សម្ដេចតេជោប្រកាសថា កម្ពុជាកំពុងអនុវត្តផែនទីបង្ហាញផ្លូវបច្ចេកវិទ្យាអាទិភាពចំនួន៣ និងត្រៀមដាក់ចេញផែនទីបង្ហាញផ្លូវ ៣ទៀត

ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន ប្រកាសថា រាជរដ្ឋាភិបាលបានដាក់ចេញផែនទីបង្ហាញផ្លូវបច្ចេកវិទ្យាអាទិភាពចំនួន៣ រួមមាន ផែនទីបង្ហាញផ្លូវបច្ចេកវិទ្យាកសិកម្ម បច្ចេកវិទ្យាអប់រំ និងបច្ចេកវិទ្យាសុខាភិបាល ព្រមទាំងត្រៀមដាក់ចេញផែនទីបង្ហាញផ្លូវបច្ចេកវិទ្យាអាទិភាពចំនួន៣បន្ថែមទៀត។

ក្នុងឱកាសអញ្ជើញជាអធិបតីបើកវេទិកាជាតិ «វិទ្យាសាស្ត្រ បច្ចេកវិទ្យា និងនវានុវត្តន៍» នៅមជ្ឈមណ្ឌលសន្និបាត និងពិព័រណ៍កោះពេជ្រ នាព្រឹកថ្ងៃទី២៦ ខែមីនា ឆ្នាំ២០២៣ សម្តេចតេជោ ហ៊ុន សែន បានថ្លែងថា តាមរយៈក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ជាពិសេសក្រុមប្រឹក្សាជាតិវិទ្យាសាស្រ្ត បច្ចេកវិទ្យា និងនវានុវត្តន៍ រាជរដ្ឋាភិបាលបានដាក់ចេញផែនទីបង្ហាញផ្លូវបច្ចេកវិទ្យាអាទិភាពចំនួន៣រួមាន៖ទី១. ផែនទីបង្ហាញផ្លូវបច្ចេកវិទ្យាកសិកម្ម។ទី២. ផែនទីបង្ហាញផ្លូវបច្ចេកវិទ្យាអប់។ទី៣. ផែនទីបង្ហាញផ្លូវបច្ចេកវិទ្យាសុខាភិបាល។

សម្តេចបន្តថា បន្ទាប់ពីដាក់ឱ្យអនុវត្តនូវផែនទីបង្ហាញផ្លូវបច្ចេកវិទ្យាអាទិភាពទាំង៣ខាងលើ រាជរដ្ឋាភិបាលក៏កំពុងត្រៀមដាក់ចេញនូវផែនទីបង្ហាញផ្លូវបច្ចេកវិទ្យាអាទិភាពចំនួន៣បន្ថែមទៀតរួមមាន៖ទី១. ផែនទីបង្ហាញផ្លូវបច្ចេកវិទ្យាថាមពល។ទី២. ផែនទីបង្ហាញផ្លូវបច្ចេកវិទ្យាទេសចរណ៍។ទី៣. ផែនទីបង្ហាញផ្លូវបច្ចេកវិទ្យាឌីជីថល។

សម្ដេចតេជោបានបញ្ជាក់ថា ផែនទីបង្ហាញផ្លូវបច្ចេកវិទ្យាអាទិភាពថ្មីៗទាំង៣នេះនឹងដើរតួនាទីជាត្រីវិស័យសម្រាប់ក្រសួង-ស្ថាប័នពាក់ព័ន្ធ ដៃគូអភិវឌ្ឍន៍ សហគ្រាសឯកជន និងប្រជាជនកម្ពុជា ក្នុងការធ្វើផែនការឱ្យមានសង្គតិភាព រៀបចំយុទ្ធសាស្រ្តឱ្យបានគ្រប់ជ្រុងជ្រោយ ចាប់យកបច្ចេកវិទ្យាឱ្យបានត្រឹមត្រូវ និងអភិវឌ្ឍផលិតផលបច្ចេកវិទ្យាឱ្យបានសមស្របតាមតម្រូវការជាក់ស្តែងរបស់កម្ពុជា។

សម្ដេចនាយករដ្ឋមន្ត្រីបានបង្ហាញការកត់សម្គាល់ថា ក្នុងរយៈពេលប៉ុន្មានឆ្នាំចុងក្រោយនេះ ប្រព័ន្ធអេកូឡូស៉ីសម្រាប់បណ្ដុះនវធុរកិច្ចក្នុងវិស័យបច្ចេកវិទ្យានៅកម្ពុជាមានការរីកចម្រើនឈានឡើង ជាអាទិ៍៖ វិនិយោគិនគ្រាប់ពូជក្នុងស្រុក មូលនិធិទុនឯកជន មូលនិធិបណ្ដាក់ទុន មជ្ឈមណ្ឌលគាំទ្រនវធុរកិច្ច ឬធុរកិច្ចថ្មីៗ និងកន្លែងធ្វើការរួមគ្នា៕