នាយឧត្តមសេនីយ៍ គៀត ច័ន្ទថារិទ្ធ ដឹកនាំកិច្ចប្រជុំត្រួតពិនិត្យឯកសារពាក់ព័ន្ធនានា សម្រាប់ត្រៀមចូលរួមប្រជុំ ( DGICM ) នៅប្រទេសថៃ

ភ្នំពេញ៖​ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ នាព្រឹកថ្ងៃអង្គារ ៩រោច ខែបឋមាសាឍ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី១១ ខែកក្កដា ឆ្នាំ២០២៣ បានដឹកនាំកិច្ចប្រជុំជាមួយក្រុមការងាររៀបចំ និងតាមដានកិច្ចប្រជុំប្រចាំឆ្នាំរបស់អគ្គនាយកអន្តោប្រវេសន៍ និងប្រធានកុងស៊ុលអាស៊ាន (ហៅកាត់ DGICM) ដើម្បីត្រៀមរៀបចំចូលរួមកិច្ចប្រជុំ DGICM លើកទី២៦ នៅខែសីហា ឆ្នាំ២០២៣ ខាងមុខនេះ ដែលនឹងរៀបចំឡើងនៅប្រទេសថៃ។

ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយក បានពិនិត្យលើឯកសារ និងបន្តផ្តល់មតិដឹកនាំចំពោះក្រុមការងារ ក្នុងការរៀបចំរបាយការណ៍ឱ្យបានត្រឹមត្រូវ ច្បាស់លាស់ទៅតាមស្ថានភាពសភាពការណ៍រួម របស់ប្រទេសកម្ពុជា ក៏ដូចជាបានពិនិត្យទៅលើរបៀបវារៈនៃកិច្ចប្រជុំ ដើម្បីធានាឱ្យបានចំពោះការឆ្លើយតប ក្នុងនាមជាប្រតិភូតំណាងកម្ពុជា សម្រាប់កិច្ចប្រជុំនេះ។

ឯកឧត្តម នាយឧត្តមសេនីយ៍ អគ្គនាយក ក៏បានធ្វើការផ្តល់មតិដឹកនាំដល់ក្រុមការងារត្រូវគិតគូរដោយល្អិតល្អន់ អំពីទិសដៅការងារបន្ត ដែលអគ្គនាយកដ្ឋានអន្តោប្រវេសន៍កម្ពុជាបានអនុវត្តស្របទៅតាមលទ្ធផល នៃកិច្ចប្រជុំ DGICM បានសម្រេចនាឆ្នាំកន្លងទៅ ៕