ភ្នំពេញ៖ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ បានថ្លែងនូវការកោតសរសើរដល់អាវុធហត្ថទាំងអស់ ដែលបានខិតខំបំពេញតួនាទី ភារកិច្ច បម្រើប្រទេសជាតិ និងប្រជាពលរដ្ឋបានយ៉ាងល្អប្រសើរនាពេលកន្លងមក ដោយបានអនុវត្តយ៉ាងម៉ឺងម៉ាត់នូវគោលនយោបាយភូមិ-ឃុំមានសុវត្ថិភាព ដែលដាក់ចេញដោយរាជរដ្ឋាភិបាលកម្ពុជា។
ការថ្លែងនេះក្នុងឱកាសដែល លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត បានអញ្ជើញជាអធិបតីភាព ក្នុងកិច្ចប្រជុំត្រួតពិនិត្យការងារកងរាជរាជអាវុធហត្ថត្រីមាសទី១ និងទិសដៅការងារត្រីមាសទី២ ឆ្នាំ២០២៣ និងផ្សព្វផ្សាយផែនការ ការពារ សន្តិសុខ រក្សាសុវត្ថិភាព សណ្តាប់ធ្នាប់ តម្រាយផ្លូវពិធីដង្ហែរព្រះអគ្គីកីឡា ដែលនឹងដង្ហែរមកដល់ទឹកដីខេត្តបន្ទាយមានជ័យ នៅថ្ងៃទី២ ខែឧសភា ឆ្នាំ២០២៣ នាពេលខាងមុខនេះ នៅសាលប្រជុំធំបញ្ជាការដ្ឋានកងរាជអាវុធហត្ថខេត្តនាថ្ងៃ ទី២៤ ខែមេសា ឆ្នាំ២០២៣ ម្សិលមិញ ។
ដោយមានការចូលរួមពីសំណាក់លោកឧត្តមសេនីយ៍ វរសេនីយ៍ អនុសេនីយ៍ មេបញ្ជាការរងកងរាជអាវុធហត្ថខេត្ត លោកនាយសេនាធិការរង លោកប្រធាន អនុប្រធានមន្ទីរ លោកនាយការិយាល័យជំនាញ លោកមេបញ្ជាការ-មេបញ្ជាការរងមូលដ្ឋានកងរាជអាវុធហត្ថក្រុង-ស្រុក លោកប្រធានស្នាក់ការសន្តិសុខ នាយ នាយរងកងរាជអាវុធហត្ថចំនួន១០២នាក់ ។
ជាមួយនឹងការសម្រេចលទ្ធផលការងារកន្លងមក លោកឧត្តមសេនីយ៍ត្រី បោន ប៊ិន បានមានប្រសាសន៍ណែនាំដល់អាវុធហត្ថទាំងអស់ត្រូវថែរក្សាសុខភាពឱ្យបានល្អ ព្រោះសុខភាព គឺជាកត្តាចម្បងដែលយើងត្រូវយកចិត្តទុកដាក់ កាលណាមានសុខភាព ល្អ យើងអាចធ្វើអ្វីៗបានសម្រេចដោយជោគជ័យ។ មិនត្រឹមតែប៉ុណ្ណោះក្នុងនាមអាវុធហត្ថ ដែលមានតួនាទីបម្រើជាតិ ប្រជាជន អនុវត្តតួនាទីគឺមានគុណធម៌ចំពោះប្រជាជន ព្រោះកងរាជអាវុធជាកូនចៅរបស់ប្រជាជន ។ជាមួយគ្នានោះដែរ យើងត្រូវដុសខាត់សមត្ថភាពនិងចំណេះជំនាញបន្ថែម និងចែករំលែករាល់បទពិសោធន៍ដែលមានឲ្យគ្នាទៅវិញទៅមកជូនដល់មន្ត្រីក្នុងអង្គភាព ។
ផ្សារភ្ជាប់ក្នុងកិច្ចប្រជុំនេះដែរ លោកឧត្តមសេនីយ៍ត្រី បោន ប៊ិន ក៏បានបំពាក់ឋានន្តរសក្តិជូនដល់នាយទាហាន នាយទាហានរង នៃកងរាជអាវុធហត្ថខេត្តចំនួន១២រូប ក្នុងនោះថ្នាក់វរសេនីយ៍ត្រី១រូប, អនុសេនីយ៍ឯក២រូប, អនុសេនីយ៍ទោ១, អនុសេនីយ៍ត្រី ១ , នាយចំណង់២រូប និងព្រិន្ទបាលទោ៥រូប ផ្តាស់ប្តូរមុខដំណែង២រូប និងបានផ្តល់ ប័ណ្ណសរសើរ ចំនួន២៥រូប មានសា្នដៃក្នុងការទប់ស្កាត់ និងបង្ក្រាបបទល្មើសគ្រឿងញៀនប្រចាំឆ្នាំ២០២២ ពីអាជ្ញាធរជាតិប្រយុទ្ធប្រឆាំងគ្រឿងញៀនផងដែរ៕
