កាកបាទក្រហមកម្ពុជាខេត្តកំពង់ចាម រៀបចំប្រារព្ធ ព្រះរាជពិធីចម្រើនព្រះជន្មថ្វាយហ្លួងម៉ែ ព្រះប្រធានកិត្តិយសកាកបាទក្រហមកម្ពុជា គម្រប់ ៨៧ យាងចូល ៨៨ ព្រះវស្សា
ភ្នំពេញ៖ នៅថ្ងៃទី១៦ ខែមិថុនា ឆ្នាំ២០២៣ឯកឧត្តម អ៊ុន ចាន់ដា ប្រធានគណៈកម្មាធិការសាខាកាកបាទក្រហមកម្ពុជាខេត្ត និងឯកឧត្តមប្រធានក្រុមប្រឹក្សាខេត្ត រួមជាមួយ ព្រះវត្តមាន ព្រះសីលសំវរ ព្រះនាគមុនី ព្រះមេគណខេត្ត ព្រះមន្ត្រីសង្ឃ ឯកឧត្តម លោកជំទាវ លោក លោកស្រី ក្នុងគណ:កិត្តិយសសាខា ថ្នាក់ដឹកនាំ សមាជិក សមាជិកា គណៈកម្មាធិការសាខា ប្រធានក្រុមកាកបាទក្រហមកម្ពុជា មន្ទីរអង្គភាពជុំវិញខេត្ត មន្ត្រីប្រតិបត្តិ យុវជន អ្នកស្ម័គ្រចិត្តកាកបាទក្រហមកម្ពុជា ព្រមទាំង អនុសាខា ស្រុកកំពង់សៀម សរុប ១៤៩ នាក់ បាននិមន្ត និងអញ្ជើញចូលរួមក្នុងព្រះរាជពិធីបុណ្យចម្រើនព្រះជន្ម សម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយស កាកបាទក្រហមកម្ពុជា ជាទីគោរពសក្ការ:ដ៏ខ្ពង់ខ្ពស់បំផុត គម្រប់ព្រះជន្ម ៨៧ យាងចូល ៨៨ព្រះវស្សា ដែលបានប្រព្រឹត្តទៅ នាវត្តភ្នំជ័យគិរី ហៅវត្តភ្នំហាន់ជ័យ ឃុំហាន់ជ័យ ស្រុកកំពង់សៀម។
ឯកឧត្តម អ៊ុន ចាន់ដា ព្រមទាំង ឯកឧត្តម លោកជំទាវ លោក លោកស្រី ក្នុង គណៈកិត្តិយស គណៈ:កម្មាធិការ និងសហការី នៃសាខាកាកបាទក្រហមកម្ពុជា ខេត្តកំពង់ចាម សូមព្រះបរមរាជានុញ្ញាត លើកហត្ថប្រណម្យបង្គំទូលថ្វាយ ព្រះសព្ទសាធុការពរជ័យ បវរសួស្តី សិរីវឌ្ឍនមង្គល គ្រប់ប្រការ ថ្វាយសម្តេចព្រះមហាក្សត្រី នរោត្តម មុនិនាថសីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គមានព្រះរាជសុខភាពល្អបរិបូរណ៍ ព្រះបញ្ញាញាណភ្លឺថ្លា ព្រះកាយពលមាំមួន និងព្រះជន្មាយុយឺនយូរជាងរយព្រះវស្សា ចាកផុតពីព្រះរោគាព្យាធិនានា ដើម្បីគង់ប្រថាប់ជាមហាម្លប់ដ៏ត្រជាក់ត្រជុំដល់ប្រជានុរាស្រ្ត ជាកូន ចៅ ចៅទួត របស់ព្រះអង្គ ប្រកបដោយសុខដុមរមនា ជារៀងដរាបតទៅ។
បន្ទាប់ពី ព្រះសីលសំវរ ព្រះនាគមុន៏ ព្រះមេគណខេត្ត និងព្រះមន្ត្រីសង្ឃ ៨អង្គ បាន សូត្រពុទ្ធជ័យមង្គល ចម្រើនព្រះបរិត្តទៅតាមទំនៀមទំលាប់ប្រពៃណីយ សាសនា ដើម្បីឧទ្ទិសព្រះរាជកុសលថ្វាយសម្ដេចព្រះមហាក្សត្រី នរោត្តមមុនីនាថ សីហនុ ព្រះវររាជមាតាជាតិ ខ្មែរ ព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការ:ដ៏ខ្ពង់ខ្ពស់បំផុត រួចមកឯកឧត្តម អ៊ុនចាន់ដា និង ឯកឧត្តមខ្លូត ផន ព្រមទាំង ថ្នាក់ដឹកនាំ បានអញ្ជើញ វេរប្រគេនព្រះសង្ឃចំនួន ៩អង្គ ដោយក្នុងមួយអង្គ៖ ទឹកក្រូច ១កេស, ទឹកសុទ្ធ ១កេស , ផ្លែឈើស្រស់ ១កន្ត្រក, សាដក ១ និងទេយ្យទាន១កញ្ចប់ធំ។
ដោយឡែកប្រគេនព្រះមេគណខេត្ត បច្ច័យ ៤០ម៉ឺនរៀល, ព្រះបាឡាត់គណខេត្ត បច្ច័យ ៣០ម៉ឺនរៀល និងព្រះមន្ត្រីសង្ឃ ៧អង្គ មួយអង្គ បច្ច័យ ២០ម៉ឺនរៀល ។ ឧបត្ថម្ភ ទីប្រឹក្សា- យុវជនកាកបាទក្រហមកម្ពុជា ២២នាក់ ម្នាក់ៗ ថវិកា ២០,០០០រៀល និង លោកតា លោកយាយ ចំនួន ៦២នាក់ ម្នាក់ៗ ថវិកា ១០,០០០រៀល៕
