ក្រោយផ្ទុះជម្ងឺសារទឹកលើសត្វក្របីជាច្រើនក្បាលនៅឃុំប្រាសាទ ស្រុកព្រះនេត្រព្រះ មន្ត្រីពេទ្យសត្វបានចុះព្យាបាលនិងទប់ស្កាត់

បន្ទាយមានជ័យ៖ ផ្ទុះជម្ងឺសារទឹកលើសត្វក្របីជាច្រើនក្បាលនៅសហគមន៍សត្វក្របីដ៏ធំក្នុងឃុំប្រាសាទ ស្រុកព្រះនេត្រព្រះខេត្តបន្ទាយមានជ័យ ដែលជាផ្នែកមួយនៃវាលទំនាបតំបន់២និងតំបន់៣ បឹងទន្លេសាប ។ចំណែកនៅឃុំតាអំស្រុកក្រឡាញ់ខេត្តសៀមរាបនិងឃុំកោះជីវាំងស្រុកឯកភ្នំខេត្តបាត់ដំបងជាប់ព្រំប្រទល់គ្នានោះក៏ផ្ទុះស្រដៀងគ្នាដែរ។បាតុហេតុនេះបាន កើតឡើងរយៈពេល១សប្តាហ៍មកហើយមកទល់ថ្ងៃនេះ ។

ដោយឡែកសម្រាប់ភូមិសាស្ត្រខេត្តបន្ទាយមានជ័យ មន្ត្រីពេទ្យសត្វ(ការិយាល័យផលិតកម្មនិងបសុព្យាបាលនៃមន្ទីរកសិកម្ម រុក្ខាប្រមាញ់និងនេសាទខេត្ត) ការិយាល័យកសិកម្ម ធនធានធម្មជាតិ បរិស្ថានស្រុកនិងពេទ្យសត្វភូមិបានចុះទៅឆ្លើយតបហើយ។នេះបើតាមលោកហ៊ុយ ទូច ប្រធានការិយាល័យផលិតកម្មនិងបសុព្យាបាលនៃមន្ទីរកសិកម្ម រុក្ខាប្រមាញ់និងនេសាទខេត្តបន្ទាយមានជ័យប្រាប់ឲ្យដឹងនៅថ្ងៃទី១៩ខែកក្កដាឆ្នាំ២០២៣ ។

លោកបានឲ្យដឹងទៀតថា ក្រុមអន្តរាគមន៍ការិយាល័យសហការជាមួយលោក ឃ្លោក សារី ផ្នែកបសុព្យាបាលនៃការិយាល័យកសិកម្ម ធនធានធម្មជាតិ និងបរិស្ថានស្រុកព្រះនេត្រព្រះ អាជ្ញាធរឃុំប្រាសាទ ភ្នាក់ងារសុខភាពសត្វភូមិ និងប្រជាកសិករជាម្ចាស់សត្វចំនួន ០៥គ្រួសារ នៅ៣ភូមិផ្សេងគ្នា គឺភូមិកំព្រាម, ភូមិចារ និងភូមិតាអំ  ឃុំប្រាសាទដែលមានសត្វក្របីសរុប ១៨៨ក្បាល បានធ្វើការដោះស្រាយរួមគ្នា។ក្នុងនោះមន្ត្រីក្រុមការងារបានរកឃើញថា មាន០៥គ្រួសារ ដែលមានក្របីសរុប ៥២ក្បាល ឈឺ២៣ក្បាល (ធ្ងន់ ០៣ក្បាល) ងាប់ ២០ក្បាល ។រយៈពេលឈឺមាន១សប្តាហ៍មកហើយ ដែលគេសង្ស័យជាជំងឺសារទឹក។

តាមទិន្នន័យចុងក្រោយមួយពីមន្ត្រីចុះប្រតិបត្តិការបានបង្ហើបថា ក្នុងចំណោមក្របី១០០ក្បាល មាន៨០ក្បាលបានឈឺជម្ងឺសារទឹក ។ប៉ុន្តែយុទ្ធនាការចុះព្យាបាលដោយមន្ត្រីនិងភ្នាក់ងារពេទ្យសត្វបានធ្វើអោយជម្ងឺសត្វក្របីបានជាសះស្បើយឡើងវិញបណ្តើរៗហើយ ។

លោកហ៊ុយ ទូច បានបញ្ជាក់ថា ជាវិធានការបច្ចេកទេស  ក្រុមការងារបានបែងចែកគ្នាជា០២ក្រុម ៖ ក្រុមទី១ ចុះទៅពិនិត្យព្យាបាលសត្វក្របីទាំង៥គ្រួសារបានចំនួន ២៣ក្បាល ដោយបានហៅប្រជាកសិករដែលមានចិញ្ចឹមសត្វក្របី គោ ផ្សព្វផ្សាយពីបច្ចេកទេស ដោយមិនត្រូវពិឃាត ឬបរិភោគសាច់សត្វក្របីដែលឈឺងាប់នោះឡើយ ។ត្រូវបំបែកសត្វឈឺចេញពីសត្វជា ,មិនត្រូវចងសត្វនៅកន្លែងក្តៅខ្លាំងនោះទេ ។ជាទិសដៅបន្ត ត្រៀមចុះបាញ់ថ្នាំសម្លាប់មេរោគបន្ថែមទៀត នៅថ្ងៃបន្តបន្ទាប់ ។ទោះយ៉ាងណាក្នុងស្ថានភាពបឋម មន្ត្រីជំនាញពេទ្យសត្វអាចគ្រប់គ្រងជំងឺបាននេះ ។

លោកហ៊ុយ ទូច  បានឲ្យដឹងថា ការផ្ទុះជម្ងឺសារទឹកនេះ  វាបានរាលដាលនៅឃុំនៃស្រុក៣ជាប់ព្រំទល់៣ខេត្ត បន្ទាយមានជ័យ  សៀមរាបនិងបាត់ដំបងដែលជាសហគមន៍មានចិញ្ចឹមក្របីរាប់ពាន់ក្បាល ។ហេតុនេះ  ពេលក្របីវាផ្ទុះកើតជម្ងឺ   ពួកវានៅនឹងវាលពាសវាលពាសកាល ក្រៅក្រោល ដែលពិបាកខ្លាំងណាស់ក្នុងទប់ស្កាត់នូវការឆ្លងជម្ងឺ ។ ម្យ៉ាងទៀត បងប្អូនប្រជាកសិករម្ចាស់សត្វក្របី មិនសូវយល់ស្របឬស្តាប់តាមការណែនាំ ផ្សព្វផ្សាយ ការចុះចាក់វ៉ាក់សាំងរបស់មន្ត្រីឡើយ ។

លោកតោ មេសា អនុប្រធានការិយាល័យផលិតកម្ម និងបសុព្យាបាលខេត្តបន្ទាយមានជ័យ នៅការិយាល័យ   មន្ត្រីបានបែងចែកសម្ភារ បរិក្ខាបសុពេទ្យ និង ថ្នាំការពារជំងឺសារទឹកគោក្របី ថ្នាំព្យាបាលជូនដល់ផ្នែកបសុព្យាបាលស្រុក/ក្រុងទាំង ០៩ សម្រាប់ឆមាសទី១ ឆ្នាំ២០២៣ ដែលការិយាល័យទើបទទួលបានពីអគ្គនាយកដ្ឋានសុខភាពសត្វ និងផលិតកម្មសត្វនាពេលថ្មីៗនេះ ។បានចុះចាក់វ៉ាក់សាំងសារទឹកគោជូនប្រជារាស្ត្រនៅក្នុងភូមិអូរបីជាន់ ចាក់បាន២១៥ក្បាល៕