រដ្ឋមន្ត្រីបរិស្ថាន ដឹកនាំកិច្ចប្រជុំអន្តរក្រសួងស្តីពី ការពង្រីកការគ្រប់គ្រងសំរាម សំណល់រឹងទីប្រជុំជន និងយន្តការគ្រប់គ្រងនិងវិភាជថវិកាគាំទ្រដល់រដ្ឋបាលក្រុង-ស្រុក

ភ្នំពេញ៖ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានដឹកនាំកិច្ចប្រជុំអន្តរក្រសួងស្តីពី ការពង្រីកការគ្រប់គ្រងសំរាម សំណល់រឹងទីប្រជុំជន និងយន្តការគ្រប់គ្រងនិងវិភាជថវិកាគាំទ្រដល់រដ្ឋបាលក្រុង-ស្រុក នៅរសៀលថ្ងៃទី៧ ខែមិថុនា ឆ្នាំ២០២៣។

ថ្លែងទៅកាន់អង្គប្រជុំ ឯកឧត្តម សាយ សំអាល់ បានឱ្យដឹងថា កិច្ចប្រជុំនៅថ្ងៃនេះ ដើម្បីធ្វើបទបង្ហាញទាក់ទងនឹងការគ្រប់គ្រងសំរាម សំណល់រឹង ទីប្រជុំជន និងការវិភាជថវិកាសម្រាប់គាំទ្រដល់រដ្ឋបាលក្រុង ស្រុក សម្រាប់ការគ្រប់គ្រងសំរាម សំណល់រឹងទីប្រជុំជន។

ឯកឧត្តម បានចាត់ទុកថាកិច្ចប្រជុំនេះ ជាការបើកទំព័រថ្មីមួយទៀត ទាក់ទងនឹងការគ្រប់គ្រងសំរាម សំណល់រឹងទីប្រជុំជន ដោយសារតែក្រសួងសេដ្ឋកិច្ច និងហិរញ្ញវត្ថុ ទម្លាក់ថវិកាឱ្យ និងវិភាជទៅតាមបណ្តារដ្ឋបាលក្រុង ស្រុក។

ឯកឧត្តម សាយ សំអាល់ បានបញ្ជាក់បន្ថែមថា កញ្ចប់ថវិកានេះ គឺជាកញ្ចប់ថវិកាអន្តរាគមន៍ប៉ុណ្ណោះ មិនមែនជាថវិកាប្រតិបត្តិការពេញលេញនោះទេ ដែលរដ្ឋបាលក្រុង ស្រុក ត្រូវស្វះស្វែងរកប្រភពចំណូលបន្ថែមទៀត។

គួរបញ្ជាក់ឱ្យដឹងថា កិច្ចប្រជុំក៏មានការធ្វើបទបង្ហាញចំនួន៣ ជូនដល់រដ្ឋបាលក្រុង-ស្រុក រួមមាន៖ ១)ការប្រើប្រាស់ប្រព័ន្ធបច្ចេកវិទ្យា (Digital 4.0) ក្នុងការជំរុញ និងគាំទ្រការគ្រប់គ្រង សេវាសម្អាត ប្រមូល ដឹកជញ្ជូនសំរាម សំណល់រឹងទីប្រជុំជន ២)នីតិវិធីហិរញ្ញវត្ថុពាក់ព័ន្ធការគ្រប់គ្រង និងប្រើប្រាស់កញ្ចប់ថវិកាសេវាអនាម័យបរិស្ថាន សម្រាប់ការគ្រប់គ្រងសំរាម សំណល់រឹងទីប្រជុំជន និង៣)ការវិភាជថវិកា ដល់រដ្ឋបាលក្រុង ស្រុក។ ជាមួយគ្នានេះ ក៏មានកិច្ចពិភាក្សារួម អំពីបញ្ហាប្រឈម និងដំណោះស្រាយក្នុងការរៀបចំសេវាសម្អាត ប្រមូល ដឹកជញ្ជូន និងទុកដាក់សំរាម សំណល់រឹងទីប្រជុំជន ក៏ដូចជាការប្រមូលធាតុចូលពីរដ្ឋបាលក្រុង ស្រុក ផងដែរ៕