មេបញ្ជាការរងកងទ័ពជើងគោក នអញ្ជើញសំណេះសំណាល និងសួរសុខទុក្ខ នាយទាហាន នាយទាហានរង និងពលទាហាន ក្នុងកងបោសសម្អាតមីនទាំង ៥កង ចំណុះយោធភូមិភាគទី៥
ភ្នំពេញ៖ ឯកឧត្តម ឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ នាព្រឹកថ្ងៃអាទិត្យ ៩កើត ខែជេស្ឋ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី២៨ ខែឧសភា ឆ្នាំ២០២៣ បានអញ្ជើញសំណេះសំណាល និងសួរសុខទុក្ខ នាយទាហាន នាយទាហានរង និងពលទាហាន ក្នុងកងបោសសម្អាតមីនទាំង ៥កង ចំណុះយោធភូមិភាគទី៥ ស្តិតនៅវត្តព្រៃចាន់ ភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
ឯកឧត្តម ឧត្តមសនីយ៍ឯក ឯក សំអូន បានមានប្រសាសន៍ថា ពិធីសំណេះសំណាលដ៏មានសារៈសំខាន់នៅថ្ងៃនេះ មិនត្រឹមតែបានបង្ហាញឲ្យឃើញពីការគិតគូរយកចិត្តទុកដាក់ខ្ពស់ របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានអាជ្ញាធរមីនកម្ពុជា ចំពោះសុខទុក្ខរបស់កងកម្លាំងប្រតិបត្ដិករ បោសសម្អាតមីន របស់យើងប៉ុណ្ណោះទេ ប៉ុន្តែក៏ជាការលើកទឹកចិត្ត ផ្ដល់នូវកម្លាំងចិត្ត ដល់យើងទាំងអស់គ្នា ពីគ្រប់ភាគីពាក់ព័ន្ធ ឲ្យខិតខំរួមគ្នាពុះពារសម្រេចនូវបេសកកម្មជាតិ ដ៏មានសារៈសំខាន់ គឺការបោះសម្អាតសំណល់ជាតិផ្ទុះ ឲ្យអស់ពីក្រោមដី ដើម្បីសុខសុវត្ថិភាព របស់ប្រជាពលរដ្ឋ និងសម្រេចគោលដៅ ជាខេត្ដអស់មីន នាពេលខាងមុខ ហើយដែលនេះ ក៏ជាការផ្សព្វផ្សាយពីការចាប់ផ្ដើមអនុវត្តនូវគម្រោង សម្ដេចតេជោ សម្រាប់សកម្មភាពមីន ក្រោមមូលបទ «ផ្ដល់ដីមានសុវត្ថិភាព បង្កើតស្នាមញញឹម» ក្នុងភូមិសាស្ត្រខេត្តបន្ទាយមានជ័យ ដល់ភាគីពាក់ព័ន្ធ សាធារណជន និងប្រជាពលរដ្ឋ បានជ្រាប និងចូលរួមគាំទ្រអនុវត្តផងដែរ។
ឯកឧត្តម ឧត្តមសេនីយ៍ឯក មេបញ្ជាការរង បានបន្ថែមថា ក្នុងនាមមេបញ្ជាការរងកងទ័ពជើងគោក មេបញ្ជាការយោធភូមិភាគទី៥ សូមប្ដេជ្ញាគាំទ្រ និងចូលរួមសហការយ៉ាងពេញទំហឹងជាមួយ នាយទាហាន នាយទហានរង ក្នុងកងបោសសម្អាតមីនទាំង៥កង និងក៏អំពាវនាវដល់ប្រជាពលរដ្ឋ ជាពិសេសអតីតយុទ្ធជន ដែលបានដឹង និងស្គាល់ ទីតាំងកប់គ្រាប់មីន និងយុទ្ធភ័ណ្ឌមិនទាន់ផ្ទុះផ្សេងៗ សូមសហការផ្ដល់ព័ត៌មាន ពីទីតាំងទាំងនោះ ដល់អាជ្ញាធរដែនដី កម្លាំងបោសសម្អាតមីន ដើម្បីយើងរៀបចំផែនការ ធ្វើការបោសសម្អាត ប្រមូលយកទៅកម្ទេចចោល សំដៅធានាផ្ដល់សុវត្ថិភាព ដល់ការប្រើប្រាស់ដី និងស្នើឲ្យអាជ្ញាធរមូលដ្ឋាន គ្រប់លំដាប់ថ្នាក់ ត្រូវបង្កលក្ខណៈងាយ ស្រួល និងផ្ដល់កិច្ចសហការឲ្យពេញលេញ ដល់កម្លាំងប្រតិបត្ដិករបោសសម្អាតមីនចំណុះយោធភូមិភាគទី៥ ដែលកំពុងអនុវត្ដក្រោមគម្រោង សម្ដេចតេជោ សម្រាប់សកម្មភាពមីន ក្រោមមូលបទ «ផ្ដល់ដីមានសុវត្ថិភាព បង្កើតស្នាមញញឹម» ឲ្យបំពេញការងារប្រកបដោយសុវត្ថិភាព និងជោគជ័យតាមផែនការ ដែលបានគ្រោងទុក។
ក្នុងឱកាសនេះផងដែរ ឯកឧត្តម ឧត្តមសេនីយ៍ឯក ឯក សំអូន ក៏បាននាំយកអំណោយផ្ដល់ជូនដល់កងកម្លាំងបោសសំអាតមីន ចំណុះយោធភូមិភាគទី៥ មានដូចជា៖ មី ៦០កេសតូច, ត្រីខ ៥កេស, ទឹកត្រី ២៥យួរ និងទឹកសុីអុីវ ២៥យួរ ក្នុងនោះអំណោយរបស់លោកឧត្តមសនីយ៍ទោ ឈុន ម៉ៅ រួមមាន៖ ទឹកសុទ្ធ ២០០យួរ, មី ៥កេស, របស់លោកវរសេនីយ៍ទោ រឿន សារិត ទឹកសុទ្ធ ២០០យួរ និង លោក តែ គឹមឡុង ជ្រូក១ក្បាល ៕
