ឯកឧត្តម នេត្រ ភក្ត្រា ថ្លែងអំណរគុណឯកឧត្តម ខៀវ កាញារីទ្ធ និងលោកជំទាវ ដែលខិតខំកសាងសមាគមនារីដើម្បីសន្តិភាព និងអភិវឌ្ឍន៍ក្រសួងព័ត៌មាន សម្រេចបានសមិទ្ធិផលជាច្រើន
ភ្នំពេញ៖ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានថ្លែងអំណរគុណចំពោះ ឯកឧត្តម ខៀវ កាញារីទ្ធ អតីតរដ្ឋមន្រ្តីក្រសួងព័ត៌មាន និងលោកជំទាវ ខៀវ ទេព រង្ស៊ី កាញារីទ្ធ ប្រធានកិត្តិយសសមាគម ដែលបានខិតខំប្រឹងប្រែងកសាងសមាគមនារីដើម្បីសន្តិភាពនិងអភិវឌ្ឍន៍ក្រសួងព័ត៌មាន អោយដំណើរការតាំងតែពីឆ្នាំ២០១៧ រហូតមកដល់ពេលនេះ ដោយសម្រេចបាននូវសមិទ្ធិផលសំខាន់ៗជាច្រើន ។
នៅព្រឹកថ្ងៃទី១៤ ខែកញ្ញា ឆ្នាំ២០២៣ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងលោកជំទាវ ទុយ សិរីរតនៈ បានអញ្ជើញជាអធិបតីក្នុងពិធីសំណេះសំណាលជាមួយសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ ក្រសួងព័ត៌មាន,ដែលបានធ្វើឡើង នៅសាលចតុម្មុខមង្គល ទីស្តីការក្រសួងព័ត៌មាន។
លោកជំទាវ សន ម៉ារ៉ា រដ្ឋលេខាធិការ និងជាប្រធានប្រតិបត្តិ សាខាសមាគមនារីដើម្បីសន្តិភាពនិងអភិវឌ្ឍន៍ក្រសួងព័ត៌មាន បានធ្វើរបាយការណ៍ស្តីពីសកម្មភាព និងលទ្ធផលការងារ សាខាសមាគម នារីកម្ពុជា ដើម្បីសន្តិភាពនិងអភិវឌ្ឍន៍ក្រសួងព័ត៌មាន ឆ្នាំ២០២៣ និងលើកទិសដៅត្រូវអនុវត្តន៍នៅក្នុងអាណត្តិទី ៧ ។ សមាគមនារីកម្ពុជា ដើម្បីសន្តិភាព និងអភិវឌ្ឍ៍ សាខាក្រសួងព័ត៌មាន ក្រៅអំពីការងារលើវិស័យព័ត៌មាន បានរួមចំណែកកសាងសមិទ្ធផលនានា ក្នុងវិស័យអាណាចក្រ និងពុទ្ធិចក្រ ដែលសុទ្ធសឹងផ្តើមចេញពីឆន្ទៈមនសិការបស់នារី នៃក្រសួងព័ត៌មាន រហូតទទួលបានការ គាំទ្រ និងលើកសសើរពីប្រមុខរាជរដ្ឋាភិបាលផងដែរ ។
ឯកឧត្តម រដ្ឋមន្ត្រី នេត្រ ភក្ត្រា បានថ្លែងនូវអំណរគុណចំពោះ ឯកឧត្តម ខៀវ កាញារីទ្ធ អតីតរដ្ឋមន្រ្តីក្រសួងព័ត៌មាន និងលោកជំទាវ ខៀវ ទេព រង្ស៊ី កាញារីទ្ធ ប្រធានកិត្តិយសសមាគម ដែលបានខិតខំប្រឹងប្រែងកសាងសមាគមនារីដើម្បីសន្តិភាពនិងអភិវឌ្ឍន៍ក្រសួងព័ត៌មាន អោយដំណើរការតាំងតែពីឆ្នាំ២០១៧ រហូតមកដល់ពេលនេះ ដោយសម្រេចបាននូវសមិទ្ធិផលសំខាន់ៗជាច្រើន ដែលទាំងនេះគឺជាគុណូបការៈដ៏ធំ របស់ ឯកឧត្តម និងលោកជំទាវ បន្សល់ទុកជាកកេរដំណែលរបស់ក្រសួងព័ត៌មាន ។ ជាមួយនេះក៏សូមអរគុណដល់ឯកឧត្តម លោកជំទាវ លោកស្រី ជាសមាជិក សមាជិកា សមាគមនារីដើម្បីសន្តិភាពនិងអភិវឌ្ឍន៍ក្រសួងព័ត៌មាន ដែលបានខិតខំបំពេញកិច្ចការងារប្រកបដោយ ការទទួលខុសត្រូវ ប្រសិទ្ធិភាព និងគុណភាព ហើយកន្លងមកនេះបានបង្ហាញនូវសាមគ្គីភាព យ៉ាងរឹងមាំក្រោមការដឹកនាំរបស់លោកជំទាវ ខៀវ ទេព រង្សុី កាញារីទ្ធ និងមានការគាំទ្រពី ឯកឧត្តម ខៀវ កាញារីទ្ធ ផ្ទាល់ទៅលើកិច្ចការងារនេះ ។
សមាជិក សមាជិការ សមាគមនារីកម្ពុជា ដើម្បីសន្តិភាព និងអភិវឌ្ឍន៍ សាខាក្រសួងព័ត៌មាន បាន ដើរតួនាទីយ៉ាងសំខាន់ក្នុងកិច្ចការងារសង្គមដូចជា ការចុះចែកជូនអំណោយដល់ជនរងគ្រោះនៅតាមមូលដ្ឋានជួយសង្រ្គោះដល់ចាស់ជរា ខ្វះខាតជីវភាព ការផ្តល់សម្ភារៈសិក្សា ជូនដល់កុមារទីទ័លក្រ ផ្តល់ជូននូវអំណោយ និងអាហារជូនដល់មណ្ឌលកុមារពិការ និងអូទីស្សឹមនៅក្រុងតាខ្មៅ ព្រមទាំងចូលរួមចំណែកកសាងអភិវឌ្ឍន៍វិស័យសាសនា ក៏ដូចជាការខិតខំបណ្តុះបណ្តាលកសាងសមត្ថភាពដល់នារី ក្នុងវិស័យសារព័ត៌មាន ជាដើម។
ជាជំហានទៅមុខទៀត សមាជិក សមាជិការសមាគមនារីក្រសួងព័ត៌មាន ទាំងអស់បន្តរួមសាមគ្គីគ្នាជាធ្លុងមួយ បង្កើនសកម្មភាពបន្តទៀតទៅលើសកម្មភាពទាំងអស់ដែលយើងបានធ្វើ ហើយអ្វីដែលសំខាន់គឺការគិតគូរបង្កើនសមត្ថភាពថ្មីៗបន្ថែមទៀត ដើម្បីធ្វើឱ្យសមាគមនារីនៃក្រសួងព័ត៌មានរបស់យើងកាន់តែមានភាពលេចធ្លោឡើង ។
ឯកឧត្តម រដ្ឋមន្រ្តី បានបញ្ជាក់ថា អ្វីដែលសមាគមនារីក្រសួងព័ត៌មាន ដែលមានកន្លងមករហូតមកដល់អាណត្តិទី៦ គឺនៅរក្សាដដែល រាល់សកម្មភាព រាល់ការគាំទ្រ ទាំងឡាយ ឯកឧត្តម រដ្ឋមន្រ្តី នេត្រ ភក្ត្រា គឺផ្តល់នូវការគាំទ្រ ដូចដែលមានការគាំទ្ររបស់ ឯកឧត្តម ខៀវ កាញារីទ្ធ ហើយអ្វីដែលសំខាន់ទៅមុខទៀតគឺ បន្ដរក្សាសកម្មភាព និងរួមសាមគ្គីគ្នាបន្ថែមទៀត ដើម្បីឱ្យស្របតាមចក្ខុវិស័យរបស់រាជរដ្ឋាភិបាលអាណត្តិថ្មី ៕
