ឯកឧត្តម ថេង ច័ន្ទសង្វារ៖ គណបក្សប្រជាជនកម្ពុជាតែងតែរួមរស់សុខទុក្ខជាមួយប្រជាជនកម្ពុជាគ្រប់កាលៈទេសៈ
ភ្នំពេញ៖ ឯកឧត្តម ថេង ច័ន្ទសង្វារ អនុប្រធានយុវជនគណបក្សថ្នាក់កណ្ដាល និងជាប្រធានក្រុមការងារគណបក្សចុះមូលដ្ឋានស្រុកត្បូងឃ្មុំ នារសៀលថ្ងៃអង្គារ ១កើត ខែទុតិយាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៨ ខែកក្កដា ឆ្នាំ២០២៣ បានអញ្ជើញជួបសំណេះសំណាលជាមួយសមាជិកបក្ស និងផ្សព្វផ្សាយគោលនយោបាយគណបក្សនិងណែនាំពីរបៀបគូសសន្លឹកឆ្នោតឱ្យបានត្រឹមត្រូវ នៅក្នុងភូមិពងទឹក និងភូមិច័ន្ទនិមិត្ត ឃុំរកាពប្រាំ ស្រុកត្បូងឃ្មុំ ខេត្តត្បូងឃ្មុំ។
ឯកឧត្តមបានថ្លែងថា គណបក្សប្រជាជនកម្ពុជាតែងតែរួមរស់សុខទុក្ខជាមួយប្រជាជនកម្ពុជាគ្រប់កាលៈទេសៈ តាំងពីដំណាក់កាលរំដោះប្រទេសកម្ពុជាពីរបបប្រល័យពូជសាសន៍ដ៏ឃោរឃៅ និងការបែកបាក់ជាតិសាសន៍ រហូតដល់ដំណាក់កាលប្រទេសទទួលបានសន្តិភាពពេញលេញ ឯកភាពជាតិ និងសុខដុមរមនីយភាពដូចបច្ចុប្បន្ន។ សមិទ្ធផលដ៏ថ្លៃថ្លាមាននេះជាមូលដ្ឋានគ្រឹះដើម្បីធានាវឌ្ឍនភាពសង្គមនិងសេដ្ឋកិច្ចកម្ពុជា ហើយថ្នាក់ដឹកនាំគណបក្សប្រជាជនកម្ពុជានឹងបន្តរក្សាសន្តិភាព កសាងនិងការពារមាតុភូមិជាតិ ដើម្បីកម្ពុជាឈានទៅរីកចម្រើនមួយកម្រិតទៀត។
ឯកឧត្តមក៏បានថ្លែងអំពាវនាវដល់សមាជិកគណបក្សប្រជាជនកម្ពុជានៅក្នុងភូមិទាំងពីរ ដែលមានសិទ្ធិបោះឆ្នោត ត្រូវគូសលើសន្លឹកឆ្នោតឱ្យបានត្រឹមត្រូវ និងសូមអញ្ជើញទៅបោះឆ្នោតគាំទ្រគណបក្សប្រជាជនកម្ពុជា ដែលមានរូបសញ្ញាទេវតាបាចផ្កា និងមានលេខរៀងទី១៨ ឱ្យបានគ្រប់គ្នា ដើម្បីធានាសន្តិភាព និងការអភិវឌ្ឍបន្តទៀត។
ជាមួយគ្នានេះ ឯកឧត្តមក៏បានណែនាំដល់សមាជិកគណបក្សគ្រប់រូបឱ្យត្រៀមអត្តសញ្ញាណបណ្ណសម្រាប់ការបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ខាងមុខ។ ក្នុងករណីមានការបាត់បង់ ឬខូចខាត ត្រូវទាក់ទងទៅកាន់មេភូមិនៅក្នុងមូលដ្ឋានរបស់ខ្លួន ដើម្បីសម្របសម្រួលធ្វើឯកសារបញ្ជាក់អត្តសញ្ញាណ (ឯ.អ) ដើម្បីអាចបោះឆ្នោតបាន។
អង្គពិធីទាំងមូលបានប្រកាសគាំទ្រជាឱឡារិកសម្តេចអគ្គមហាសេនាបតីតេជោ ហ៊ុន សែន ជាបេក្ខជននាយករដ្ឋមន្ត្រីសម្រាប់នីតិកាលទី៧ នៃរដ្ឋសភា និងគាំទ្រឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រីសម្រាប់ពេលអនាគត ៕
