នាយករដ្ឋមន្ត្រីថ្មីកម្ពុជា៖ ការអប់រំអាណត្តិថ្មី មិនផ្តោតតែលើចំណេះដឹងទេ គឺផ្តោតលើចរិយាធម៌ពីថ្នាក់មត្តេយ្យ ដល់ថ្នាក់ទី១២
ភ្នំពេញ៖ នៅចំពោះមុខប្រជាពលរដ្ឋខ្មែរនៅអាមេរិក និងកាណាដា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបង្ហាញការពង្រឹងចរិយាធម៌ដល់សិស្សពីថ្នាក់មត្តេយ្យដល់ថ្នាក់ទី១២ ក្នុងប្រព័ន្ធអប់រំខ្មែរនៅនីតិកាលថ្មីនេះ។ សម្តេចធិបតី បានគូសបញ្ជាក់ថា ការអប់រំមិនត្រឹមតែផ្តល់ចំណេះដឹងប៉ុណ្ណោះទេ គឺផ្តល់ទាំងគុណធម៌ សីលធម៌ និងឥរិយាបថល្អដល់ពួកគេផងដែរ។
សង្គមខ្មែរបច្ចុប្បន្នត្រូវបានគេកត់សម្គាល់ឃើញថា មានការធ្លាក់ចុះផ្នែកសីលធម៌សង្គម។ ក្នុងនោះសិស្សានុសិស្សនៅតាមសាលាមួយចំនួន ក៏បានធ្វើសកម្មភាពឆ្គាំឆ្គងបាត់បង់ចរិយាធម៌។
ក្នុងពិធីសំណេះសំណាលជាមួយប្រជាពលរដ្ឋខ្មែររស់នៅអាមេរិក និងកាណាដានៅយប់ថ្ងៃសៅរ៍ ទី២៣ ខែកញ្ញា ឆ្នាំ២០២៣ ម៉ោងនៅក្រុងញូវយ៉ក សម្តេចធិបតី បានគូសរំលេចថា ការអប់រំត្រូវពឹងផ្អែកលើអាណាព្យាបាល សាលារៀន និងបរិស្ថានសង្គម។ ប៉ុន្តែអាណាព្យាបាលនាពេលបច្ចុប្បន្នមមាញឹកខ្លាំងនឹងការងារចិញ្ចឹមជីវិត ជាហេតុធ្វើឱ្យគាត់មិនបានចូលរួមអប់រំកូន។
ដើម្បីបំពេញការខ្វះចន្លោះរបស់ឪពុកម្តាយបែបនេះ សម្តេចធិបតី ហ៊ុន ម៉ាណែត បានមើលឃើញថា មានតែការបន្ថែមតួនាទីនៃការអប់រំនៅតាមសាលា។
សម្តេចធិបតី ហ៊ុន ម៉ាណែត បានបញ្ជាក់ដូច្នេះ «ចរិយាធម៌សំខាន់ណាស់សម្រាប់ធនធានមនុស្សរបស់យើង។ គុណធម៌ សីលធម៌ ផ្នត់គំនិត របស់យុវជនរបស់យើងត្រូវរៀបចំតាំងពីក្មេងមក។ អ៊ីចឹងបានខ្ញុំឱ្យក្រសួងអប់រំរៀបចំបញ្ចូលកម្មវិធីមួយចំនួន ដើម្បីបំផុសការស្ម័គ្រចិត្តជួយសហគមន៍ ការចេះជួយយកអសាគ្នា»។
សម្តេចធិបតី បានបន្ថែមថា «សមត្ថភាពចំណេះដឹងយើងត្រូវគិតហើយ ប៉ុន្តែបើមានតែសមត្ថភាពខ្វះចរិយាធម៌ ខ្វះគុណធម៌ ក៏មិនកើត យើងត្រូវតែពង្រឹង។ អីចឹងបានត្រូវពង្រឹងតាំងពីក្មេងតែម្តង គឺពីថ្នាក់មត្តេយ្យ ដល់ថ្នាក់ទី១២ នេះគោលដៅអាទិភាពសំខាន់»។
សម្តេចធិបតី ហ៊ុន ម៉ាណែត បានគូសបញ្ជាក់ដែរថា ដើម្បីឱ្យសិស្សគេផុតពីអបាយមុខនានា ឬមានពេលវេលាទៅធ្វើរឿងមិនល្អ គឺត្រូវរកកម្មវិធីសាលា កម្មវិធីសង្គមឱ្យបានច្រើនឱ្យគាត់ចូលរួម ៕
