បើករថយន្តក្នុងល្បឿនលឿន ជ្រុលទៅបុកបង្គោលភ្លើង និងជញ្ជាំងការដ្ឋានបណ្ដាលឲ្យមនុស្ស ៣នាក់ រងរបួសធ្ងន់ស្រាល

ភ្នំពេញ៖ បើកបររថយន្ត ក្នុងល្បឿនលឿន រហូតជ្រុលទៅបុកបង្គោលភ្លើង និងជញ្ជាំងការដ្ឋានមួយកន្លែង បណ្តាលឲ្យក្រឡាប់ផ្ងារជើង បណ្ដាលឲ្យមនុស្ស ៣នាក់ រងរបួសធ្ងន់ស្រាល។

ហេតុការណ៍នេះ បានកើតឡើង កាលពីយប់រំលងអធ្រាត្រ ឈានចូលថ្ងៃទី១០ ខែមីនា ឆ្នាំ២០២៣ នៅតាមបណ្តោយវិថី ៦០ ម៉ែត្រ ស្ថិតក្នុងសង្កាត់ចាក់អង្រែលើខណ្ឌមានជ័យ រាជធានីភ្នំពេញ។

ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្តតូយ៉ូតា ព្រូស ពណ៌ទឹកប្រាក់ពាក់ផ្លាកលេខ ភ្នំពេញ 2BK-4535 រួមដំណើរដោយមនុស្ស បីនាក់ ធ្វើដំណើរក្នុងលឿនលឿន តាមបណ្តោយវិថី ៦០ ម៉ែត្រ ក្នុងទិសដៅពីខាងជើង ទៅខាងត្បូង លុះមកដល់ចំណុចកើតហេតុ រថយន្តបានរេចង្កូត ធ្លាក់ផ្លូវ បណ្តាលឲ្យជ្រុលទៅបុកបង្គោលភ្លើងបាក់អស់មួយដើម និងមិនទាន់អស់ល្បឿន ក៏បានជ្រុលទៅបុកជញ្ជាំងការដ្ឋាន មួយកន្លែងទៀត បណ្តាលឲ្យរថយន្តក្រឡាប់ និងមនុស្ស បីនាក់ រងរបួសធ្ងន់ស្រាល។

តាមសម្តីរបស់បុរសកម្មករម្នាក់ ដែលធ្វើការនៅក្នុងការដ្ឋានខាងលើ បានប្រាប់ថា មុនពេលកើតហេតុ ខ្លួនកំពុងគេងនៅក្នុងរោងកម្មករ ស្រាប់តែឮសម្លេងលាន់ដូចរន្ទះខ្លាំង ក៏ភ្ញាក់ពីដំណេក ស្រាប់តែឃើញរថយន្តតូយ៉ូតា ព្រូសមួយគ្រឿង ក្រឡាប់ក្បែរខ្លួនមិនបាន ២ ម៉ែត្រផង។

បុរសរូបនោះ បានបន្ថែមថា បន្ទាប់ពីបុក និងក្រឡាប់រួច អ្នកបើកបររថយន្ត បានសុំឱ្យ ខ្លួន ជួយលើករថយន្ត និងទាញមនុស្ស ចេញពីខាងក្នុងរថយន្ត ដើម្បីបញ្ជូនទៅសង្គ្រោះ ភ្លាមៗ។
ក្រោយកើតហេតុសមត្ថកិច្ចបានចុះមកវាស់វែងស្ទូចយករថយន្ត បង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាល រាជធានីភ្នំពេញ ដើម្បីរង់ចាំម្ចាស់រថយន្តចូលខ្លួនទៅដោះស្រាយនៅពេលក្រោយ៕