សម្តេចមហារដ្ឋសភាធិការធិបតី ឃួន សុដារី ចាត់តាំងឯកឧត្តម មិត្ត ទីមាន រៀបចំកាន់បិណ្ឌវេនទី៧ នៅវត្តវិមានតេជះ ហៅវត្តស្រះចក ក្នុងរាជធានីភ្នំពេញ
ភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជាបានចាត់ ឯកឧត្តម មិត្ត ទីមាន នាយករងខុទ្ទកាល័យសម្តេចរដ្ឋសភាធិបតី រៀបចំពិធីកាន់បិណ្ឌវេនទី៧ នៅវត្តវិមានតេជះ ហៅវត្តស្រះចក ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ នារសៀលថ្ងៃទី៦ ខែតុលា ឆ្នាំ២០២៣ នេះ។
ពិធីកាន់បិណ្ឌវេនទី៧ បានប្រារព្ធធ្វើឡើងតាមគន្លងព្រះពុទ្ធសាសនា ដោយឯកឧត្តម មិត្ត ទីមាន និងអ្នកចូលរួមជាច្រើន រួមមាន ឯកឧត្តម លោកជំទាវ ថ្នាក់ដឹកនាំ សមាជិក សមាជិកាខុទ្ទកាល័យសម្តេចរដ្ឋសភាធិបតី ឯកឧត្តម លោកជំទាវ លោក លោកស្រី ជាទីប្រឹក្សា ជំនួយការ ក្រុមលេខា ព្រមទាំងសាច់ញាតិជិតឆ្ងាយ និងប្រជាពុទ្ធបរិស័ទចំណុះជើងវត្តជាច្រើនកុះករ បានអញ្ជើញនាំយកចង្ហាន់ ទេយ្យទាន និងគ្រឿងបរិក្ខារ រាប់បាត្រ វេរប្រគេនព្រះសង្ឃ ដើម្បីឧទ្ទិសកុសលជូនដួងវិញ្ញាណក្ខន្ធលោកអ្នកមានគុណ បុព្វការីជន ជីដូន ជីតា ដែលចែកឋានទៅបរលោកខាងមុខ មកទទួលយកនូវអានិសង្ឃដែលបានឧទ្ទិសជូននៅក្នុងវេនកាន់បិណ្ឌទី៧នេះ។
នៅក្នុងឱកាសនោះ ឯកឧត្តម មិត្ត ទីមាន បាននាំយកនូវបច្ច័យ របស់សម្តេចរដ្ឋសភាធិបតី និងការចូលរួមពីញាតិមិត្តពុទ្ឋបរិស័ទចំនួនជាង៤៦លានរៀលនិង៦០០ដុល្លារប្រគេនដល់ចៅអធិការវត្តវិមានតេជះ ទុកសម្រាប់កសាងសមិទ្ឋផលនានាក្នុងវត្តផងដែរ។
ទន្ទឹមនឹងនេះ សូមឧទ្ទិសមហាកុសលផលបុណ្យនាថ្ងៃនេះ ជូនចំពោះដួងវិញ្ញាណក្ខន្ធលោកមហាឧបាសក ឃួន រឿម និង ឧបាសិកា អ៊ាប ប៊ុនស៊ត ដែលជាបិតា មាតាបង្កើតរបស់សម្ដេចមហារដ្ឋសភាធិការធិបតី ឃួន សុដារី។
សូមជម្រាបថា នៅក្នុងឱកាសពិធីបុណ្យភ្ជុំបិណ្ឌរៀងរាល់ឆ្នាំ សម្តេចមហារដ្ឋសភាធិការធិបតី ឃួន សុដារី តែងតែអញ្ជើញប្រារព្ធពិធីកាន់បិណ្ឌវេនទី៧ នៅវត្តវិមានតេជះ ដើម្បីឧទ្ទិសកុសលជូនដួងវិញ្ញាណក្ខន្ធលោកអ្នកមានគុណ បុព្វការីជន វីរៈជនស្នេហាជាតិ ជីដូន ជីតា ដែលបានធ្វើមរណកាលទៅហើយនិងបានបួងសួងសូមឱ្យប្រជាពលរដ្ឋនិងប្រទេសជាតិ ទទួលបាននូវសេចក្តីសុខ សេចក្តីចម្រើនជានិច្ចនិរន្តន៍តទៅ។
បុណ្យភ្ជុំបិណ្ឌ ជាពិធីបុណ្យព្រះពុទ្ធសាសនាដ៏ធំប្រចាំឆ្នាំ មានរយៈពេល១៥ថ្ងៃ ចាប់ពីថ្ងៃ ១រោច ដល់ថ្ងៃ ១៥រោច ខែភទ្របទ។ពិធីបុណ្យភ្ជុំបិណ្ឌនេះជាពេលវេលាមួយ ដែលបងប្អូនប្រជាពលរដ្ឋពុទ្ធបរិស័ទ មានឱកាសក្នុងការធ្វើបុណ្យទាន សន្សំកុសល និងជួបជុំសាច់ញាតិបងប្អូន នៅតាមទីកន្លែងជិតឆ្ងាយ ជាពិសេសតាមទីវត្តអារាម ដើម្បីឧទ្ទិសកុសលផលបុណ្យ ជូនដល់បុព្វការីជន ញាតិសន្តាន ដែលបានចែកឋានរំលាយក្ខន្ធហើយ បានទៅកាន់សុគតិភពកុំបីឃ្លៀងឃ្លាតឡើយ៕
