សម្តេច ហេង សំរិន និងសម្តេចធម្មវិសុទ្ធវង្សា អញ្ជើញកាន់បិណ្ឌវេនទី៤នៅវត្តប្រជុំនទី (ក្រពើហា) ក្រុងតាខ្មៅ ខេត្តកណ្តាល
ភ្នំពេញ៖ ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ ដែលជាពិធីបុណ្យប្រពៃណីជាតិរបស់ខ្មែរ នាព្រឹកថ្ងៃអង្គារ ៤រោច ខែភទ្របទ ឆ្នាំថោះ បញ្ចស័ក ពុទ្ធសករាជ២៥៦៧ ត្រូវនឹងថ្ងៃទី៣ ខែតុលា ឆ្នាំ២០២៣ សម្តេចអគ្គមហាពញាចក្រី ហេង សំរិន ប្រធានកិត្តិយសឧត្តមក្រុមប្រឹក្សាព្រះមហាក្សត្រ និងសម្តេចធម្មវិសុទ្ធវង្សា សៅ ទី ហេង សំរិន និងឯកឧត្តម វង សូត អនុប្រធានទី២ រដ្ឋសភា និងលោកជំទាវ ព្រមទាំងកូនចៅ ឯកឧត្តម លោកជំទាវ ជាសមាជិក សមជិការដ្ឋសភា ទីប្រឹក្សា ជំនួយការ និងពុទ្ធបរិស័ទចំណុះជើងវត្ត បានអញ្ជើញកាន់បិណ្ឌវេនទី៤ នៅវត្តប្រជុំនទី (ក្រពើហា) ស្ថិតក្នុងសង្កាត់ព្រែកឬស្សី ក្រុងតាខ្មៅ ខេត្តកណ្តាល។
ពិធីកាន់បិណ្ឌនេះ គឺប្រព្រឹត្តទៅចាប់ពីថ្ងៃ១រោច ខែភទ្របទ ដល់ថ្ងៃ១៤រោច ខែភទ្របទ។ បុណ្យកាន់បិណ្ឌជាពិធីដែលពុទ្ធបរិស័ទធ្វើឡើងតាំងពីថ្ងៃ១រោច ដល់ថ្ងៃ១៤រោច ខែភទ្របទ ដើម្បីឧទ្ទិសផល្លានិសង្ឃដល់ជនដែលធ្វើមរណកាលទៅកាន់បរលោក។ ប្រជាពុទ្ធបរិស័ទខ្មែរ ដែលជាអ្នកមានជំនឿមុតមាំទៅលើវិស័យព្រះពុទ្ធសាសនា នាឱកាសពិធីបុណ្យកាន់បិណ្ឌ ភ្ជុំបិណ្ឌ តែងបាននាំយកទេយ្យទានផ្សេងៗបាយ-សម្លរទៅប្រគេនព្រះសង្ឃ និងពូនភ្នំខ្សាច់ ស្រង់ព្រះពុទ្ធរូប។
សម្តេចអគ្គមហាពញាចក្រី ហេង សំរិន និងសម្តេចធម្មវិសុទ្ធវង្សា ដែលជាពុទ្ធសាសនូបត្ថម្ភក៍ តែងតែដឹកនាំកូន ចៅ មកប្រារព្ធពិធីបុណ្យកាន់បិណ្ឌ ភ្ជុំបិណ្ឌ នៅវត្តប្រជុំនទី(ក្រពើហា) ជារៀងរាល់ឆ្នាំ តាមគន្លងព្រះពុទ្ធសាសនា ដែលជាប្រពៃណីជាតិខ្មែរ។
សម្តេចអគ្គមហាពញាចក្រី ហេង សំរិន និងសម្តេចធម្មវិសុទ្ធវង្សាសៅ ទី ហេង សំរិន និងឯកឧត្តម វង សូត និងលោកជំទាវ ព្រមទាំងពុទ្ធបរិស័ទ បានធ្វើពីធីថ្វាយទៀនធូបផ្កាភ្ញីសមាទានសីលរាប់បាត្រទៅតាមគន្លងព្រះពុទ្ធសាសនាដើម្បីឧទ្ទិសកុសលផលបុណ្យ ដែលកើតមាននាឱកាសនេះ ប្រគេន និងជូនដល់ព្រះថេរានុថេរៈគ្រប់ព្រះអង្គ បុព្វការីជនញាតិកាទាំង៧សន្តាន និងបងប្អូនជនរួមជាតិគ្រប់រូប ដែលបានទទួលមរណកាល សូមទទួលបុណ្យកុសលគ្រប់ៗគ្នា និងទទួលបាននូវសេចក្តីសុខសេចក្តីចម្រើន ពិសេសបានជួបប្រទះតែពុទ្ធពរទាំងបួនប្រការគឺ៖ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕
