នាយឧត្តមសេនីយ៍ កែវ វណ្ណថន ទទួលជួបពិភាក្សាការងារជាមួយ ប្រធានទទួលបន្ទុកផ្នែកកិច្ចការឧក្រិដ្ឋកម្មអន្តរជាតិ ក្រសួងយុត្តិធម៌កូរ៉េ

ភ្នំពេញ៖ ឯកឧត្តម នាយឧត្តមសេនីយ៍ កែវ វណ្ណថន អគ្គនាយករងអន្តោប្រវេសន៍ តំណាងឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ នាព្រឹកថ្ងៃព្រហស្បតិ៍ ៤រោច ខែបឋមសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៦ ខែកក្កដា ឆ្នាំ២០២៣ បានអនុញ្ញាតឲ្យលោក LEE JI HYUNG រដ្ឋអាជ្ញា និងជាប្រធានទទួលបន្ទុកផ្នែកកិច្ចការឧក្រិដ្ឋកម្មអន្តរជាតិ ក្រសួងយុត្តិធម៌ នៃសាធារណរដ្ឋកូរ៉េ ព្រមទាំងសហការី និងកុងស៊ុលប្រចាំស្ថានទូតសាធារណរដ្ឋកូរ៉េនៅកម្ពុជា ចូលជួបសម្តែងការគួរសម និងពិភាក្សាការងារ នៅអគ្គនាយកដ្ឋានអន្តោប្រវេសន៍ ក្រសួងមហាផ្ទៃ។

ជាកិច្ចចាប់ផ្តើម ឯកឧត្តម នាយឧត្តមសេនីយ៍ កែវ វណ្ណថន បានមានមតិស្វាគមន៍ចំពោះគណៈប្រតិភូក្រសួងយុត្តិធម៌ នៃសាធារណរដ្ឋកូរ៉េ ដែលបានមកបំពេញបេសកកម្មនៅព្រះរាជាណាចក្រកម្ពុជា និងវាយតម្លៃខ្ពស់ចំពោះកិច្ចសហប្រតិបត្តិការរវាងប្រទេសទាំងពីរ ជាពិសេសរវាងអគ្គនាយកដ្ឋានអន្តោប្រវេសន៍ និង ស្ថានទូតកូរ៉េប្រចាំនៅកម្ពុជា ក៏ដូចជាស្ថាប័នរដ្ឋអាជ្ញាកូរ៉េផងដែរ។

លោក LEE JI HYUNG បានថ្លែងអំណរគុណចំពោះអគ្គនាយកដ្ឋានអន្តោប្រវេសន៍ ដែលកន្លងមកបានផ្តល់កិច្ចសហការល្អជាមួយអាជ្ញាធរកូរ៉េ ក្នុងការបង្ការទប់ស្កាត់បទល្មើសឆ្លងដែនគ្រប់ប្រភេទ ជាពិសេសការស្វែងរកមុខសញ្ញាគេចខ្លួនពីសំណាញ់ច្បាប់នៅក្រៅប្រទេស ដើម្បីអនុវត្តតាមនីតិវិធីច្បាប់។

ភាគីទាំងពីរ បានចែករំលែកបទពិសោធន៍ និងផ្លាស់ប្តូរចំណេះដឹងពាក់ព័ន្ធនឹងច្បាប់-លិខិតបទដ្ឋានគតិយុត្តិ ពាក់ព័ន្ធនឹងវិស័យអនុវត្តច្បាប់នៃប្រទេសទាំងពីរ ដើម្បីបង្កើនកិច្ចសហប្រតិបត្តិការរវាងស្ថាប័នទាំងពីរ ៕