្រើនរូបទៀត។

នៅក្នុងកិច្ចប្រជុំឧត្តមសេនីយ៍ឯក សៀក សុជាតិ បានក្រើនរម្លឹកកម្លាំងសមត្ថកិច្ចតាមព្រំដែន ត្រូវធ្វើការសហការជាមួយប្រទេសជិតខាង ធ្វើយ៉ាងណាបង្កលក្ខណៈងាយស្រួល ដល់បងប្អូនពលករខ្មែរយើងដែលចេញចូលឆ្លងកាត់ព្រំដែនធ្វើដំណើរបានងាយស្រួល មានសុវត្ថិភាព ជាពិសេសក្នុងឱកាស ដែលបងប្អូនវិលត្រឡប់មកស្រុកកំណើតដើម្បីចូលរួមក្នុងពិធីពីបុណ្យភ្ជុំបិណ្ឌប្រពៃណីជាតិ ។