ឯកឧត្តមបណ្ឌិត ហេង សុខគង់ អញ្ជើញចុះសាកសួរសុខទុក្ខ និងសំណេះសំណាលជាមួយថ្នាក់ដឹកនាំមន្ត្រីរាជការ នៃមន្ទីរឧស្សាហកម្មវិទ្យាសាស្ត្រ បច្ចេកវិទ្យានិងនវានុវត្ត ខេត្តបន្ទាយមានជ័យ

បន្ទាយមានជ័យ៖ នាចុងសប្តាហ៍នេះ ឯកឧត្តមបណ្ឌិត ហេង សុខគង់ និងគណៈប្រតិភូអមដំណើរ នៃក្រសួងឧស្សាហកម្ម វិទ្យាសាស្ត្របច្ចេកវិទ្យានិងនវានុវត្ត បានអញ្ជើញចុះសាកសួរសុខទុក្ខ និងសំណេះសំណាលជាមួយថ្នាក់ដឹកនាំមន្ត្រីរាជការ នៃមន្ទីរឧស្សាហកម្មវិទ្យាសាស្ត្រ បច្ចេកវិទ្យានិងនវានុវត្ត ខេត្តបន្ទាយមានជ័យ។

បើតាមលោក ញិល ប៊ុនធឿន ប្រធានមន្ទីរបានឡើងធ្វើសេចក្ដីរាយការណ៍សង្ខេបបញ្ជាក់ថា មន្ត្រីនៃមន្ទីរឧស្សាហកម្មខេត្តបច្ចុប្បន្នមានមន្ត្រីត្រឹមតែ ២១ រូបប៉ុណ្ណោះ តែការងារច្រើនដែលត្រូវធ្វើដូចជាក្នុងខេត្តបន្ទាយមានជ័យមានចំនួន រោងចក្រ សហគ្រាស និងសិប្បកម្មដែលបានចុះបញ្ជីសរុបចំនួន ១,២៤១មូលដ្ឋាន កម្លាំងពលកម្មសរុបចំនួន ១៣,៧០៨នាក់ ក្នុងនោះស្ត្រីចំនួន ៧,២២១នាក់ ក្រុមហ៊ុនផ្ដល់ទឹកស្អាតសរុបចំនួន ៣៧មូលដ្ឋាន ស្ថានីយប្រេងទូទាំងខេត្តមានចំនួន ១៩៣មូលដ្ឋាន និងបានសហការជាមួយមន្ត្រី មជ្ឈមណ្ឌលមាត្រាសាស្ត្រជាតិ ត្រួតពិនិត្យជញ្ជីង ស្ពានបានចំនួន ៤៥ជញ្ជីង។

ឯកឧត្តមបណ្ឌិត ហេង សុខគង់ រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យានិងនវានុវត្ត បានមានប្រសាសន៍សម្ដែងនូវការកោតសរសើរដោយស្មោះចំពោះថ្នាក់ដឹកនាំ មន្ត្រីក្រោមឱវាទទាំងអស់ដែលបានខិតខំបំពេញការងារ ភារកិច្ចបានល្អប្រសើរទោះមានមន្ត្រីតិចក្ដី ព្រោះថានាបច្ចុប្បន្ននេះបច្ចេកវិទ្យានិងនវានុវត្ត កំពុងតែលិចថ្លូនៅលើពិភពលោកក៏ដូចជាក្នុងប្រទេសកម្ពុជាយើង។

ឯកឧត្ដមបន្ថែមថា ដូចនេះអស់លោក លោកស្រី ត្រូវបន្តខិតខំបំពេញការងារ របស់ស្ថាប័នឧស្សាហកម្មនេះឲ្យបានល្អប្រសើរបន្តទៀត ដូចជាវិស័យ កាត់ដេរ ម៉ាស៊ីនកិនស្រូវ ផ្គត់ផ្គង់ទឹកស្អាត ពិសេសការងារមាត្រាសាស្ត្រ ដៃបាញ់ប្រេង ដេប៉ូលក់ប្រេងឥន្ធនៈ កន្លងមកមន្ត្រីយើងចុះធ្វើការពិនិត្យឃើញថាដេប៉ូមួយចំនួន រង្វាស់រង្វល់មិនត្រឹមត្រូវចំពោះការលក់ជូនដល់អតិថិជនជាដើម ហើយជាចុងក្រោយគណៈអធិបតីបានធ្វើការបំពាក់គ្រឿងឥស្សរិយស មេដាយ ដល់មន្ត្រីយើងចំនួន ៦ រូបព្រមទាំងបានផ្ដល់នូវសម្ភារៈមួយចំនួនផងដែរ៕