ក្រុមការងារ ប.ស.ស. ចុះប្រមូលទិន្នន័យបញ្ហាសុខភាពរបស់សមាជិក ប.ស.ស. នៅក្នុងសហគ្រាសចំនួន២ ក្នុងខេត្តព្រៃវែង
ភ្នំពេញ៖ កាលពីថ្ងៃទី១ ខែមិថុនា ឆ្នាំ២០២៣នេះ ក្រុមការងារការិយាល័យបង្ការសុខភាព នៃនាយកដ្ឋានសេវាមូលដ្ឋានសុខាភិបាល នៃប.ស.ស. បានចុះប្រមូលទិន្និន័យបញ្ហាសុខភាពរបស់សមាជិក ប.ស.ស. នៅសហគ្រាសចំនួន០២ ក្នុងខេត្តព្រៃវែងរួមមាន៖ សហគ្រាស ថបស៊ីលវើរ លីមីតធីត ស្រុកស្វាយអន្ទរ និងសហគ្រាស អរិន មេនូហ្វេកធើរីង(ខ្មែរ) លីមីតធីត ក្រោមការសម្របសម្រួលពី លោក វាសនា ជីវី ប្រធានសាខា ប.ស.ស. ខេត្តព្រៃវែង។
ក្នុងការចុះប្រមូលទិន្និន័យបញ្ហាសុខភាពនេះ ជាការតាមដានស្ថានភាពសុខភាពរបស់សមាជិក ប.ស.ស. ដោយផ្ទាល់ តាមរយៈស្ថានភាពការងារជាក់ស្ដែងដែលពាក់ព័ន្ធបរិស្ថានក្នុងសហគ្រាស ដូចជាខ្យល់ពុល ឥទ្ធិពលពីកាកសំណល់ សម្ភារដែលមានជាតិពុល បរិយាកាសការងារដែលអាចពាក់ព័ន្ធនឹងគ្រោះថ្នាក់ដល់សុខភាព ដែលនេះជាមូលដ្ឋានសម្រាប់ការគ្រប់គ្រងការថែទាំលើកកម្ពស់ស្ថានភាពសុខភាព ព្រមទាំងបង្ការគ្រោះថ្នាក់ និងជំងឺឆ្លងផ្សេងៗ ដែលអាចនឹងកើតមាន ជាពិសេសដើម្បីចាត់វិធានការបង្ការជាអាទិភាពសម្រាប់អ្នកជំងឺឱ្យទទួលបានការថែទាំសុខភាពផ្ទាល់ខ្លួន និងការព្យាបាលទាន់ពេលវេលា។
ក្រុមការងារការិយាល័យបង្ការសុខភាព ក៏បានអំពាវនាវដល់បងប្អូនកម្មករនិយោជិតទាំងអស់យកចិត្តទុកដាក់លើការថែរក្សាបរិស្ថាន ការបរិភោគទឹកឱ្យបានត្រឹមត្រូវ និងរក្សាអនាម័យម្ហូបអាហារសម្រាប់សុខភាពខ្លួនផ្ទាល់ ជាពិសេសចូលរួមសិក្សាស្វែងយល់បន្ថែមអំពីសុខភាពអនាម័យ និងការរស់នៅស្អាត ដែលបង្កឡើងដោយបរិស្ថាន និងសុខភាពសាធារណៈ៕
