មន្ត្រីជាន់ខ្ពស់របស់ចិន និងបណ្តាប្រទេសអាស៊ានបានឯកភាពលើកិច្ចសហប្រតិបត្តិការបន្ថែមទៀត

SHENZHEN÷ការពិគ្រោះយោបល់មន្ត្រីជាន់ខ្ពស់អាស៊ាន-ចិនលើកទី ២៩ បានប្រារព្ធឡើងកាលពីថ្ងៃព្រហស្បតិ៍នៅទីក្រុង Shenzhen ក្នុងខេត្ត Guangdong ភាគខាងត្បូងប្រទេសចិន។កិច្ចប្រជុំនេះត្រូវបានដឹកនាំដោយលោក Nong Rong ជំនួយការរដ្ឋមន្ត្រីក្រសួងការបរទេសចិន និងលោក Chan Aye លេខាធិការអចិន្ត្រៃយ៍នៃក្រសួងការបរទេសមីយ៉ាន់ម៉ា។មន្ត្រីជាន់ខ្ពស់ និងអ្នកតំណាងនៃបណ្តាប្រទេសនៃសមាគមប្រជាជាតិអាស៊ីអាគ្នេយ៍ (អាស៊ាន) ផ្សេងទៀត និងតំណាងលេខាធិការដ្ឋានអាស៊ាន ក៏មានវត្តមានចូលរួមផងដែរ។ភាគីទាំងពីរបានធ្វើការអត្ថាធិប្បាយជាវិជ្ជមានចំពោះសន្ទុះដ៏ល្អនៃទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយចិន-អាស៊ាន។

ពួកគេបានផ្លាស់ប្តូរយោបល់លើការលើកកម្ពស់កិច្ចសហប្រតិបត្តិការនាពេលអនាគត និងលើបញ្ហាអន្តរជាតិ និងតំបន់ដែលមានផលប្រយោជន៍រួម។លោក Nong បាននិយាយថា ភាគីចិនសង្ឃឹមថានឹងធ្វើការជាមួយបណ្តាប្រទេសអាស៊ានដើម្បីស្វែងរកឱកាសថ្មីសម្រាប់កិច្ចសហប្រតិបត្តិការលើវិស័យដូចជា ឧស្សាហកម្មដែលកំពុងរីកចម្រើន ថាមពលថ្មី រូបិយប័ណ្ណ និងហិរញ្ញវត្ថុ សន្តិសុខប្រពៃណី និងមិនមែនប្រពៃណី និងការផ្លាស់ប្តូរវប្បធម៌ និងប្រជាជន។លោក Nong បានអោយដឹងថា ប្រទេសចិនក៏មានគោលបំណងបង្កើនភាពស៊ីសង្វាក់គ្នារវាងគំនិតផ្តួចផ្តើមអភិវឌ្ឍន៍សកល គំនិតផ្តួចផ្តើមសន្តិសុខសកល គំនិតផ្តួចផ្តើមអរិយធម៌សកល និងការកសាងសហគមន៍របស់អាស៊ាន ហើយខិតខំកសាងសហគមន៍ចិន-អាស៊ានឱ្យកាន់តែជិតស្និទ្ធជាមួយនឹងអនាគតរួមគ្នា។អ្នកចូលរួមមកពីបណ្តាប្រទេសអាស៊ានបានសម្តែងនូវឆន្ទៈក្នុងការរួមដៃជាមួយប្រទេសចិនដើម្បីជំរុញការធ្វើឱ្យប្រសើរឡើងនូវតំបន់ពាណិជ្ជកម្មសេរីចិន-អាស៊ាន និងធ្វើឱ្យកិច្ចសហប្រតិបត្តិការស៊ីជម្រៅលើវិស័យអភិវឌ្ឍន៍បៃតង សេដ្ឋកិច្ចឌីជីថល ការតភ្ជាប់ និងកសិកម្មប្រកបដោយនិរន្តរភាព។ពួកគេក៏បាននិយាយផងដែរថា ពួកគេមានឆន្ទៈក្នុងការរួមគ្នាជំរុញឱ្យមានការអភិវឌ្ឍន៍កាន់តែខ្លាំងនៃភាពជាដៃគូយុទ្ធសាស្ត្រគ្រប់ជ្រុងជ្រោយចិន-អាស៊ាន និងលើកកម្ពស់សន្តិភាព ស្ថិរភាព និងវិបុលភាពក្នុងតំបន់។

ប្រភពព័ត៌មានៈXinhua
ប្រែសំរួលដោយៈកញ្ញា យ៉េន សុវណ្ណារ៉ា https://xhnewsapi.xinhuaxmt.com/share/news?id=826697180139520&showType=3002&utdId=385d41692fff95f27c48460a1147d217&version=3.1.3&projectSource=0&clientMarket=google