ឯកឧត្តម សន្តិបណ្ឌិត សុខ ផល អញ្ជើញចូលរួមកិច្ចប្រជុំពិគ្រោះយោបល់ថ្នាក់រដ្ឋមន្រ្តី ជាមួយដៃគូសន្ទនា ចិន កូរ៉េ ជប៉ុន និងបូកបី នៅប្រទេសឥណ្ឌូនេសុី

ភ្នំពេញ៖ ឯកឧត្តម សន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ នៅថ្ងៃទី២២ ខែសីហា ឆ្នាំ២០២៣ បានបន្តអញ្ជើញដឹកនាំប្រតិភូកម្ពុជា ចូលរួមកិច្ចប្រជុំពិគ្រោះយោបល់ថ្នាក់រដ្ឋមន្រ្តី ជាមួយដៃគូសន្ទនា រួមមាន ចិន ជប៉ុន កូរ៉េ និងបូកបី (ចិន, ជប៉ុន, កូរ៉េ) នៅទីក្រុងឡាប៊ូនបាចូ ប្រទេសឥណ្ឌូនេសុី។

នៅក្នុងកិច្ចប្រជុំនោះ ប្រទេសសមាជិកអាស៊ាន និងដៃគូសន្ទនា បានផ្លាស់ប្ដូរទស្សនៈគ្នាទៅវិញទៅមក លើកិច្ចសហប្រតិបត្តិការប្រយុទ្ធប្រឆាំងឧក្រិដ្ឋកម្មឆ្លងដែន និងពិភាក្សាបន្តពង្រឹងកិច្ចសហប្រតិបត្តិការបន្ថែម រវាងអាស៊ាន និងប្រទេសដៃគូនីមួយៗ ក៏ដូចជាដៃគូបូកបី តាមរយៈការរៀបចំ និងចាត់តាំងអនុវត្តប្រកបដោយប្រសិទ្ធភាពនូវផែនការសកម្មភាពនានាដែលបានឯកភាពដាក់ចេញកន្លងមក។

នៅរសៀលថ្ងៃទី២២នេះដែរ ឯកឧត្តម សន្តិបណ្ឌិត ក៏បានអញ្ជើញចូលរួមពិធីផ្ទេរតំណែងប្រធាននៃកិច្ចប្រជុំថ្នាក់រដ្ឋមន្ត្រីអាស៊ានទទួលបន្ទុកឧក្រិដ្ឋកម្មឆ្លងដែន លើកទី១៨ (18th AMMTC) ដែលត្រូវប្តូរវេនពីប្រទេសឥណ្ឌូនេស៊ី ជូនទៅប្រទេសឡាវ ដែលនឹងទទួលធ្វើជាម្ចាស់ផ្ទះរៀបចំកិច្ចប្រជុំនេះ ក្នុងខែសីហា ឆ្នាំ២០២៤ នៅទីក្រុងវៀងចន្ទន៍ នៃសាធារណរដ្ឋប្រជាធិបតេយ្យប្រជាមានិតឡាវ។

នាល្ងាចថ្ងៃដដែលនេះដែរ ឯកឧត្តម សន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ និងជាប្រធានប្រតិភូកម្ពុជា ក៏បានទទួលជួបពិភាក្សាការងារជាមួយ ឯកឧត្តម ស៊ី តាថុង អនុរដ្ឋមន្រ្តីនៃក្រសួងសន្តិសុខសាធារណៈចិន។ ភាគីទាំងពីរបានកោតសរសើរ និងវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការល្អទៅវិញទៅមករយៈពេលជាច្រើនឆ្នាំកន្លងមករវាងថ្នាក់ដឹកនាំគ្រប់កម្រិតនៃប្រទេសទាំងពីរ។

ក្នុងឱកាសនោះដែរ ភាគីទាំងពីរ ក៏បានពិភាក្សា និងផ្លាស់ប្តូរយោបល់លើកិច្ចការមួយចំនួនពាក់ព័ន្ធនឹងការងារពង្រឹងការអនុវត្តច្បាប់ ជាពិសេសបានគាំទ្រដល់ការពង្រឹង និងលើកកម្ពស់កិច្ចសហការប្រយុទ្ធប្រឆាំងឧក្រិដ្ឋកម្មឆ្លងដែន តាមរយៈយន្តការតំបន់ ជាពិសេសក្នុងក្របខណ្ឌមេគង្គ-ឡានឆាង ៕