នាយឧត្តមសេនីយ៍ ប៉ោ ភក្តិ ដឹកនាំគណៈប្រតិភូ SOMTC-កម្ពុជា ទៅចូលរួមកិច្ចប្រជុំមន្ត្រីជាន់ខ្ពស់អាស៊ាន ទទួលបន្ទុកឧក្រិដ្ឋកម្មឆ្លងដែន លើកទី២៣ នៅប្រទេសឥណ្ឌូនេស៊ី

ភ្នំពេញ៖ ឯកឧត្តម នាយឧត្តមសេនីយ៍ ប៉ោ ភក្តិ អគ្គលេខាធិការ នៃអគ្គលេខាធិការដ្ឋានក្រសួងមហាផ្ទៃ និងជាប្រធានក្រុមការងារឧក្រិដ្ឋកម្មឆ្លងដែនកម្ពុជា (SOMTC-កម្ពុជា) នារសៀលថ្ងៃអាទិត្យទី១៨ ខែមិថុនា ឆ្នាំ២០២៣នេះ បានអញ្ជើញដឹកនាំគណៈប្រតិភូ SOMTC-កម្ពុជា ទៅចូលរួមកិច្ចប្រជុំមន្ត្រីជាន់ខ្ពស់អាស៊ាន ទទួលបន្ទុកឧក្រិដ្ឋកម្មឆ្លងដែន លើកទី២៣ និងកិច្ចប្រជុំពាក់ព័ន្ធ (23rd SOMTC and Its Related Meetings) នៅទីក្រុង Yogyakarta នៃប្រទេសឥណ្ឌូនេស៊ី ដែលនឹងប្រព្រឹត្តទៅចាប់ពីថ្ងៃទី១៩ ដល់ ទី២៤ ខែមិថុនា ឆ្នាំ២០២៣។

សូមជម្រាបជូនផងដែរថា នេះគឺជាកិច្ចប្រជុំដោយផ្ទាល់លើកទី១ បន្ទាប់ពីមានការខកខានរយៈពេល៣ឆ្នាំចុងក្រោយ ដោយសារបញ្ហាជំងឺកូវីដ-១៩​ (ឆ្នាំ២០២០-២០២២) ដែលកិច្ចប្រជុំ SOMTCនេះបានធ្វើការផ្លាស់ប្តូរមកប្រជុំតាមរយៈប្រព័ន្ធអនឡាញវិញ​។ ដោយក្នុងឆ្នាំ២០២៣នេះ បញ្ហាជំងឺកូវីដ-១៩ បានមានភាពធូរស្រាល កិច្ចប្រជុំដ៏មានសារសំខាន់នេះបាន
រៀបចំធ្វើដោយផ្ទាល់ឡើងវិញ​ នៅទីក្រុង Yogyakarta​ ប្រទេសឥណ្ឌូនេស៊ី។

នៅក្នុងឱកាសនៃដំណើរបំពេញទស្សនកិច្ច ក៏ដូចជាការអញ្ជើញចូលរួមកិច្ចប្រជុំនេះដែរ ឯកឧត្តម នាយឧត្តមសេនីយ៍ ប៉ោ ភក្តិ អគ្គលេខាធិការ នៃអគ្គលេខាធិការដ្ឋានក្រសួងមហាផ្ទៃ និងជាប្រធានក្រុមការងារឧក្រិដ្ឋកម្មឆ្លងដែនកម្ពុជា (SOMTC-កម្ពុជា) មានក្តីរំពឹងថា​ទុកនឹងមានកិច្ចប្រជុំទ្វេភាគីជាមួយបណ្តាប្រទេសជាដៃគូសន្ទនារបស់ SOMTC មួយចំនួនផងដែរ ៕