សៀងហៃ៖ប្រធានាធិបតីនៃសាធារណរដ្ឋហុងឌូរ៉ាស លោកស្រី Iris Xiomara Castro Sarmiento បានមកដល់ទីក្រុងសៀងហៃ ហើយបានចាប់ផ្តើមដំណើរទស្សនកិច្ចនៅប្រទេសចិនកាលពីថ្ងៃសុក្រ ដោយបង្ហាញពីការរំពឹងទុករបស់លោកស្រីចំពោះដំណើរទស្សនកិច្ចដែលនឹងដំណើរការរហូតដល់ថ្ងៃទី ១៤ ខែមិថុនា។ដោយកត់សម្គាល់ថាដំណើរទស្សនកិច្ចរបស់លោកស្រីទៅកាន់ប្រទេសចិនត្រូវបានរំពឹងទុកដោយប្រជាជនហុងឌូរ៉ាស លោកស្រី Castro បានអោយដឹងថា ការទទួលស្គាល់គោលការណ៍ចិនតែមួយ ការបង្កើតទំនាក់ទំនងការទូតជាមួយប្រទេសចិន និងកិច្ចសហប្រតិបត្តិការជាមួយប្រទេសចិនអាចនាំមកនូវឱកាសអភិវឌ្ឍន៍ដល់ប្រទេសហុងឌូរ៉ាស។
លោកស្រីបានមានប្រសាសន៍ថា ប្រជាជនហុងឌូរ៉ាសកោតសរសើរចំពោះសមិទ្ធិផលនៃការអភិវឌ្ឍន៍របស់ប្រទេសចិន ជាពិសេសការខិតខំប្រឹងប្រែងរបស់ប្រទេសក្នុងការកាត់បន្ថយភាពក្រីក្រ ដោយបន្ថែមថា ការខិតខំដើម្បីសុខុមាលភាពរបស់ប្រជាជនគឺជាគោលដៅរួមរបស់ប្រទេសហុងឌូរ៉ាស និងចិន ហើយលោកស្រីជឿជាក់ថាទំនាក់ទំនងមិត្តភាពរវាងហុងឌូរ៉ាស និងចិននឹង ត្រូវពង្រឹងដោយឯកភាព និងកិច្ចសហប្រតិបត្តិការរបស់ប្រជាជនទាំងពីរ។លោកស្រី Castro បានសម្តែងក្តីសង្ឃឹមថា ហុងឌូរ៉ាស នឹងសម្រេចបាននូវភាពរុងរឿង និងការអភិវឌ្ឍន៍ដូចទីក្រុងសៀងហៃ ហើយបាននិយាយថា ប្រទេសនេះនឹងពង្រឹងកិច្ចសហប្រតិបត្តិការជាមួយទីក្រុងសៀងហៃ។
លោកស្រីបានថ្លែងថា ប្រទេសហុងឌូរ៉ាសនឹងចូលរួមយ៉ាងសកម្មនៅក្នុងពិព័រណ៍នាំចូលអន្តរជាតិចិនលើកទីប្រាំមួយដែលនឹងប្រារព្ធឡើងនៅទីក្រុងសៀងហៃក្នុងខែវិច្ឆិកា ហើយនឹងបញ្ជូននិស្សិតវ័យក្មេងទៅកាន់ទីក្រុងសៀងហៃដើម្បីសិក្សា។លោកស្រីបានបន្ថែមថា ប្រសិនបើយុវជនហុងឌូរ៉ាសមានឱកាសទទួលបានការអប់រំ និងរៀនវិទ្យាសាស្ត្រ និងបច្ចេកវិទ្យានៅក្នុងប្រទេសចិន ពួកគេអាចរួមចំណែកដល់ការកសាង និងអភិវឌ្ឍន៍ប្រទេសហុងឌូរ៉ាស។
ប្រភពព័ត៌មានៈAPNews
ប្រែសំរួលដោយៈយ៉េន សុវណ្ណារ៉ា
