សម្តេចតេជោ៖ នយោបាយឈ្នះឈ្នះ មិនត្រឹមតែបញ្ចប់សង្គ្រាមទេ តែក៏បានជួយឱ្យរបាំសួយរក្សាវត្តមាន មកដល់បច្ចុប្បន្ន
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា នយោបាយឈ្នះឈ្នះ មិនត្រឹមបញ្ចប់សង្គ្រាម និងការបង្រួបបង្រួមទឹកដី និងការឯកភាពជាតិប៉ុណ្ណោះទេ ប៉ុន្តែក៏បានជួយឱ្យរបាំសួយរក្សាវត្តមាន បានមកដល់ពេលបច្ចុប្បន្ននេះផងដែរ។
ក្នុងឱកាសអញ្ជើញសម្ពោធទីតាំងថ្មី សាកលវិទ្យាល័យភូមិន្ទវិចិត្រសិល្បៈ នៅថ្ងៃទី២៤ ខែឧសភា ឆ្នាំ២០២៣នេះ សម្តេចតេជោ ហ៊ុន សែន បានបញ្ជាក់ថា «ហើយខ្ញុំគួរតែបញ្ជាក់របាំសួយ ប្រសិនបើយើងធ្វើមិនទាន់ពេលក្នុងការធ្វើសមាហរណកម្មប្រទេស នៅឆ្នាំ១៩៩៨ របាំសួយអាចដាច់ពូជតែម្តង អត់មានយកមកលើឆាកនេះទេ។ អ៊ឹចឹងទេកាលដែលអនុវត្តនយោបាយឈ្នះឈ្នះ នាំមកការបង្រួបបង្រួមជាតិ និងឯកភាពទឹកដីបានផ្តល់ឱកាសគ្រប់ផ្នែករាប់ទាំងវិស័យសិល្បៈដែលក្នុងនោះមានរបាំសួយ ដែលនៅក្នុងចន្លោះរវាងខេត្តកំពង់ស្ពឺ ខេត្តពោធិ៍សាត់ និងខេត្តកោះកុង របាំសួយអាចនឹងដាច់ពូជបើជាមិនមានការអនុវត្តនយោបាយឈ្នះឈ្នះ បញ្ចប់សង្គ្រាមនាំមកនូវសន្តិភាព ការបង្រួបបង្រួមជាតិ និងឯកភាពទឹកដី»។
សម្តេចតេជោ ហ៊ុន សែន ក៏គូសបញ្ជាក់ថា ដោយសារតែកម្ពុជា បានបញ្ចប់សង្គ្រាមស៉ីវិលទទួលបានការឯកភាពទឹកដីពេញលេញនេះហើយបានជាអ្នកជំនាញផ្នែកវប្បធម៌ចូលទៅសិក្សាទាក់ទងនឹងរបាំសួយ រហូតថែរក្សារបាំសួយនេះឱ្យនៅគង់វង្ស ព្រមទាំងនាំមកសម្តែងនៅក្នុងកម្មវិធីនានាជាដើម ៕
