ករណីបុរសជាខ្មាន់កាំភ្លេីង ដែលបានបាញ់ប្តីប្រពន្ធ ២នាក់ នៅស្រុកជេីងព្រៃ បណ្ដាលមកពីទំនាស់ពាក្យសម្តីគ្នា
ភ្នំពេញ៖ ប្រភពពីមន្ទីរព័ត៌មានខេត្តកំពង់ចាម រាយការជូនរដ្ឋមន្ត្រីក្រសួងព័ត៌មានបានបញ្ជាក់ថា ករណីបុរសម្នាក់ជា ខ្មាន់កាំភ្លេីង ដែលបានបាញ់ប្តី ប្រពន្ធ ២នាក់ នៅស្រុកជេីងព្រៃ បណ្ដាលមកពីទំនាស់ពាក្យសម្តីគ្នា។
តាមប្រភពពីសមត្ថកិច្ចបានឲ្យដឹងថា ខ្មាន់កាំភ្លេីងម្នាក់ ដែល គេស្គាល់ ឈ្មោះ ឆេង សេង ហៅ ធីវ អាយុ ៤០ឆ្នាំ រស់នៅផ្ទះបុរីឈូកវ៉ា២ រាជធានីភ្នំពេញ មានមុខរបរជា លក់គ្រឿងតុបតែងឡាន បានជិះរថយន្ត ម៉ាក ព្រូស ពណ៌ទឹកប្រាក់ ពាក់ស្លាកលេខ ភ្នំពេញ 2BL-8356 ប្រដាប់ដោយអាវុធ ខ្លី ១ដើម មិនស្គាល់ម៉ាក បាញ់ទៅលើជនរងគ្រោះ ពីរនាក់ប្តីប្រពន្ធ ដែល ហេតុការណ៍នេះ បានកេីតឡេីង នៅវេលាម៉ោង១២ ថ្ងៃត្រង់ ថ្ងៃទី១១ ខែឧសភា ឆ្នាំ២០២៣ នៅចំណុចផ្ទះជនរងគ្រោះ ក្នុងភូមិអណ្ដូងត្រាំង ឃុំស្រម៉រ ស្រុកជើងព្រៃ ខេត្តកំពង់ចាម ។
តាមការសន្និដ្ឋាន របស់សមត្ថកិច្ចថា មូលហេតុ ដែលឈានដល់ការបាញ់ប្រហារបែបនេះ គឺបណ្ដាលមកពីទំនាស់ពាក្យសម្តីគ្នា ដោយជនរងគ្រោះ ឲ្យជនបង្កហេតុ គាស់សពជីដូនជីតា ចេញពីដី ដេីម្បី ងាយស្រួលទិញលក់។
សមត្ថកិច្ចបានឲ្យដឹងទៀតថា ជនរងគ្រោះ ឈ្មោះ ផុន សុភណ័ ភេទប្រុស អាយុ ៣៩ឆ្នាំ ជាប្តី ត្រូវបានខ្មាន់កំភ្លើង បាញ់ប្រហារត្រូវចំដៃ និងសៀតផ្កា របួសធ្ងន់ នៅខាងមុខផ្ទះរបស់ខ្លួន និងបានបញ្ជូន ទៅសង្គ្រោះភ្លាមៗ នៅរាជធានីភ្នំពេញហើយ ។ ចំណែកឯ ប្រពន្ធវិញ មាន ឈ្មោះ ចិន ចាន់ណា ភេទស្រី អាយុ ៤០ឆ្នាំ បានស្លាប់ភ្លាមៗ នៅនឹងកន្លែង ខណៈដែល ខ្មាន់កាំភ្លើង បានបាញ់ ឲ្យរងរបួសចំខ្ទង់ច្រមុះចន្លោះភ្នែក០១គ្រាប់ នោះ ។
តាមសាក្សី នៅកន្លែងកើតហេតុថា ក្រោយធ្វើសកម្មភាព ជនល្មេីសបេីករថយន្ត ទៅទិសខាងលិច រហូត នៅវត្តចន្ទមូលី ស្ថិតក្នុងភូមិផ្អាវ ឃុំផ្អាវ ស្រុកបាធាយ បានទុករថយន្តចោលក្នុងវត្ត រួចរត់គេចខ្លួនបាត់ ។
បច្ចុប្បន្នសមត្ថកិច្ចកំពុងធ្វេីការស្រាវជ្រាវ៕
