អង្គការសម្ព័ន្ធមិត្តសត្វព្រៃ គាំទ្ររាជរដ្ឋាភិបាលកម្ពុជាក្នុងការពង្រីកផ្ទៃដីតំបន់ការពារធម្មជាតិ

ភ្នំពេញ៖ អង្គការសម្ព័ន្ធមិត្តសត្វព្រៃ ស្វាគមន៍ចំពោះអនុក្រឹត្យរបស់រាជរដ្ឋាភិបាលកម្ពុជា ដែលបានសម្រេចពង្រីកផ្ទៃដីតំបន់ការពារធម្មជាតិជាង៥៥ម៉ឺនហិកតា កាលពីសប្តាហ៍មុននេះ។

លិខិតរបស់អង្គការសម្ព័ន្ធមិត្តសត្វព្រៃ នៅថ្ងៃទី១៤ ខែសីហានេះ បានគាំទ្រចំពោះអនុក្រឹត្យលេខ១៧៣ស្តីពី«ការបង្កើតឧទ្យានជាតិភ្នំក្រវាញ» ដែលរួមបញ្ចូលគ្នារវាងឧទ្យានជាតិក្រវាញកណ្តាល និងឧទ្យានជាតិក្រវាញខាងត្បូង។

កញ្ញាបណ្ឌិត Suwanna Gauntlett មានប្រសាសន៍ថា «នេះគឺជាក្តីសុបិនរបស់អ្នកអភិរក្សទាំងអស់ដែលធ្វើការនៅជួរភ្នំក្រវាញ ដើម្បីទទួលបានទេសភាពរួមមួយ ដែលជានិមិត្តរូបនៃការការពារទីជម្រកទឹកដ៏សំខាន់បំផុត សម្រាប់ភាគនិរតីនៃប្រទេសកម្ពុជា»។

ដើម្បីជាការឆ្លើយតបទៅនឹងការចោទប្រកាន់ ដែលថាព្រំដែននៅតែមិនច្បាស់លាស់រវាងដីស្រែសហគមន៍ និងគម្រោង REDD+ អង្គការសម្ព័ន្ធមិត្តសត្វព្រៃ បញ្ជាក់ថា នេះមិនមែនជាការពិតទេ។ អង្គការក្រៅរដ្ឋាភិបាលមួយនេះ បានធ្វើការយ៉ាងជិតស្និទ្ធជាមួយសហគមន៍ចុង ដែលរស់នៅជ្រលងភ្នំឆាយអារ៉ែង ដើម្បីជួយកំណត់ព្រំប្រទល់ដីស្រែ និងតំបន់ប្រើប្រាស់សហគមន៍ ចាប់តាំងពីខែសីហា ឆ្នាំ២០១៥។

កញ្ញាបណ្ឌិត Suwanna បន្តថា «បន្ទាប់ពីមានការផ្អាកទំនប់វារីអគ្គីសនី ពួកយើងគឺជាស្ថាប័នដំបូងដែលបានចុះជួយដល់សហគមន៍ចុង។ ដំបូងឡើយ ការវាយតម្លៃជីវភាពរស់នៅត្រូវបានធ្វើឡើងនៅឆ្នាំ២០១៥ ហើយបន្តមកក៏មានការរៀបចំផែនការប្រើប្រាស់ដី តាមរយៈការចូលរួមដែលបានធ្វើឡើងនៅទូទាំងជ្រលងភ្នំក្នុងភូមិទាំង៦ ដែលមិនត្រូវបានវាស់វែងតាមលំដាប់លេខ០១ទេ។ ជាលទ្ធផល ផ្ទៃដីស្រែចម្ការចំនួន១,៧៩៩ហិកតា ត្រូវបានកំណត់ និងគូសផែនទីរួមគ្នា ជាមួយនឹងគ្រួសារចំនួន៣៤២គ្រួសារ មកពីឃុំប្រឡាយ និងឃុំជំនាប់។ តំបន់ដែលត្រូវបានកំណត់សម្រាប់ដីស្រែចម្ការមួយនេះ តំណាងឱ្យផ្ទៃដីកសិកម្មចំនួន៥,៦ហិកតាក្នុងមួយគ្រួសារ។

បើតាមសេចក្តីប្រកាសព័ត៌មានរបស់អង្គការសម្ព័ន្ធមិត្តសត្វព្រៃ បានបញ្ជាក់ថា ផលិតផលព្រៃមិនមែនឈើ ត្រូវបានអនុញ្ញាតឱ្យប្រមូលផលនៅក្នុងគម្រោង REDD+ នៃតំបន់ការពារតាំងពីឆ្នាំ២០០៨។ ទោះជាយ៉ាងណាក្តី ការកាប់ឈើ និងឈូសឆាយព្រៃនៅក្រៅតំបន់សហគមន៍ ទាមទារការអនុញ្ញាតពីក្រសួងបរិស្ថាន៕

ប្រភព៖ ក្រសួងព័ត៌មាន