ឯកឧត្តម ហ៊ុន ម៉ាណែត៖ ឪពុក ខ្ញុំបង្រៀនខ្ញុំតាំងពីក្មេង កុំឱ្យគិតថាខ្លួនជាកូននាយករដ្ឋមន្ត្រី តែត្រូវប្រកាន់ខ្លួនថាជាចៅរបស់កសិករ
ភ្នំពេញ៖ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រីនៃកម្ពុជា បានរំលឹកបណ្តាំរបស់សម្តេចតេជោ ហ៊ុន សែន ទូន្មានប្រៀនប្រដៅកាលពីក្មេងថា កូនឯងហាមដាច់ខាត កុំឱ្យគិតថាខ្លួនជាកូននាយករដ្ឋមន្ត្រី តែត្រូវប្រកាន់ខ្លួនថាជាចៅរបស់កសិករ ជាប្រចាំ ព្រោះតា យាយកូនឯងជាកសិករទេ កុំភ្លេចកំណើត ត្រូវនៅជាប់ជាមួយប្រជាពលរដ្ឋ ។
ក្នុងឱកាសអញ្ជើញចុះជួបកម្មករជិត ២ម៉ឺននាក់ នៅតំបន់ព្រៃស្ពឺ ខណ្ឌពោធិ៍សែនជ័យ នៅថ្ងៃទី២៩ ខែសីហា ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត បានបញ្ជាក់ថា «ហើយកិច្ចការងារនេះ ឪ ខ្ញុំបង្រៀនប្រាប់ខ្ញុំតាំងពីក្មេង គាត់ប្រាប់ថាកូនឯងហាមដាច់ខាត កុំឱ្យគិតថាខ្លួនជាកូននាយករដ្ឋមន្ត្រី តែត្រូវប្រកាន់ខ្លួនថាជាចៅរបស់កសិករ ជាប្រចាំ ព្រោះតា យាយកូនឯងជាកសិករទេ កុំភ្លេចកំណើត ត្រូវនៅជាប់ជាមួយប្រជាពលរដ្ឋ» ៕
