មន្ត្រីកាកបាទក្រហមកម្ពុជា ចុះពិនិត្យការងារផ្សព្វផ្សាយពីចំណាកស្រុកប្រកបដោយសុវត្ថិភាព និងទប់ស្កាត់ការជួញដូរមនុស្ស នៅស្រុកបរសេដ្ឋ ខេត្តកំពង់ស្ពឺ
ភ្នំពេញ៖ នៅថ្ងៃទី២១ ដល់ ២៣ខែតុលា ឆ្នាំ២០២៣នេះ លោក ម៉ម ដារ៉ូ អនុប្រធានការិយាល័យអប់រំមីន និងស្តារទំនាក់ទំនង រួមជាមួយក្រុមការងារ បានអមដំណើរប្រតិភូ អាយ.ស៊ី.អរ.ស៊ី ចុះពិនិត្យការងារអប់រំផ្សព្វផ្សាយលើកកម្ពស់ការយល់ដឹងអំពីការធ្វើចំណាកស្រុកប្រកបដោយសុវត្ថិភាព ការទប់ស្កាត់ការជួញដូរមនុស្ស និងសេវាកម្មស្តារទំនាក់ទំនងគ្រួសារ នៅតាមភូមិចំនួន៣ ក្នុងឃុំបរសេដ្ឋ ស្រុកបរសេដ្ឋ ខេត្តកំពង់ស្ពឺ ដែលមានប្រជាពលរដ្ឋចូលរួមសរុប ចំនួន៩០នាក់ ស្រី ៧២នាក់ ក្នុងនោះមកពីភូមិព្រៃរំដួលខាងជើង ៣០នាក់ ភូមិស្មាតលីង ៣០នាក់ និងភូមិបឹងស្តុក ៣០នាក់។
ជាលទ្ធផលទទួលបាន ក្រុមការងារបានមើលឃើញថា សកម្មភាពអប់រំផ្សព្វផ្សាយអំពីការធ្វើចំណាកស្រុកប្រកបដោយសុវត្ថិភាពរបស់អ្នកស្ម័គ្រចិត្តជូនដល់ប្រជាពលរដ្ឋបានយ៉ាងល្អប្រសើដោយលើកយកចំណុចសំខាន់ៗ ពីការចំណាកស្រុកដោយខុសច្បាប់ និងស្របច្បាប់ជូនដល់ប្រជាពលរដ្ឋដែលបានចូលរួមស្តាប់កាន់តែយល់ដឹងច្បាស់អំពីការធ្វើចំណាកស្រុក ដើម្បីឱ្យការធ្វើចំណាកស្រុករបស់ពួកគាត់ទទួលសុខសុវត្ថិភាព និងលើកកម្ពស់ជីវភាពរស់នៅផងដែរ។ បន្ថែមលើនេះ ក្រុមការងារបានពន្យល់បន្ថែមអំពីនីតិវិធីនៅពេលដែលបងប្អូនធ្វើចំណាកស្រុកហើយត្រូវបានបាត់ដំណឹងឬព័ត៌មានពីក្រុមគ្រួសារ សូមបងប្អូនទំនាក់ទំនងមកកាកបាទក្រហមកម្ពុជា កាកបាទក្រហមអន្តរជាតិ ឬ ស្ថាបនពាក់ព័ន្ធនានា។
គួរំលឹកបន្ថែមថា ការចុះពិនិត្យសកម្មភាពរបស់មន្ត្រីនៅតាមសាខាគឺជាសកម្មភាពមួយដែលមានសារៈសំខាន់មិនអាចខ្វះបាន ដើម្បីជួយពង្រឹងការអនុវត្តសកម្មភាពការងារឱ្យកាន់តែប្រសើ និងទទួលបានលទ្ធផលតាមផែនការរំពឹងទុក។
លើសពីនេះ ក្រុមការងារបានសង្កេតឃើញថាការផ្សព្វផ្សាយនៅតាមខ្នងផ្ទះមិនទាន់អាចផ្តល់ព័ត៌មានគ្រប់ជ្រុងជ្រោយទៅដល់បងប្អូនប្រជាពលរដ្ឋដែលធ្វើចំណាកស្រុកនៅឡើយ ដូចនេះក្រុមការងារបានកំពុងសិក្សារៀបចំបើកវគ្គផ្សព្វផ្សាយពីការធ្វើចំណាកស្រុកប្រកបដោយសុវត្ថិភាព ដល់ប្រជាប្រជាពលរដ្ឋដែលជាសិក្ខាកាមដែលកំពុងបណ្តុះបណ្តាលនៅតាមសាលារៀន និងក្រុមហ៊ុនដែលនាំពលករទៅធ្វើការនៅក្រៅប្រទេស ដើម្បីឱ្យចំគោលដៅ ដល់ប្រជាពលរដ្ឋត្រៀមចំណាកស្រុកឱ្យយល់ដឹងកាន់តែច្បាស់មុនពេលសម្រេចចិត្ត ធានាបានថាពួកគាត់ចំណាកស្រុកដោយស្របច្បាប់ និងមិនត្រូវបានចាញ់បោក ឬត្រូវបានជួញដូរជាដើម៕
