ឯកឧត្តម សុខ សូកេន អំពាវនាវបងប្អូនប្រជាពលរដ្ឋឃុំស្អាងភ្នំឱ្យទៅបោះឆ្នោតគ្រប់ៗគ្នា និងបោះឆ្នោតជូនគណបក្សប្រជាជនកម្ពុជា ដែលមានរូបសញ្ញា «ទេវតាបាចផ្កា» លេខរៀងទី១៨

ភ្នំពេញ៖ ឯកឧត្តម សុខ សូកេន សមាជិកយុវជនគណបក្សប្រជាជនកម្ពុជាថ្នាក់កណ្តាល និងជាប្រធានក្រុមការងារយុវជនគណបក្សប្រជាជនកម្ពុជាប្រចាំក្រសួងការបរទេស និងសហប្រតិបត្តិការអន្តរជាតិ ក្នុងនាមជាប្រធានក្រុមការងារគណបក្សចុះមូលដ្ឋានឃុំស្អាងភ្នំ នាព្រឹកថ្ងៃទី២១ ខែកក្កដា ឆ្នាំ២០២៣ បានអញ្ជើញដឹកនាំសមាជិកសមាជិកាគណបក្សប្រជាជនកម្ពុជាប្រចាំឃុំស្អាងភ្នំ ចូលរួមក្នុងការដង្ហែរក្បួនបិទបញ្ចប់យុទ្ធនាការឃោសនាបោះឆ្នោតប្រចាំស្រុកស្អាង ដែលបានចេញដំណើរពីទីតាំងវត្ដព្រែកអំបិល ក្រោមអធិបតីភាព ឯកឧត្តម ទី សុគន្ធ អនុប្រធានក្រុមការងារគណបក្សចុះមូលដ្ឋានស្រុកស្អាង។ ដោយមានការចូលរួមប្រកបដោយសណ្តាប់ធ្នាប់របៀបរៀបរយ បរិយាកាសសប្បាយរីករាយ និងសំឡេងគាំទ្រកងរំពងចេញពីក្រអៅបេះដូងពីសំណាក់សមាជិក សមាជិកាគណបក្សប្រជាជានកម្ពុជានៃឃុំទាំង៦ ក្នុងស្រុកស្អាង សរុបចំនួនប្រមាណ ៣,០០០នាក់។

បន្ទាប់ពីការដង្ហែរក្បួនរួមគ្នា ឯកឧត្តមបានបន្តដឹកនាំក្បួនហែរកាត់ភូមិទាំង៩ក្នុងឃុំស្អាងភ្នំ ដោយមានសមាជិកប្រមាណជាង ៥០០នាក់ ដែលចូលរួមជិះម៉ូតូ និងរថយន្តតូចធំតាក់តែងលម្អដោយបដា ទង់ជាតិ ទង់បក្ស និងស្លាកសញ្ញាគណបក្ស ដើម្បីបង្ហាញពីការស្នេហាជាតិ និងការគាំទ្រប្រកបដោយភក្តីភាពចំពោះគណបក្សប្រជាជានកម្ពុជា។

ក្នុងពិធីសំណេះសំណាល និងពិសារអាហារសាមគ្គីជាមួយមហាគ្រួសារគណបក្សប្រជាជនឃុំស្អាងភ្នំ ក្រោយពេលបញ្ចប់ការដង្ហែរក្បួន ឯកឧត្តម សុខ សូកេន បានថ្លែងអំណរគុណដល់ប្រជាពលរដ្ឋ សម្រាប់ការគាំទ្រដ៏ស្មោះស្ម័គ្រនិងឥតងាករេចំពោះគណបក្សប្រជាជន ដែលបានដឹកនាំរក្សាសុខសន្តិភាព និងការអភិវឌ្ឍដ៏ត្រចេះត្រចង់លើគ្រប់វិស័យជូនសង្គមជាតិកម្ពុជា។

ជាមួយគ្នានេះ ឯកឧត្តម ក៏បានលើកឡើងអំពីភាពចាំបាច់របស់សមាជិកគណបក្សប្រជាជន ក្នុងការបំពេញកាតព្វកិច្ចរបស់ខ្លួនជាពលរដ្ឋល្អ ដោយចូលរួមបោះឆ្នោតឱ្យបានគ្រប់ៗគ្នា និងបោះឆ្នោតជូនគណបក្សប្រជាជនកម្ពុជាដែលមានលេខរៀងទី១៨ នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ ៕