ឯកឧត្តម នេត្រ ភក្រា្ត៖ ក្នុងរយៈពេល២ឆ្នាំចុងក្រោយនេះ យើងបានដោះអន្ទាក់បានប្រមាណជាង ១០មុឺនអន្ទាក់ និងអាចដោះសត្វបានរាប់ពាន់ក្បាលឱ្យរស់រានមានជីវិត

ភ្នំពេញ៖ ឯកឧត្តម នេត្រ ភក្រា្ត រដ្ឋលេខាធិការក្រសួងបរិស្ថាន និងជាប្រធានដឹកនាំយុទ្ធនាការអន្ទាក់សូន្យ បានលើកឡើងថា ក្នុងរយៈពេល២ឆ្នាំចុងក្រោយនេះ គឺឆ្នាំ២០២១ និង២០២២ យើងបានដោះអន្ទាក់បានប្រមាណជាង ១០មុឺនអន្ទាក់ ហើយយើងអាចដោះសត្វបានរាប់ពាន់ និងរាប់មុឺនក្បាលឱ្យរស់រានមានជីវិតផងដែរ។

ឯកឧត្តម នេត្រ ភក្រា្ត បានលើកឡើងបែបនេះក្នុងយុទ្ធនាការអន្ទាក់សូន្យ ដំណាក់កាលទី២ ក្នុងខេត្តសៀមរាប នៅថ្ងៃទី០២ ខែឧសភា ឆ្នាំ២០២៣។

ឯកឧត្តមរដ្ឋលេខាធិការ បានបន្តថា អន្ទាក់មិនត្រឹមតែសម្លាប់សត្វព្រៃនោះទេ ប៉ុន្តែវាក៏ធ្វើឱ្យប៉ះពាល់ទៅដល់យើងទាំងអស់គ្នាផងដែរ។ ពេលសម័យសង្រ្គាមសត្វត្រូវប្រឈមមុខជាមួយនិងគ្រាប់មីន គ្រាប់កាំភ្លើង ហើយជាពិសេសគឺអន្ទាក់ តែឥឡូវនេះប្រទេសជាតិរបស់យើងមានសុខសន្តិភាព ហើយខេត្តមួយចំនួនក៏ត្រូវបានប្រកាសថាជាខេត្តអស់មីន ក៏ប៉ុន្តែយើងនូវបញ្ហាអន្ទាក់។ ចឹងហើយបានយើងនិយាយថានៅពេលកំពុងជួបនូវបញ្ហាសង្រ្គាម យើងគ្មានពេលមកគិតថាតើយើងត្រូវថែរក្សាព្រៃឈើ និងសត្វព្រៃ របស់យើងយ៉ាងមិចនោះទេ តែឥឡូវនេះយើងទទួលបានសុខសន្តិភាពក្រោមការអនុវត្តគោលនយោបាយឈ្នះ-ឈ្នះ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា គឺយើងបានសុខសន្តិភាពអស់រយៈពេល ២៥ឆ្នាំ ហើយយើងត្រូវនាំគ្នាការពារនូវសុខសន្តិភាពនេះជាបន្តទៀត។

ឯកឧត្តមរដ្ឋលេខាធិការ បានបន្ថែមថា សុខសន្តិភាព ២៥ឆ្នាំនេះ យើងបានការគិតគូរច្រើន និងឱកាសច្រើន ក្នុងការគិតគូរទៅលើធនធានធម្មជាតិរបស់យើងថាតើយើងត្រូវធ្វើយ៉ាងមិចដើម្បីការពារព្រៃឈើឱ្យបានគង់វង្ស។ បច្ចុប្បន្ននេះ កម្ពុជាបានឈានមកដល់ដំណាក់កាលថ្មីមួយទៀត ដែលពីមុនកម្ពុជារបស់យើងកាប់ឈើយកលុយតាំងពីសម័យសង្រ្គាមភាគីទាំងអស់ដែលច្បាំងគ្នាគឺពឹងផ្អែកទៅលើធនធានធម្មជាតិដើម្បីយកលុយមកទិញកាំភ្លើង ក៏ប៉ុន្តែមកដល់សម័យតេជោសន្តិភាពនេះយើងបានបញ្ឈប់ពីប្រទេសដែលកាប់ឈើយកលុយ មកជាប្រទេសដែលរក្សាឈើឈរដើម្បីរកចំណូលតាមរយៈ៖ ទី១.តាមរយៈការលក់ឥណទានកាបូន និងទី២.តាមរយៈទេសចរធម្មជាតិជាដើម ៕