អន្តរគណៈកម្មការរដ្ឋសភា ជួបប្រជុំជាមួយតំណាងរាជរដ្ឋាភិបាល ដើម្បីពិភាក្សាលើសេចក្តីព្រាងច្បាប់ស្តីពី ការបង្កើតរដ្ឋលេខាធិការដ្ឋានអាកាសចរណ៍ស៊ីវិល
ភ្នំពេញ៖ អន្តរគណៈកម្មការរដ្ឋសភា ដឹកនាំដោយ ឯកឧត្តម អង្គ វង្សវឌ្ឍានា ប្រធានគណៈកម្មការនីតិកម្ម និងយុត្តិធម៌ នៃរដ្ឋសភា និងលោកជំទាវ និន សាផុន ប្រធានគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃរដ្ឋសភា នាព្រឹកថ្ងៃទី២៧ ខែកញ្ញា ឆ្នាំ២០២៣ បានជួបប្រជុំជាមួយតំណាងរាជរដ្ឋាភិបាល ដឹកនាំដោយ ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីរដ្ឋលេខាធិការដ្ឋានអាកាសចរណ៍ស៊ីវិល ដើម្បីពិភាក្សាលើសេចក្តីព្រាងច្បាប់ស្តីពី ការបង្កើតរដ្ឋលេខាធិការដ្ឋានអាកាសចរណ៍ស៊ីវិល នៅវិមានរដ្ឋសភា។
ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីរដ្ឋលេខាធិការដ្ឋានអាកាសចរណ៍ស៊ីវិល បានជម្រាបជូនអង្គប្រជុំថា វិស័យអាកាសចរណ៍ស៊ីវិលបានដើរតួនាទី និងចូលរួមចំណែកយ៉ាងសំខាន់ក្នុងការអភិវឌ្ឍន៍សង្គម និងសេដ្ឋកិច្ចជាតិ តាមរយៈការបង្កើតការងារដោយផ្ទាល់ និងដោយប្រយោល ការគាំទ្រ និងជំរុញវិស័យទេសចរណ៍ ពាណិជ្ជកម្ម ការទាក់ទាញ និងជំរុញដល់ការវិនិយោគផ្ទាល់ពីបរទេស និងធុរកិច្ចក្នុងស្រុក ប្រកបដោយទំនុកចិត្ត និងមានលក្ខណៈសេដ្ឋកិច្ច។ ក្រៅពីនេះ វិស័យអាកាសចរណ៍ស៊ីវិលបានជួយសម្រួលដល់ការតភ្ជាប់រវាងប្រជាជន និងប្រជាជន ប្រទេសនិងប្រទេស និងការផ្លាស់ប្តូរវប្បធម៌នៃពិភពលោកទៀតផង។
ឯកឧត្តមរដ្ឋមន្ត្រីបានបន្តថា វិស័យអាកាសចរណ៍សុីវិលកម្ពុជា បានឆ្លងកាត់ការវិវត្តរីកចម្រើនជាច្រើនដំណាក់កាលដូចប្រទេសនានាក្នុងពិភពលោកដែរ ជាពិសេសនៅពេលដែលរាជរដ្ឋាភិបាលក្រោមការដឹកនាំដ៏ឈ្លាសវៃ ប៉ិនប្រសប់ និងប្រកបដោយគតិបណ្ឌិតដ៏ខ្ពងខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី បានដាក់ចេញនូវគោលនយោបាយបើកចំហរជើងមេឃក្នុងឆ្នាំ១៩៩៩ បានធ្វើឲ្យវិស័យអាកាសចរណ៍ស៊ីវិល «ការដឹកជញ្ជូនតាមផ្លូវអាកាស» នៅកម្ពុជា ទទួលបានការរីកចម្រើនយ៉ាងឆាប់រហ័ស) និងមានកំណើនខ្ពស់ ជាពិសេសដំណាក់កាលមុនវិបត្តិនៃជំងឺកូវីដ១៩។
តាមរយៈការដាក់ចេញគោលនយោបាយត្រឹមត្រូវ និងគ្រប់គ្រងបានល្អនូវជំងឺកូវីដ១៩ វិស័យអាកាសចរណ៍ស៊ីវិលបានបន្តងើបឡើងវិញប្រកបដោយសក្តានុពល ជាក់ស្ដែងនៅពេលកន្លងមកនេះ កម្ពុជាទទួលបានការវិនិយោគលើផ្នែកហេដ្ឋារចនាសម្ព័ន្ធអាកាសយានដ្ឋានអន្តរជាតិថ្មីៗចំនួន៤ រួមមាន៖
១-អាកាសយានដ្ឋានអន្តរជាតិសៀមរាបអង្គរលំដាប់ថ្នាក់4E ដែលគ្រោងនឹងត្រូវបើកឲ្យប្រើប្រាស់ជាផ្លូវការនៅថ្ងៃទី១៦ ខែតុលា ឆ្នាំ២០២៣
២-អាកាសយានដ្ឋានអន្តរជាតិតារាសាគរលំដាប់ថ្នាក់4E
៣-អាកាសយានដ្ឋានអន្តរជាតិតេជោលំដាប់ថ្នាក់4F
៤-អាកាសយានដ្ឋានអន្តរជាតិខេត្តព្រះសីហនុកំពុងតែដំណើរការកែលម្អទៅលំដាប់ថ្នាក់4E។
ឯកឧត្តមរដ្ឋមន្ត្រីបានគូសបញ្ជាក់ជូនអង្គប្រជុំថា រដ្ឋលេខាធិការដ្ឋានអាកាសចរណ៍ស៊ីវិលត្រូវបានបង្កើតឡើងដោយព្រះរាជក្រមលេខ នស/រកម/០១៩៦/២៣ ចុះថ្ងៃទី២៤ ខែមករា ឆ្នាំ១៩៩៦ ដឹកនាំដោយអនុរដ្ឋលេខាធិការមួយរូប ដែលមិនស្របនឹងស្ថានភាពជាក់ស្ដែង នាពេលបច្ចុប្បន្ន ដែលដឹកនាំដោយរដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិលមួយរូប អមដោយរដ្ឋលេខាធិការ និងអនុរដ្ឋលនាធិការមួយចំនួន។ ម៉្យាងទៀត អង្គការអាកាសចរណ៍ស៊ីវិលអន្តរជាតិដែលកម្ពុជាបានចូលជាសមាជិកចាប់តាំងពីឆ្នាំ១៩៥៦ ក៏បានរកឃើញនូវចំណុចខ្វះចន្លោះដូចគ្នាផងដែរពាក់ព័ន្ធទៅនឹងគោលការណ៍គ្រប់គ្រង និងចាត់ចែងការងារអាកាសចរណ៍ស៊ីវិលកម្ពុជា តាមរយៈការធ្វើសវនកម្មចំនួន៣លើករួចមកហើយកាលពីឆ្នាំ២០០៧ ឆ្នាំ២០១៦ និងឆ្នាំ២០១៨។ ហេតុដូច្នេះ រដ្ឋលេខាធិការដ្ឋានអាកាសចរណ៍ស៊ីវិល បានរៀបចំតាក់តែងសេចក្តីព្រាងច្បាប់ស្តីពីការបង្កើតរដ្ឋលេខាធិការដ្ឋានអាកាសចរណ៍ស៊ីវិល ជំនួសច្បាប់ស្តីពីការបង្កើតរដ្ឋលខាធិការដ្ឋានអាកាសចរណ៍ស៊ីវិល ឆ្នាំ១៩៩៦ ក្នុងគោលបំណងដើម្បីលើកកម្ពស់និងធានាដល់ដំណើរការគ្រប់គ្រង ចាត់ចែង និងអភិវឌ្ឍន៍វិស័យអាកាសចរណ៍ស៊ីវិលកម្ពុជា ស្របតាមស្ថានភាពជាក់ស្ដែងនៅពេលបច្ចុប្បន្ន ពិសេសឆ្លើយតបទៅនឹងតម្រូវការ និងចំណុចខ្វះចន្លោះដែលបានតម្រូវ និងរកឃើញដោយអង្គការអាកាសចរណ៍ស៊ីវិលជាតិ។
បន្ទាប់ពីបានស្តាប់យ៉ាងយកចិត្តទុកដាក់នូវការពន្យល់ និងមតិបំភ្លឺយ៉ាងល្អិតល្អន់របស់ ឯកឧត្តមបណ្ឌិត ម៉ៅ ហាវណ្ណាល់ ជួសមុខឲ្យគណៈកម្មការរដ្ឋសភា ឯកឧត្តម អង្គ វង្សវឌ្ឍានា បានសម្តែងនូវការគាំទ្រទៅលើសេចក្ដីព្រាងច្បាប់នេះ ដោយរក្សាទម្រង់ និងខ្លឹមសារសេចក្តីព្រាងច្បាប់ដើមរបស់រាជរដ្ឋាភិបាលនៅដដែល ដោយពុំមានការកែប្រែខ្លឹមសារ និងពាក្យពេចន៍អ្វីឡើយ។
ឯកឧត្តម អង្គ វង្សវឌ្ឍានា បានគូសបញ្ជាក់ថា សេចក្តីព្រាងច្បាប់ស្តីពីការបង្កើតរដ្ឋលេខាធិការដ្ឋានអាកាសចរណ៍ស៊ីវិល បានធ្វើឡើងនាពេលនេះ ពិតជាស្របទៅនឹងស្ថានភាពបច្ចុប្បន្ន និងការអភិវឌ្ឍរបស់ព្រះរាជាណាចក្រកម្ពុជា។ គណៈកម្មការរដ្ឋសភា នឹងធ្វើសំណើទៅគណៈកម្មាធិការអចិន្ត្រៃយ៍រដ្ឋសភា ដើម្បីបញ្ចូលសេចក្តីព្រាងច្បាប់នេះ ក្នុងរបៀបវារៈសម័យប្រជុំរដ្ឋសភាលើកទី១ នីតិកាលទី៧ នាពេលខាងមុខ ដោយចាត់ទុកជាការប្រញាប់ ៕
