អ្នកនាំពាក្យក្រសួងការពារជាតិ ចេញសេចក្តីប្រកាស បដិសេធ និងច្រានចោលទាំងស្រុងចំពោះខ្លឹមសារដែលបង្ហោះនៅលើហ្វេសប៊ុក «Mary Ka» ដែលធ្វើឱ្យប៉ះពាល់ដល់ នាយឧត្តមសេនីយ៍ នាង ផាត

ភ្នំពេញ៖ អ្នកនាំពាក្យក្រសួងការពារជាតិ បានចេញសេចក្តីប្រកាស បដិសេធ និងច្រានចោលទាំងស្រុងចំពោះខ្លឹមសារដែលបង្ហោះនៅលើហ្វេសប៊ុក «Mary Ka» កាលពីថ្ងៃទី១៧ ខែឧសភា ឆ្នាំ២០២៣ ដែលធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយស និងសេចក្តីថ្លៃថ្នូរ របស់ឯកឧត្តម នាយឧត្តមសេនីយ៍ នាង ផាត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ ក្រសួងការពារជាតិ។

ឯកឧត្តម នាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិ បានបញ្ជាក់ថា បុគ្គលដែលដាក់ឈ្មោះថា «Chhay កូនប៉ានាងផាត»​ ដែលមានជម្លោះជាមួយម្ចាស់ហ្វេសប៊ុក «Mary Ka» ពុំមែនជាកូន ឬជាជំនួយការ ឯកឧត្តម នាយឧត្តមសេនីយ៍ នាង ផាត នោះទេ ហើយ ឯកឧត្តម នាយឧត្តមសេនីយ៍ ក៏មិនមានការជាប់ពាក់ព័ន្ធទៅនឹងករណីជម្លោះនេះដែរ។

នេះបើតាមសេចក្តីប្រកាសរបស់អ្នកនាំពាក្យក្រសួងការពារជាតិ «ករណីដែលបុគ្គលនេះ បន្លំយកឈ្មោះឯកឧត្តម ឬថ្នាក់ដឹកនាំជាន់ខ្ពស់ ទៅប្រើប្រាស់ក្នុងប្រព្រឹត្តអំពើល្មើស ឬគំរាមកំហែងណាមួយ សូមឱ្យសមត្ថកិច្ចស្រាវជ្រាវ និងចាត់វិធានការតាមច្បាប់»។

ឯកឧត្តម នាយឧត្តមសេនីយ៍ ឈុំ សុជាត សូមស្នើឱ្យហ្វេសប៊ុកឈ្មោះ «Mary Ka» បញ្ឈប់ជាបន្ទាន់នូវការផ្សព្វផ្សាយរបស់ខ្លួនដោយយកឈ្មោះថ្នាក់ដឹកនាំក្រសួងការពារជាតិ ទៅពាក់ព័ន្ធនឹងករណីបុគ្គលនេះតទៅ
ទៀត បើមិនដូច្នោះទេ នឹងមានចាត់វិធានការទៅតាមផ្លូវច្បាប់។

ខណៈដែលបច្ចេកវិជ្ជារីកចម្រើន ហើយមានការបោកប្រាស់ច្រើនតាមប្រព័ន្ធអ៉ីនធើណិតនោះ អ្នកនាំពាក្យក្រសួងការពារជាតិ សូមអំពាវនាវឱ្យអ្នកប្រើប្រាស់បណ្តាញសង្គមទាំងអស់មានការប្រុងប្រយ័ត្ន និងស្រាវជ្រាវឱ្យច្បាស់លាស់ជាមុនសិន មុននឹងផ្សព្វផ្សាយ ឬចែកចាយការចោទប្រកាន់ណាមួយ ដែលធ្វើឲ្យប៉ះពាល់ ដល់កិត្តិយស ថ្នាក់ដឹកនាំនៃក្រសួងការពារជាតិ ៕