មន្ទីរប្រឆាំងបទល្មើសគ្រឿងញៀន បើកកិច្ចប្រជុំត្រួតពិនិត្យលទ្ធផលការងារប្រយុទ្ធប្រឆាំងគ្រឿងញៀន និងផ្សព្វផ្សាយលទ្ធផលនៃកិច្ចប្រជុំអាជ្ញាធរជាតិប្រយុទ្ធប្រឆាំងគ្រឿងញៀន
ភំ្នពេញ៖ នាព្រឹកថ្ងៃចន្ទ ៤កើត ខែភទ្របទ ឆ្នាំថោះ បញ្ចស័ក ពុទ្ធសករាជ២៥៦៧ ត្រូវនឹងថ្ងៃទី១៨ ខែកញ្ញា ឆ្នាំ២០២៣ ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន បានដឹកនាំកិច្ចប្រជុំស្តីពី ការត្រួតពិនិត្យលទ្ធផលការងារប្រយុទ្ធប្រឆាំងគ្រឿងញៀន និងផ្សព្វផ្សាយលទ្ធផល នៃកិច្ចប្រជុំអាជ្ញាធរជាតិប្រយុទ្ធប្រឆាំងគ្រឿងញៀន ក្រោមអធិបតីភាព ឯកឧត្តម សនិ្តបណ្ឌិត នេត សាវឿន នាយករដ្ឋមន្ត្រីស្តីទី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន (អ.ជ.ប.គ.ញ) កាលពីថ្ងៃទី១៥ ខែកញ្ញា ឆ្នាំ២០២៣។
កិច្ចប្រជុំនេះ ធ្វើឡើងនៅមន្ទីរប្រឆាំងបទល្មើសគ្រឿងញៀន ដោយមានការចូលរួមពី លោក-លោកស្រី ឧត្តមសេនីយ៍ វរសេនីយ៍ នាយករងមន្ទីរទទួលផែនទាំងអស់ និងលោកនាយការិយាល័យទាំង១១។
បន្ទាប់ពីបានស្តាប់នូវបញ្ហាប្រឈម និងចំណុចខ្វះខាតមួយចំនួនរបស់លោកនាយការិយាល័យទាំង១១ និងមតិកែសម្រួលឡើងវិញ ដើម្បីឲ្យការចុះត្រួតពិនិត្យការងារសវនកម្ម របស់អគ្គនាយកដ្ឋានសវនកម្មផ្ទៃក្នុង សម្រាប់ឆ្នាំថ្មីមានភាពល្អប្រសើរឡើងនោះ ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន បានណែនាំឲ្យការិយាល័យនីមួយៗ ត្រូវពិនិត្យឡើងវិញនូវតួនាទីភារកិច្ចរបស់ខ្លួន និងអនុវត្តឲ្យបានត្រឹមត្រូវ, ធ្វើការត្រួតពិនិត្យការិយាល័យទំនាក់ទំនងតាមច្រកព្រំដែន (BLO) ពិសេសមន្ត្រីប្រចាំការ, ត្រូវពិនិត្យឡើងវិញលើការវាយតម្លៃ លើកសរសើរដល់មន្ត្រីដែលសកម្មការងារ និងត្រូវដាក់វិន័យយ៉ាងតឹងរឹងដល់មន្ត្រីដែលបានប្រព្រឹត្តិល្មើសវិន័យកងកម្លាំង។
ដើម្បីប្រយុទ្ធប្រឆាំងបទល្មើសគ្រឿងញៀន តាមការប្ដេជ្ញាចិត្តរបស់រាជរដ្ឋាភិបាលកម្ពុជា ឯកឧត្តម ឧត្តមសេនីយ៍ឯក ឃឹង សារ៉ាត់ បានលើកយកគោលដៅការងារអាទិភាពចំនួន៥ សម្រាប់អនុវត្តបន្ដ រួមមាន៖
១៖ កិច្ចការងារអប់រំផ្សព្វផ្សាយ ដោយត្រូវធ្វើយ៉ាងណាឲ្យកាន់តែទូលំទូលាយ ក្នុងនោះត្រូវប្រើប្រាស់កម្លាំងសរុប មធ្យោបាយសរុប ពិសេសប្រើប្រាស់ប្រព័ន្ធផ្សព្វផ្សាយព័ត៌មាន និងរៀបចំការអប់រំណែនាំបន្ថែមផ្សេងៗ ឲ្យកាន់តែផុលផុសដោយបូករួមទាំងការនិពន្ធចម្រៀង តែងកំណាព្យ វិញ្ញាសារសម្រាប់សិស្សប្រឡង ហើយបាញ់ឆ្ពោះត្រង់ទៅកាន់យុវជន និងប្រជាពលរដ្ឋនៅតាមតំបន់ដាច់ស្រយាល។
២៖ ការត្រួតពិនិត្យសារធាតុគីមីផ្សំ ដោយត្រូវរៀបចំជាបន្ទាន់នូវយន្ដការគ្រប់គ្រងសារធាតុគីមីផ្សំឲ្យបានច្បាស់លាស់។ យន្ដការទាំងនោះត្រូវធ្វើឡើងឲ្យសកម្ម ហើយមាននិរន្ដរភាព ក្នុងនោះអគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន ត្រូវសម្របសម្រួលជាមួយក្រសួង អង្គភាព ស្ថាប័នដែលមានការពាក់ព័ន្ធទៅនឹងការប្រើប្រាស់សារធាតុគីមីផ្សំដូចជា ក្រសួងសុខាភិបាល, ក្រសួងកសិកម្ម, ក្រសួងឧស្សាហកម្មជាដើម។
៣៖ បន្ដខិតខំយកចិត្តទុកដាក់ទប់ស្កាត់ការហូរចូលគ្រឿងញៀនមកប្រទេសកម្ពុជា ក្នុងនោះទាំងផ្លូវគោក ផ្លូវទឹក និងផ្លូវអាកាស។
៤៖ បន្ដខិតខំទប់ស្កាត់ការកែច្នៃផលិតគ្រឿងញៀនក្នុងប្រទេស ដោយត្រូវប្រើប្រាស់យន្ដការដែលបង្កើតឡើងពាក់ព័ន្ធការគ្រប់គ្រងសារធាតុគីមីផ្សំ និងត្រូវត្រួតពិនិត្យតំបន់ដែលមានហានិភ័យ ដោយពួកឧក្រិដ្ឋជនលួចប្រើប្រាស់កន្លែងនោះលួចលាក់កែច្នៃផលិតគ្រឿងញៀន។ ឧទាហរណ៍ ៖ តំបន់ព្រៃ តំបន់ឃ្លាំងស្ដុកទំនិញ និងតំបន់ដែលជ្រកក្រោមស្លាកអភិវឌ្ឍន៍ជាដើម។
៥៖ ខិតខំប្រឹងប្រែងលុបបំបាត់ ចែកចាយប្រើប្រាស់គ្រឿងញៀនតាមទីតាំងសប្បាយដ្ឋានដូចជា ខារ៉ាអូខេ ក្លឹបកម្សាន្ដ បៀរហ្គាឌិនជាដើម។
ជាមួយគ្នានោះ ដើម្បីអនុវត្តការងារឲ្យមានប្រសិទ្ធភាព ឯកឧត្តម ឧត្តមសេនីយ៍ឯក នាយកមន្ទីរប្រឆាំងបទល្មើសគ្រឿងញៀន បានដាក់ទិសដៅបន្តចំនួន៥ចំណុច៖
១-បន្តរួបរួមគ្នាជាធ្លុងមួយ ដោយឯកភាពរួមគ្នាដើម្បីអនុវត្តការងារតាមថានានុក្រម
២-បន្តការកែទម្រង់ កសាងធនធានមនុស្ស យកចិត្តទុកដាក់សុខមាលភាពកងកម្លាំង(កន្លែងណាមិនទាន់ល្អត្រូវមានការកំណែទម្រង់)
៣-បន្តត្រួតពិនិត្យ និងគ្រប់គ្រងឲ្យបានជាក់លាក់ ទាំងបរិមាណ និងប្រសិទ្ធភាពការងារ (ត្រូវការប្រមូលកម្លាំង ពេលណាត្រូវបានភ្លាម)។
៤-បន្តពង្រឹងវិន័យកងកម្លាំង រក្សាសេចក្តីថ្លៃថ្នូរ ពង្រឹងវិន័យ ហ្វឹកហាត់ជំនាញកងកម្លាំង
៥-ពង្រឹងប្រសិទ្ធភាពការងារ និងរបៀបរបបការងារ ធ្វើការលើកទឹកចិត្តកងកម្លាំងដែលមានស្នាដៃល្អ ត្រូវមានលិខិតសរសើរ ដល់កងកម្លាំងដែលបានអនុវត្តការងារខ្ជាប់ខ្ជួន សកម្មការងារ និងមានស្នាដៃ តែត្រូវមានការដាក់វិន័យអ្នកមិនមកធ្វើការ ឬបានធ្វើល្មើសវិន័យ ៕
