នាយឧត្តមសេនីយ៍ ស ថេត អនុញ្ញាតឲ្យ នាយនគរបាលជាន់ខ្ពស់អូស្រ្តាលី ចូលជួបសម្តែងការគួរសម និងភាក្សាការងារ

ភ្នំពេញ៖ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នារសៀលថ្ងៃសុក្រ ១កើត ខែភទ្របទ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៥ ខែកញ្ញា ឆ្នាំ២០២៣ បានអនុញ្ញាតឲ្យ លោក Anthony maguire នាយនគរបាលជាន់ខ្ពស់ នៃនគរបាលសហព័ន្ធអូស្រ្តាលី AFP អមស្ថានទូតអូស្រ្តាលីប្រចាំកម្ពុជា ចូលជួបសម្តែងការគួរសម និងភាក្សាការងារ នៅទីស្តីការក្រសួងមហាផ្ទៃ។

ជាកិច្ចចាប់ផ្តើម លោក Anthony maguire បានសម្តែងនូវការអបអរសាទរជូនចំពោះ ឯកឧត្តម នាយឧត្តមសេនីយ៍ ស ថេត ដែលត្រូវបានព្រះមហាក្សត្រ ត្រាស់បង្គាប់តែងតាំងជា អគ្គស្នងការនគរបាលជាតិ។

ក្នុងជំនួបដ៏មានសារសំខាន់នេះដែរ ភាគីទាំងពីរកម្ពុជា-អូស្រ្តាលី បានពិភាក្សាគ្នាអំពីកិច្ចសហប្រតិបត្តិការរវាងស្ថាប័នអនុវត្តច្បាប់នៃប្រទេសទាំងពីរ ដោយផ្តោតសំខាន់លើការងារបណ្តុះបណ្តាល កសាងសមត្ថភាពមន្រ្តីនគរបាលជាតិកម្ពុជា លើជំនាញប្រយុទ្ធប្រឆាំងបទល្មើសឆ្លងដែនគ្រប់ប្រភេទ ជាពិសេសបទល្មើសសម្អាតប្រាក់ បទល្មើសគ្រឿងញៀន និងបទល្មើសបច្ចេកវិទ្យា។

ភាគីទាំងពីរ ក៏បានពិភាក្សាគ្នាលើវិស័យជាអាទិភាព ដែលនគរបាលជាតិកម្ពុជា និងនគរបាលសហព័ន្ធអូស្រ្តាលី បន្តអនុវត្តរួមគ្នានាពេលអនាគត ៕