មន្ទីរអប់រំខេត្តបន្ទាយមានជ័យ រៀបចំកិច្ចប្រជុំប្រចាំត្រីមាសទី១ សម្រាប់កម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍
បន្ទាយមានជ័យ៖ មន្ទីរអប់រំ យុវជន និងកីឡាខេត្តបន្ទាយមានជ័យ បានរៀបចំកិច្ចប្រជុំប្រចាំត្រីមាសទី១ សម្រាប់កម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍ នៅស្រុកគោលដៅចំនួន៤ នៅក្នុងខេត្ត ក្នុងគោលបំណងដើម្បីស្វែងរកបញ្ហាប្រឈម និងរកដំណោះស្រាយ រួមគ្នានៃការអនុវត្តកម្មវិធីស្បៀងអាហារតាមសាលារៀនឱ្យមានការអនុវត្តឱ្យកាន់តែល្អប្រសើរ។ កិច្ចប្រជុំនេះធ្វើឡើងនៅព្រឹកថ្ងៃទី១៩ ខែមិថុនា ឆ្នាំ២០២៣ នៅសាលប្រជុំមន្ទីរអប់រំយុវជន និងកីឡាខេត្ត។
លោកស្រី រស់ សុផានី អភិបាលរងខេត្តបន្ទាយមានជ័យបានលើកឡើងថា ការអនុវត្តកម្មវិធីផ្ដល់អាហារតាមសាលារៀនដោយប្រើប្រាស់កសិផលក្នុងសហគមន៍ ស្ថិតក្រោមឆ័ត្រគាំពារសង្គមផ្នែកជំនួយសង្គម មានទិដ្ឋភាពផ្ដល់គុណប្រយោជន៍ចំនួនបីគឺ ១)ទិដ្ឋភាពអប់រំ ដោយបានបង្កើនអត្រាចុះឈ្មោះចូលរៀន មករៀនទៀងទាត់និងទាន់ពេល បង្កើនវត្តមាន បង្កើនអត្រាឡើងថ្នាក់ ផ្ដល់ឱកាស ឱ្យពួកគេបន្តរៀនចប់កម្រិតបឋមសិក្សា។ ២)ទិដ្ឋភាពសុខភាព ដោយបានជួយបង្កើនអាហារូបត្ថម្ភចម្រុះដល់ក្រុមកុមារគោលដៅ ឱ្យមានកាយសម្បទារឹងមាំ បញ្ញាស្មារតីឈ្លាសវៃ ផ្ដោតអារម្មណ៍លើការសិក្សា ទទួល បានលទ្ធផលល្អ។ ៣)ទិដ្ឋភាពគាំពារសង្គម បង្កើនសេដ្ឋកិច្ចគ្រួសារនៅតាមសហគមន៍គោលដៅ តាមរយៈការបង្កើតមុខរបរ ជូនប្រជាកសិករ ឬកសិដ្ឋានខ្នាតតូច ក្នុងការដាំដុះដំណាំ និងចិញ្ចឹមសត្វ ត្រី បានកាន់តែមានគុណភាព និងប្រសិទ្ធភាព។
លោកស្រី រស់ សុផានី ណែនាំតាមបណ្តារសាលារៀនចូលរួមប្រើប្រាស់កសិផលក្នុងសហគមន៍ ដោយប្រើប្រាស់ធនធានដែលសាលារៀនមានទាំងអស់ សម្រាប់គាំទ្រដល់សកម្មភាព ផ្តល់អាហារតាមសាលារៀន ។ ក៏ដូចជា ដើម្បីធានាបាននូវម្ហូបអាហារ មានសុខភាព និងសុវត្ថិភាព ដល់អ្នកទទួលទាន និងទាមទារឱ្យមានការយកចិត្តទុកដាក់ខ្ពស់ ពីគណៈគ្រប់គ្រងកម្មវិធីគ្រប់លំដាប់ថ្នាក់ ពិសេស ថ្នាក់មូលដ្ឋាន សាលារៀន និងពិសេសបំផុតគឺចុងភៅ ដោយគិតចាប់ពីពេលទទួលស្បៀងយកមកទុកដាក់ សកម្មភាពរៀបចំ និងដំណើរការចម្អិនម្ហូបអាហារ រហូតពេលរៀបចំចែកចាយម្ហូបអាហារទៅតាម ការកំណត់របស់ សាលារៀននីមួយៗ។
តាមការបញ្ជាក់ឱ្យដឹងពីលោក ឈូរ ប៊ុនរឿង ប្រធានមន្ទីរអប់រំយុវជន និងកីឡាខេត្ត ឱ្យដឹងថា ស្រុកគោលដៅដែលបានអនុវត្តមានចំនួន៤ស្រុកមាន ស្រុកភ្នំស្រុក, ថ្មពួក, មង្គលបូរី, និងស្រុកម៉ាឡៃ ស្មើនឹង ១៥ឃុំ ៤៩ភូមិ នឹង៤៩សាលា ផ្តោតទៅលើអាហារតាមសាលាបឋមសិក្សា។ ក្នុងនោះស្រុក មង្គលបូរី មាន ៤សាលា, ស្រុក ម៉ាឡៃ មាន ១៨ សាលា, ស្រុក ថ្មពួកមាន១៦ សាលា, ស្រុក ភ្នំស្រុកមាន១១ សាលា។
លោប្រធានមន្ទីរបន្តថា សាលាទាំង៤៩ មានសិស្សទទួលផលសិស្សទទួលផលសរុប ១៥,៤៥៤នាក់(ស្រី ១៤៧១ នាក់)៕
