រដ្ឋមន្ត្រីការបរទេសអ៊ីរ៉ង់ និងអារ៉ាប៊ីសាអូឌីតបានយល់ព្រមជួបប្រជុំគ្នានៅប៉ុន្មានថ្ងៃខាងមុខ
តេហេរ៉ង់៖រដ្ឋមន្ត្រីការបរទេសអ៊ីរ៉ង់ លោក Hossein Amir-Abdollahian និងសមភាគីអារ៉ាប៊ីសាអូឌីត ព្រះអង្គម្ចាស់ Faisal bin Farhan Al Saud បានព្រមព្រៀងគ្នានៅក្នុងការហៅទូរស័ព្ទកាលពីថ្ងៃអាទិត្យ ដើម្បីជួបប្រជុំគ្នានៅប៉ុន្មានថ្ងៃខាងមុខ។រដ្ឋមន្ត្រីការបរទេសអ៊ីរ៉ង់បានសម្តែងការពេញចិត្តចំពោះ “និន្នាការវិជ្ជមាន” នៃទំនាក់ទំនងទ្វេភាគី ដោយបង្ហាញពីការប្តេជ្ញាចិត្តរបស់ទីក្រុងតេអេរ៉ង់ក្នុងការលើកកម្ពស់គោលនយោបាយភាពជាអ្នកជិតខាងដ៏ល្អរបស់ខ្លួន នេះបើយោងតាមគេហទំព័ររបស់ក្រសួងការបរទេសអ៊ីរ៉ង់។ដោយឡែក រដ្ឋមន្ត្រីការបរទេសអារ៉ាប៊ីសាអូឌីត បានសង្កត់ធ្ងន់លើភាពចាំបាច់នៃទំនាក់ទំនងជាប្រចាំ និងកិច្ចប្រជុំរវាងមន្ត្រីនៃប្រទេសទាំងពីរ ដោយពណ៌នាអំពីនិន្នាការដែលកំពុងបន្តនៃវិធានការរបស់ទីក្រុងតេអេរ៉ង់ និងទីក្រុងរីយ៉ាដថាជា “វិជ្ជមាន និងពេញចិត្ត”។
រដ្ឋមន្ត្រីការបរទេសក៏បានពិភាក្សាអំពីលក្ខខណ្ឌចុងក្រោយនៃកិច្ចព្រមព្រៀងដែលបានចុះហត្ថលេខារវាងអ៊ីរ៉ង់ និងអារ៉ាប៊ីសាអូឌីតនៅទីក្រុងប៉េកាំងកាលពីថ្ងៃទី ១០ ខែមីនា ស្តីពីការធ្វើឱ្យប្រក្រតីភាពនៃទំនាក់ទំនងការទូត និងការបើកស្ថានទូត និងបេសកកម្មឡើងវិញក្នុងរយៈពេលពីរខែ។នេះជាការសន្ទនាតាមទូរស័ព្ទលើកទីបីរវាងអ្នកការទូតកំពូលទាំងពីរក្នុងរយៈពេលប៉ុន្មានសប្តាហ៍ចុងក្រោយនេះ បន្ទាប់ពីការចុះហត្ថលេខាលើកិច្ចព្រមព្រៀងនេះបើយោងតាមគេហទំព័ររបស់ក្រសួងការបរទេសអ៊ីរ៉ង់។
យ៉ាងណាក៏ដោយ ក្រសួងមិនបានបញ្ជាក់ពីកាលបរិច្ឆេទ និងទីកន្លែងនៃការប្រជុំខាងមុខនេះទេ។
នៅក្នុងការសន្ទនាតាមទូរស័ព្ទមួយផ្សេងទៀតកាលពីចុងខែមីនា រដ្ឋមន្ត្រីការបរទេសទាំងពីរបានផ្លាស់ប្តូរទស្សនៈស្តីពីការរៀបចំកិច្ចប្រជុំទ្វេភាគីរបស់ពួកគេនៅក្នុងខែតមអាហារនៃបុណ្យរ៉ាម៉ាដានដែលនឹងបញ្ចប់នៅចុងខែមេសា។អារ៉ាប៊ីសាអូឌីតបានកាត់ផ្តាច់ទំនាក់ទំនងការទូតជាមួយអ៊ីរ៉ង់នៅដើមឆ្នាំ ២០១៦ ជាការឆ្លើយតបទៅនឹងការវាយប្រហារលើបេសកកម្មការទូតរបស់អារ៉ាប៊ីសាអូឌីតក្នុងប្រទេសអ៊ីរ៉ង់បន្ទាប់ពីព្រះរាជាណាចក្របានប្រហារជីវិតបព្វជិតនិកាយស៊ីអ៊ីតម្នាក់។
